Read Bilua 2 Koriniti 11 Bible Online

2 Koriniti 11 - Bilua bible

2 Koriniti 11

¹Aṉata a melai matu titia tu inobea didielomo aṉa aṉako sasa rauraraurailo puto kale.

²Aṉako melai konoilo me ta omadeuvo vo Baṉara o melai konoiva me jari; meta omadeuvo kama pado bulebule ama sinaqu rusu jaria mela ko aṉa lula a qati korotivani omadeu pado maba tu ko raevo, vo o ṉavi Karisito.

³Melai aṉata ada ṉava ako meko kerukeru ta esa kota saruilou sole ni meta me vaekou meko tuvevo ama ni bulebule ama roquano vo Karisito kasi ama, omadeuvo ko Ivi o ikevoa lipaeko vo dole voko ubeubezato kale.

⁴Ako meta meqai zoleiva viqo kama lipalipa kama bazu Jisu ko kasevako kama maba poso kasi seke kuevani mekasi, ko pui aṉa lula aqai bazubazutako mekasi, ni meta meqai zoleiva edoloma auvana ko bazu ko se Tabu ama Auvana ka kikelako, ni meqai zoleiva edoloma lotu bazu ko se Uri ama Bazu ka kikelako, ko eṉe pui ṉeba melai bazuekema!

⁵Ako aṉata aqai kuirika ta aṉata maba pui zara kalala inio sea meko matuma “apositolo” madu ma kimelani kasi azo!

⁶Esa aṉata pui roverovea lala aṉako bazubazuto kale, melai tuvevo avole aṉata roverovea lala nianiio kale. Komi ta lula zakaremu a ika mekasi kiada keru azaazama taku kale ni iruruputo kale.

⁷Aṉata pui aba tamela koe kama tabara aṉako kai bazubazuto kale mekasi vo Baṉara ko Uri ama Bazu; aṉata a zarazarai tu meta raura me elo. Kota kama pado aṉako saruilo ikio kio?

⁸So keru aṉa a irurupute keru mekasi aṉata a qoe ko tabara edoloma lotu qoqono poso kasi azo. Kake ta esa eri kikevou, aṉata omadeuvo ada ma kuilikake jari seko takula tu a iruruputo mekasi.

⁹Ni so keru koa taku kale aṉa a eve keru mekasi aṉata pui tapata aba melai ike me so keru aṉa seleni aqa zaria keru; ako animeko lotu tamania kale amu seke kuevini Masedonia azo ta ke lati kue kiadama quli ko aṉa aqa zariovima quli. Kobeta kavani ko paloasako taku kale jari, ti kobeta kalou koko kuevako taku kale; aṉata maba pui riteraite aba melai ikou me kama quli.

¹⁰Aṉata maulu a bika vo Karisito ko tuveano aṉa kale ama kale, ta aṉata abeta ziovou raurailo kiadakoi sai mekasi Akaia ranama peuru poso kale aṉako pui tamela kovo ko tabara.

¹¹Noni kimela? Aṉata pui a roquemela me inio aṉata so kiala mekasi kio? Baṉara ta okai nianiia aṉata a roquemela me!

¹²Aṉata abeta ziovou pui tamela kovo kama tabara koko kilo ama taku kale omadeuvo vairutu jari. So inio aṉata ada ma kovou koko raki seko aikailo sea “apositolo” madu ma kimelani, se kekai raurarauraivani ko seta aṉa jaria iruruputo ke eva kio sama lipalipato.

¹³Sea maba poso ta pui tuvevo ama apositolo madu inio, seta kama lipalipa kama apositolo madu, seke lipalipaitani seko iruruputo kale ni seke edoliani tu vo Karisito ko tuvevo ama nabulu poso jaria melo ke elo.

¹⁴Zio, pui aqasiele ama quli! Ako o ṉavi vo Setani ta o roveani edolovo elo tu kala zakaremu ko mateana jaria velo o elo!

¹⁵So sole kota pui kama matuma quli kio tu vo Setani ko nabulu poso ta ke edolio tu sidopu ama maba poso jaria melo ke elo. Koko paitopaito kale ta keta ka kovou seko iruruputo ko male ama reketekete.

