Read Bilua 2 Koriniti 8 Bible Online

2 Koriniti 8 - Bilua bible

2 Koriniti 8

¹A qaka ni visi poso mela, eṉeta ṉe mela zaria me tu meta kai nianiiomo vo Baṉara ta lula kasa o ika voko roquano koa kiadama Masedonia peuru poso kale ama lotu qoqono poso kale.

²Seta lula ke toraekani kubo tapata poso, melai seko zoleilo ta ikoana matuma, ni seko ozaoza saevo kale melai seta matuma katizato ke erekake.

³Aṉata aqai nianiia sole a uria bazuemela me ko se lula ke pikako ta pui seko bokao tiniavo pala, melai seta kekai paloasake seko bokao seko puaropuaro kale. Ni kota ke ṉaviko vatolo kale inio

⁴seta ke matu paseṉelake eṉe tu eṉeta ṉema zarieko tu ke ereko seko katizato tu ko zomano tauvezato vo Baṉara ko maba madu kasi se Jiudia peuru kale ke evani ozaoza kamu kasi.

⁵Eṉeta pui so pa kiṉeve, ta seta so jaria matuma katizato ke erekou! Ako kuleto seta lula ke katizia ke ṉavi vo Lekasa Jisu kasi ni voko madu keta eva; ni koko tova vo Baṉara ko vatolo ke zorika nio seta ke katizia mata eṉe kasi.

⁶So sole eṉeta ṉe baseva vo Taitasi, vo o taniekeni komia pikazato ko iruruputo, tu vota obeta zio ereko ko tu vota o tauvemelo me tu me okotikou komia qulepo ama roquano sama iruruputo.

⁷Meta matu batiroa mela kiadama quli kale, meko matuma oqu kale, meko roverove ama pesio kale, ni meko matuma nianiio kale, meko matuma dikidauputo kale ni meko matuma roqueṉelo kale eṉe. So sole eṉeta ṉe mela zaria me tu meta mata matu puaropuaro emo komia roquano sama iruruputo kale.

⁸Aṉata pui a ereka kama piza kama bazu tu meta me ereko ko. Melai aṉata kasa a mela ika sea Masedonia mu ko roquano sama iruruputo tu a zuvarimelou tu me melai soama roquano sama iruruputo erekomo.

⁹Meta me baqumuka animevo Lekasa Jisu Karisito pakiezato sama roquano; ako vota kiadama aukale ama batiro sala, melai vota ozaoza ota eve o ṉavi meko kio kale avo, tu vota o katimelou aukale ama batiro voko ozaoza elo kale.

¹⁰Aṉako kerukeru kale ta matu uri tu meta me okotikou koa katizato meme daniekema koko olalama sabere keru ama, so keru me kasa me ike keru pui meko ereko pala, melai meko zario sate taka ereko koko iruruputo.

¹¹So sole erisaṉa ta uri tu meta okotikomo koa koidi! Dikidauputole okotikomo ko omadeuvo lula me qaevo jari meme danieke keru, ni erekomo ko meko erisaṉama ṉeamuzato kale.

¹²Ako meta dikidauputole me erekou meko katizato ta, vo Baṉara ta oka zoleilou meko katizato me meqai bokaovako ereko, ni pui opa ka zariovou ko me pui meqai bokaovako quli ereko sole.

¹³Aṉata pui a qaseka tu kake ta ke vaizailou pikazato kale, ako so ta seke pikazatani kasi ta matu duki kota elou koa pikazato. Melai meta batiroa mela komia taku kale, so inio me male tu me dauvemo se ozaoza kamu. So inio meko olaquavo keru seta ke roveovou mela besieko meko tauvezato, inio meta ijatinia tauveilo me elou.

¹⁵Eri nio ko Tabu ama Riki kikolani se Izireli amu ko ijatinia kai puarikinio ko mana lealea kama zaekale sole, “Vo kubo o padoekeni ta puliama voko nieunieula sala, ni vo silo pala o padoekeni ta pui opa luape.”

¹⁶Eṉeta ṉevai ilusika vo Baṉara vo Taitasi ko dikidauputo kale ama zuvarimelo me tu me ereko komia pikazato ko iruruputo. Ako eṉe ni voko zario ta omadeuvo ama tu tauvemelo me sole.

¹⁷Pui voko opatiko eṉeko paseto kale ko kiada, melai voko uri ama vatolo kale inio o pitoeka tu o kilo tauvenelole me.

¹⁸Vo sate inio ṉe joroeva animevo lolo vo kiadama lotu qoqono poso kevai nianiiani voko kai bazubazuto kale ko Uri ama Bazu.

¹⁹Koko topi tiniavo inio vota lula ke pitoeva kiadama lotu qoqono tu vota o zomano talio eṉe sase komia eṉeko roquano sama pikazato ko iruruputo kale, ko animevo Lekasa ṉaṉaidara ko ivako, ni ko kasa ko ikako eṉeko ka zario tauvezato.

²⁰Eṉeta ṉe qati vaila tu puliama kuiripato ta ko elou eṉeko noqoeko kale komia matuma puaro.

²¹Eṉeko zario ta ṉe ereko ko sidopu, pui vo Baṉara ko vilu kasa ko kiada, melai so jari maba ko vilu kasa.

²²So inio eṉeta ṉe joroeva mata kala eṉevo lolo nioqa sase; vo lula ṉe madoevani kubo taku, ni ṉe veani kiada keru matu tauvezatola ni dikidau kala. Ni erisaṉa vota lula o melai kerua me, ni vota o matu dikidauputa tu o tauvezato.

²³Ni voa Taitasi, vo inio aṉa kale ala vo o iruruputani aṉa sase meko tauvemelo kale; ni se animeko lolo poso se vo sate ke taliovo amu ta ke soroivani ko lotu qoqono poso kasi azo ni ke puratikani vo Karisito ko ṉaṉaidara.

²⁴So sole meta kasa ikomo meko roquano sekasi, inio kiadama lotu qoqono ta tuvevo ke ikou koa meko roquano ni eṉeko mela zoleilo me.