Read Bilua Qelesia 2 Bible Online

Qelesia 2 - Bilua bible

Qelesia 2

¹Ni toni ariku sabere ko tova inio aṉata mata a vaitake Jerusalema, Banabasi sate, ni aṉata mata a odievake vo Taitasi.

²Aṉata a olake sai, ako vo Baṉara ta o bazuelake sole tu aṉata a zio. Nio aṉata a doraemake ṉe qiadakoi se lotu qoqono ko vilua pikopiko madu, ni aṉata amai bazuekake koa Uri ama Bazu, ko aṉa aqai bazutako se pui Jiu amu kasi. Ako aṉata ada ṉake sole ta esa seta pui omadeu kerukeru ke lati eva aṉa, ni aṉako iruruputo lula a erekema ni abe erekako erisaṉa ta utu ama kiala sole.

³Kake lipalipa kama lotu maba poso ta ke amaqeake lotu qoqono kale moizavole tu ke soukori pueṉelo tu kekai nianiio nonia rupasimelo anime inio o eva vo Jisu Karisito. Ako seta kekai zariake tu mata mabaku ke ṉelai iko eṉe se Jiu amu ko Bazu vo Baṉara o katimema Mosese kale kude sole. Melai rouka so kebe kae, vo Taitasi aṉa sase o eveni Quriki ala melai puliala ta o zuruzuruevake tu o moveilo.

⁵Melai eṉeta puliama rora ṉeba katime sea lipalipa kamu! Ako eṉeta ṉeqai zariake sole tu kati qaraqarato ko Uri ama Bazu ko tuveano tu me kaqe sole.

⁶Melai sea raura kamu ma kimelani me ta pui kepa besieke kama quli koa Uri ama Bazu ko aṉa aqai bazubazutako kale ama. (Ni aṉata pulia quli ka kiala ko loma quli madu inio ko se lulavo. Ako vo Baṉara kasi ta animea kiada mela ti omadeuvo sole.)

⁷Sea vilua pikopiko madu ta pulia quli kepa kati paqulike aṉa aqai bazubazutako Bazu melai seta ke keake ta vo Baṉara ta o katile aṉa ka pado koidi, omadeuvo Pita o kativema jari ama. Ako vo Baṉara ta o kative koa iruruputo vo Pita tu omai bazueko ko Uri ama Bazu se Jiu amu, ni Baṉara ta o katile aṉa komia iruruputo tu aṉata a melai bazueko ko Uri ama Bazu me pui Jiu amu mela.

⁸Ni vo Baṉara vo o kativeni ko pizato vo Pita tu vota Jiu mu kasi apositolo oma elo, vo inio mata o katileni aṉa ko pizato tu aṉata apositolo a mela elo mea pui Jiu amu mela.

⁹Nio Jemisi, ni Pita, ni Jone ta ke keake vo Baṉara ko roquano kale o katilema koidi. Ni se inio sea vilua pikopiko madu me meda ma matu paṉaovani ma kimelani! Nio seta uri ama ka kikeve aṉa ni Banabasi ko iruruputo, so sole eṉeta ṉe jaṉaekiniake tu ko tuvevo puilo ko so, ni seta eri kikelake, “Paula ni Banabasi, matu zakaremu inio ko ṉelai eva eṉe ta vo Baṉara ta o soroeqela qe tu qe ziovou pui Jiu amu kasi, ni eṉeta o soroeṉela tu ṉe ziovou Jiu mu kasi,” kikelake.

¹⁰Ni seta omadeu quli ko kiada ikio ke paseqelake eqe, tu qepeta ziovou tauvemo se ozaoza kamu Jerusalema. Ni ko quli kio aṉa melai aqai matu zariako tu a ereko.

¹¹Ni so keru vo Pita o kuevi keru Anitioko, aṉata a riqaevake vo o ṉavi, ako vota ota saruike sole.