¹⁶Aṉata aqai limaza ko puliala mekasi ala ta sarubea lala pa la kiovou. Melai so kimela me tea vaeka tu soa kaselo emo, tu aṉata a jasa raurailou meko so la kio kale.

¹⁷Ako ko quli aṉa a qasekako erisaṉa ta pui animevo Lekasa Jisu o kaevo ko luluekako ikio; komia raurailo kalo kale aṉata aqai maba pesia nio kala sarubea lala jari.

¹⁸Melai kubo madu ta kekai rauraiva seko elo tupu ko saevo kale, so jari nio mata aṉa.

¹⁹Ako meta nianiio mela sole, so inio meta mema zoleiva se sarube amu! Ma noi nio esa?

²⁰Ako meta me zarieva kala vo me mabaku o imelani me, ma kala maba vo o ubeubemelani me, ma kala maba vo o vimazio puemelani me, ma kala rauraraurailo ko maba, ma vo ota mela pazokani meko loilo.

²¹Aṉata ada qurata tu kaseko ko aṉata pui aba roveovi so imelo me! Esa aṉata matu lekulekua lala inio so, ma noi nio esa? Melai aṉata abeta ziovou sarube puto ni eri kiavou: kala maba ta ikoana sala vo okai rauraraurailo ama quli kiovou, nio aṉata avai paloasani lala vo kiavou.

²²Hiburu amu inio ko se kio? Aṉa melai so. Izireli amu inio ko se kio? Aṉa melai sai zalala inio. Ebarahami ko vikuvikula kale amu nio ko se kio? Aṉa melai so pado.

²³Vo Karisito ko nabulu poso inio ko se kio? Aṉata kala sarube ala maba jaria rauraraurailo a eva, melai koko tuveano ta aṉata kala qulepo ala nabulu lala abe mai paloasa se! Aṉata lula a matu iruruputa, aṉata lula a eva pirito pade kale kubo taku, ni aṉata lula a matu pazoivani lala, ni kubo taku ta sipole ada vouvani lala mati.

²⁴Sike taku kale inio se Jiu amu ta ke pazole aṉa koa zouke toni siakava taku sama pazoto kale;

²⁵zouke taku ta ke sisiparu puela se Romu amu; omadeu taku ta ke taila lado kale. Aṉata lula zouke vaka ko lati pisaivani lala, ni omadeu taku karabete ariku aoa a ṉamukeni lala kolo kale.

²⁶Kubo aṉako talio kale aṉata a doraeke ko nioqololo ko tapata ni se kuilokuilo amu ke erekema tapata, ni a doraeke ko tapata se aṉako mabamu se Jiu amu ke erekema ni se pui Jiu amu ke katilema, ni aṉata a doraeke ko tapata koa matuma peuru poso kale ama, ni ivulu ama zaekale ama tapata, ni ko matu okate ama ololobagea kale ama tapata, ni se lipalipa kama baerebaere poso kasi ama tapata.

²⁷Jairojairoki ama iruruputo aqai eva, ni puliama maroṉo mati; aṉata lula kubo taku ada luapa ni ada rokauva; ni lisulasu ada eva puliama aṉako sailao, ma ono, ma suma.

²⁸Ni aṉata pui a qaseka mata kama quli. Kiadama ṉaniu aṉata aqai tuqutuqua kerukerueko kiadama lotu qoqono.

²⁹So keru kala maba lekuleku o eva keru, aṉata duki aqai eva voko soama lekuleku, ni so keru kala maba ko sipativa keru ko sarueko, aṉata matu upotuqu ada eva.

³⁰Aṉata aqa zaria rauraraurailo tea, aṉata aqai raurailo inio ko quli kasa ko iko ama ko aṉata lekulekua lala, ni pui a roveani lala ereko kama quli a ṉaviko pizato kale.

³¹Vo Baṉara, vo animevo Lekasa Jisu Karisito vo Mama ta o ilusiovou rineo rane, ni vo inio okai nianiiani ko aṉako pesio ko tuveano.

³²So keru aṉa Damasikasi a eve keru inio vo Lekasa Aretasi vo maqemaqele ta o soroemake voko vaki koa peuru ko veutu tona tu ke vailo tu ke noqoelo aṉa.

³³Melai aṉata a joloike kala pado matu vesa kale kala purapura peuru ko idi kale ala kale kude ni aṉata ada va soqoike vo.