Read Bilua 2 Koriniti 6 Bible Online

2 Koriniti 6 - Bilua bible

2 Koriniti 6

¹Vo Baṉara ko tauvezato kale eṉeta ṉe basema se maba poso tu ke vati odouvikinio vo. Ni eṉeta ṉe basemela me me lula me qoani mela vo Baṉara ko pakiezato sama roquano tu meta pui me niumaekou ko.

²Meta viqomo vo Baṉara ko pesio kikolani, “Koa tutututuki ama taku kale inio aṉata ada mela viqake ni a roquemelake me; koa aṉako tauvezato ko ṉaniu kale aṉata a bakiemelake me.” Keatini! Komi kio koa taku vo Baṉara ko roquano ko kovo ko; komia ṉaniu ta koa ṉaniu pakio ko!

³Eṉeta pui ṉeqa zaria tu kala ta ota ṉela kelo kama saruilo eṉeko iruruputo kale, sokale avo inio eṉeta ṉe madoeka tu sidopua saevo ṉe elo kiadamu ko vilu kasa.

⁴Kiadama quli kale eṉeta lula ṉe qasa pueka eṉeko va nabuluputo vo Baṉara ko eṉeko kai pataito kale ko tapata poso, ni eṉeko tolailo kale, ni eṉeko olaquavo kale.

⁵Eṉeta lula ke pazoṉela, ni ṉe eva pirito pade kale, ke ṉelai kasakea lula, eṉeta duki ama iruruputo ni olaqua dudeo saevo ni luapo ṉe eva.

⁶Eṉeta lula kasa ṉe ika eṉeko va nabuluputo vo Baṉara eṉeko bulebule ama saevo kale, ni eṉeko nianiio ni paṉao ni eṉeko puaropuaro kale, vo Tabu ala Auvana kale, eṉeko tuvevo ama roquano kale,

⁷eṉeko kai bazuto kale ko tuvevo ama bazu, ni vo Baṉara ko pizato kale. Ko sidopu ama saevo ikio eṉeko okotoma vakovako tu ṉe qati pazokinio kiadama kana poso.

⁸Eṉeta ṉe eva raurailo kale ni qurato kale, eṉeta ṉe qoa ko zarazarato ni ṉe ilusia. Maba poso ta lipato jari ke iṉela, melai eṉeta ṉeqai pesia ko tuveano.

⁹Pui maba jaria kerukerueṉelo ke eva, melai kiadamu ta ke ṉelai nianiia; eṉeta vou ko ededeu kale ṉe eva, melai eṉeta ṉebeta saeva. Eṉeta ke pazoṉela, melai pui ke vouvaeṉela;

¹⁰eṉeta kama upotuqua ṉela, melai eṉeta ṉe zoleiva kiada keru; ni eṉeta ozaoza kaṉela inio, melai eṉeta batiro ṉe ima matu kubo madu; eṉeta pulia quli saṉela, melai koko tuveano ta eṉeta kiadama quli saṉela.

¹¹A baerebaere poso mela, me Koriniti peuru kale me evani mela, eṉeta pui ṉeda mela daipaeka kama quli mekasi, melai eṉeta ṉe matu roquemela me.

¹²Eṉeko roquano ta pui silo ama mekasi, melai meko ikio silo ama eṉe kasi.

¹³So sole aṉata a bazuemela me omadeuvo kala mama ta o bazuema voko meqora poso jari; meta ṉela besiekomo eṉeko roquemelo me meko roqueṉelo eṉe kale.

¹⁴Meta pui omadeu iruruputo mati elo se pui ke tuvevo puevani vo Karisito. Noi nio kimela me; ko sidopu ni ko sarueko ta omadeu elo ko elou, kio? Ni ko zakaremu ni ko kutumana ta ko lolopareovou, kio?

¹⁵Ni vo Karisito ni vo Setani ta omadeu vatolo qo elou, kio? Ni voa maba o tuvevo putani ni vo pui o tuvevo putani maba ta omadeu kerukeru qo elou, kio?

¹⁶Ni vo Baṉara ko Jelepade kale ke ilusatani ta mata beku poso ke ilusikani nio, kio? Ako anime inio vo saevola Baṉara ko Jelepade mela! O ṉavi Baṉara kiovevo jari, “Aṉata a erekou aṉako zae a ṉaviko maba poso kasi ni aṉata a loilou se sate; Aṉata sevo Baṉara a elou, ni seta aṉako maba madu ke elou.”

¹⁷Sokale avo inio vo Baṉara ta o balauvimake se Izireli amu ni so kiolake, “Erisaṉa meta vaemomo se ni meta pitasiomo sekasi azo. Meta taka papariomo ko kuna kama quli, Sokale kude inio aṉata a mela lilitou me.

¹⁸Aṉata mevo Mama a elou, Meta aṉako meqora poso me elou, reko ni lasivea mela, kiola vo piza kala Baṉara.”