¹²Ako eri nio o kae sole. So keru Pita kuleto o kuevi keru Anitioko, vota o mati vuatake se pui Jiu ama lotu maba poso, puliako Jemisi o soroemeni Jiu ama maba poso barolo. Ni so keru sea maba poso ke baroa keru, vota ota epezake mata vuato se pui Jiu ama maba poso sase ni ota pitasiake sekasi azo. Ako vota ota ma ṉake sole se Jiu amu se kekai zariani kiadama pui Jiu ama lotu maba madu tu ke movemou.

¹³So sole vo Pita ta ota lipalipatake ni mata kake se Jiu ama lotu maba madu melai ke luluekake voko lipalipa kama kalo. Ni vo Banabasi melai ko niumaevake sea Jiu mu ke erekako kalo, ti vo melai ota sarui lulueko koa kalo.

¹⁴Ni aṉata a qeake seke erekako quli. Seta pui ke luluekake Uri ama Bazu ko tuveano, so sole aṉata eri va kialake vo Pita sea kiadamu ko tanama kale, “Pita, ṉota Jiu ala ṉa inio, melai ṉota pui Jiu amu jaria saevo ṉo eva. So sole noni kaqe inio ṉo zuruzuruema se pui Jiu amu tu Jiu mu jari ke kalo? Ako ṉo ṉavi melai pui Jiu amu ko saevo jaria saevo ṉobeta eva sole.

¹⁵“Ako aniqeta pui Jenitailoa qela qepa alile sole, se Jiu amu kutumana kamu ma kikelani seko pui lulueko vo Mosese ko Bazu kale avo. Melai aniqeta Jiua qela qe alile.

¹⁶Melai aniqeta qekai nianiia ta puliala maba inio sidopu opa elou vo Baṉara ko kelokelozato kale Mosese ko Bazu ko lulueko kale. Melai vai keru kale vo Jisu Karisito ko kiada kale inio sidopu o elou vo Baṉara ko kelokelozato kale. So sole aniqe melai qevai oqui vo Jisu Karisito, so inio aniqeta sidopu qe evake vo Baṉara ko kelokelozato kale. Ni aniqeko sidopu elo ko raki vo Baṉara ko kelokelozato kale ta aniqeko vai keru vo Karisito. Melai pui Mosese ko Bazu ko lulueko kale inio sidopu qe eva. Ako puliala inio sidopu o evani vo Baṉara ko kelokelozato kale vo Mosese ko Bazu ko lulueko kale.

¹⁷“Aniqe Jiua qela ta vo Karisito kale inio qekai zariake tu sidopu elo vo Baṉara ko kelokelozato kale. So sole aniqe melai qe epezake kai keru Mosese ko Bazu. Melai aniqeko epezo kai keru Mosese ko Bazu tu vai oqu vo Karisito koko kio ni kalo ta pui Karisito inio kutumana kaqela o iqela aniqe. Maba pui!

¹⁸Melai kala maba mata o tova lojoekou Mosese ko Bazu tea vota koa Bazu o pazokani inio.

¹⁹Ako aṉata a vaeke kai oqu Mosese ko Bazu aṉa abe kai saeve keru koa Bazu. Ni koa Mosese ko Bazu ikio kolai nianiiekike aṉa tu pui aqai keru ko ṉavi koa Bazu, so sole aṉata a vovi jari koa Bazu ko rana kale. So inio aṉata mata a jaeva aṉako vai oqu vo Baṉara kale. Ako aṉata Karisito sase korosi topi ke vouvaeleni jaria lala sole,

²⁰ni erisaṉa aṉata pui aqai saeva a ṉaviko saevo melai aqai saeva vo Karisito ko saevo vo o saevani aṉa tona. Ni aṉako erisaṉama saevo kale aṉata avai oqua vo Baṉara vo Meqora vo o roqueleni ni ola vovini aṉa.

²¹Aṉata pui aba zaraekou koa roquano sama iruruputo vo Baṉara ko, ako koa lulama Bazu Mosese o katimelema ta pizato sama tu sidopu ko imelo anime vo Baṉara ko kelokelozato kale tea, vo Karisito ta puliako kaqe inio opa vou.”