Read Bilua 2 Koriniti 4 Bible Online

2 Koriniti 4 - Bilua bible

2 Koriniti 4

¹Eṉeta pui lekuleku ṉe eva, ako eṉeta ṉeqai nianiia ta o ṉaviko pakiezato sama roquano kale inio vo Baṉara ta o katiṉela eṉe komia eṉeko iruruputo sole.

²So inio eṉeta pui ṉeqai bazubazutani ṉela kakoi kazo ko kuevako keve poso, eṉeta pui ṉe ubeubemani ṉela se maba poso tu ke tuvevo puto eṉeko roverove ama pesio kale ni eṉeta pui edolovo ṉe ikani ṉela vo Baṉara ko bazu. Eṉeko zakaremua kai bazuto kale ko tuveano vo Baṉara ko tanama kale eṉeta ṉe duvevo puiva kiadama maba madu ko bulo kale ama kerukeru kale.

³Ako koa Uri ama Bazu ko eṉe ṉeqai bazubazutako ta mutamuta kama ko elou ta, kota mutamuta kama ikio sea maba poso kasi seke olani noqola tolailo kale.

⁴Seta pui ke tuvevo puta, ako seko kerukeru ta lula kutumana ota ma ika komia peuru ma peuru vo ruqe ala baṉara Setani sole. Vota ota ma tizaeka seko kelo koa zakaremu koko taloako se tona, koa zakaremu koko kuevako Jisu ko Uri ama Bazu kale azo, vo Karisito ṉaṉaidara sama, vo maba bea Baṉara.

⁵Ako eṉeta pui ṉeqai bazubazuta ṉe ṉavi kale avo melai eṉeta ṉevai bazuta vo Jisu Karisito inio Lekasa kio, ni eṉeta meko nabulu poso ṉela vo Jisu ko kio kale sole.

⁶Voa Baṉara vo eri kioveni “Zakaremu ta ko talolou kutumana kale!” kioveni, vo inio voa Baṉara vo o taloekikeni voko zakaremu eṉeko kerukeru kale, tu ṉe baqumuko vo Baṉara ko ṉaṉaidara eṉe ṉe qerukerueva keru vo Karisito, omadeuvo se Izireli amu ta ke paqumukake jari koa ṉaṉaidara seke keve keru vo Mosese ko loilo.

⁷Ni eṉe lula ṉe qoani ṉela komia Baṉara kasi azo ama bazubazuto ko iruruputo ta omadeuvo ko kiada keru ama miduku raro koko teamukako ko qulepo ama jiku jaria ṉela, tu kasa koma elo se maba poso ko Uri ama Bazu ko pizato ta Baṉara kasi azo ama ni pui eṉeko pizato.

⁸So inio ko tapata ta ko ṉelai baroa melai kota pui koqo ko iṉela; ni kama taku ta niuniala ṉeda eva, melai maba pui ko mumaeṉela;

⁹matu kubo kana poso ta ikoana, melai eṉeta vo ṉe baerebaere satea ṉela; ni kama taku eṉe ta matuma tabi ṉe eva, melai eṉeta pui ṉe vouva.

¹⁰Ni kiada keru eṉeta ṉe eva vo Jisu okai vovima jari ama tapata kale; melai so inio eṉeko beta saevo ta mata ko kasa pueka voko mata saevo.

¹¹Kiadama eṉeko saevo kale eṉeta ṉe ṉamuiva vou ko tapata kale vo Jisu va nabuluputo kale, so inio o ṉavi Jisu ko saevo ta kasa ko eva eṉeko lekuleku ama tupu kale.

¹²So sole eṉe apositolo ṉela ta ko vou ko tapata kale, melai Sokale avo inio Baṉara o puarikako saevo ta ko eva me tona.

¹³Ko Tabu ama Riki ta so kikola “Aṉata a besike ako aṉata a duvevo putake sole,” kikola. Ni eṉe melai koa omadeuma tuvevo puto sama kerukeru saṉela inio eṉe melai ṉe besia ako eṉeta ṉe duvevo puta sole.

¹⁴Ako eṉeta ṉeqai nianiia ko vo Baṉara vo o saeviveni voukale azo vo Lekasa Jisu, vo inio mata o saeviṉelou eṉe voukale azo tu Jisu sase ṉe elou, ni o odieṉelou eṉe ni so jari omadeu odiemelo o elou animea kiada mela voko tanama kale.

¹⁵Ako koa kiadama eṉeko tapata poso ta meko tauvemelo kaqe sole. So inio vo Baṉara ta kobeta ziovou pakiemo matu kubo madu voko pakiezato sama roquano kale ni vota o odiemou sea kiadamu tu seta ṉaṉaidara ke ivou vo Baṉara seko kativo kale seko uriavo seko vararaito kale.

¹⁶Sokale avo inio eṉeta pulia kude lekuleku ṉe eva eṉeko bazubazuto ko iruruputo kale. Eṉeko tupu ta kobeta lepuka, melai eṉeko kerukeru ta piza kobeta eva kiadama ṉaniu.

¹⁷Ni eṉeko komia silo ama ni puju ama tola poso ikio ko odieṉela eṉe matu ṉaṉaidara kama reketekete kale, koa matuma ni paito pide ama reketekete, ko silo jaria kelo ko ikako koa kiadama tapata poso.

¹⁸Ako eṉeta pui ṉeqai lilitani ṉela ko kasale ama quli koko keazaivako vilu kale, melai ko pui ko keazaivako quli kio. Ako koko keazaivako quli vilu kale ta puju ama taku kale pala ko evako, melai ko pui ko keazaivako quli ta noqola ko elou.