Read Bilua Qelesia 3 Bible Online

Qelesia 3 - Bilua bible

Qelesia 3

¹Me sarube ama Qelesia mu mela! Meta kake inio kebe matu uria lipalipaemela! Ako meta mebe uria viqeni mela inio sole vo Jisu Karisito o erekema quli voko voukale korosi topi.

²Sole meta lai bazuekomo aṉa: nonia vovo inio me eve me vo Tabu ala Auvana? Meta me voe voa Tabu ala Auvana meko lulueko kale Mosese ko Bazu, kio? Maba pui! Melai meko vovo vo Tabu ala Auvana ta meko viqo ni kai oqu kale vo Jisu ko Uri ama Bazu.

³Meta meda maba matu sarube puta inio! Meko saevo vo Karisito kale ama ta me danieke Baṉara ko Auvana kale, melai erisaṉa meta mebe kai zaria koa saevo vo Karisito kale ama ta kobeta ziovou melai kota me ṉaviko pizato kale kimela.

⁴Meta kubo tapata me doraeke meko oqu ko kio kale. Ta koa kiadama ko melai ereima quli ta pulia quli kaqe, ma?

⁵Meta paqumukomo ko vo Baṉara ko katimelo vo Tabu ala Auvana ni voko mela ereko aqasiele ama quli ta pui meko lulueko kale Mosese ko Bazu! Melai voko katimelo voa Auvana ni voko mela ereko koa aqasiele ama iruruputo ta meko viqo ni kai oqu ko Uri ama Bazu ko kio kale inio.

⁶Ako ko Tabu ama Riki kikovevo vo Ebarahami kale avo ta eri nio sole, “Vota tuvevo o ikake ko leveleveo inio ovai oquke vo Baṉara, nio koa oqu kale vota sidopu ala va kiolake vo Baṉara.”

⁷So sole meta paqumukomo ta se oqu samu inio tuvevo amu vo Ebarahami ko vikuvikula madu.

⁸Ni ko Tabu ama Riki kale ta ko pidokiovi mata vo Baṉara ko sidopu puemo se pui Jiu amu seko oqu kale. So sole ko Uri ama Bazu ta ko pikairiovi Ebarahami kasi, ko eri kikovema, “Ṉokale inio kiadama toutou poso ta mauru keta elou,” kikovema.

⁹Ni vo Ebarahami ta okai oqui koa bazu ni voko oqu kale inio vota mauru ota eve. Ni erisaṉa melai oqu samu inio mauru ke evani omadeuvo vo Ebarahami ta mauru o eve jari.

¹⁰Melai se kekai qaraqaraivani Mosese ko Bazu ko lulueko kikelani ta ke leveziovou, ako ko Tabu ama Riki kikovevo ta eri nio sole, “Vo pui o lulueko ala koa kiadama Bazu koko rikiziovima vo Mosese ko Bazu kale ama ta o leveziovou,” kikovema.

¹¹Ni erisaṉa ta matu zakaremu ko pui vo Mosese ko Bazu ko lulueko kale inio vo maba ta sidopu opa elou sole vo Baṉara ko kelokelozato kale. Ako ko Tabu ama Riki kikolani ta eri nio sole, “Voa maba voko oqu kale sidopu va kiolani vo Baṉara, vo o kiada inio o saevou.”

¹²Ako vo Mosese ko Bazu ko lulueko ta pui oqu ko ranama quli sole melai iruruputo ko pala. Ako ko Tabu ama Riki kikovevo ta eri, “Vo o ereko ala kiadama quli vo Mosese ko Bazu kikolani nio o saevou.”

¹³So inio vo Mosese ko Bazu ta levezo saṉa ko imele anime, melai vo Karisito inio ota mela ṉamuke koa levezo, ni o besiemele anime koa levezo ko zaekale azo. Ako ko Tabu ama Riki kikovevo ta eri nio sole, “Seke soilo amu ore topi ta keta leveziovou,” kikovema.

¹⁴Ni vo Karisito ta soa mela vou o mela eve tu vo Baṉara ko mauruto Ebarahami kasi leveleveo o ikema ta ko barolo se pui Jiu amu kasi vo Jisu Karisito kale kude. Ni so inio animeta me voa vo Baṉara leveleveo o iveni Tabu ala Auvana animeko vai oqu kale vo Karisito.

¹⁵A visi poso, aṉata a qatimelou me kama pado podepodeti animeko kiada keru ama saevo kale ama, ko eri. Kainioqa ta qo erekou nioqako leveleveo ni qo vinaekou, ta puliala ta opa roveovou biresuko ni kati paquliko mata kama quli.

¹⁶Ni vo Baṉara ta o erekake voko leveleveo Ebarahami ni voko vikuvikula kale ala kasi. Melai vo Baṉara ta pui eri kiolake, “ṉo ni ṉoko vikuvikula kale amu kasi” ta pui so kiolake, ako so kio ta matu kubo maba poso inio sole. Melai Baṉara ta eri nio kiolake, “ṉo ni ṉoko vikuvikula kale ala kasi,” kiolake. Ako so kio ta omadeu pado maba sole ni vo inio vo Karisito.

¹⁷Ni eri nio aṉa kialani. Vo Baṉara ta o erekake voko leveleveo Ebarahami kasi saita inio koa Bazu Mosese ko ta ko katiziovi 430 sabere ko tova, so sole koa Bazu ta pui kopa besieke koa leveleveo vo Baṉara o erekema Ebarahami kasi ni pui ko rovea utu ama iko ko.

¹⁸Sole koa Bazu ko lulueko kale ta mebe kovou ko quli Baṉara leveleveo o ikema quli, kio? Maba pui! Ako so ko kalou ta pui vo Baṉara ko leveleveo kio mauru kopa imelou anime. Melai vo Baṉara ta o utu kativake inio vo Ebarahami voko mauruto koa leveleveo vo o erekema ko kio kale pala.

¹⁹So sole loma quli kaqe inio vo Mosese ko Bazu? Kota eri nio. Koa Bazu ta ko katiziovi anime kasi tu ko mela kaseko ko saruilo anime me erekako. Ni kota pizato saṉa kobeta evake ti kobeta baroi voa pado Ebarahami vo vikuvikula kale ala kasi vo Baṉara o kaseveni. Ni se mateana madu inio ke koeni koa Bazu ni se inio ke kativeni vo Mosese vo oma pesiovini maba madu ni vo inio o katime koa Bazu. Sole Mosese ta kala tianiala maba o eve.

²⁰Melai vo tianiala maba ta puliala, omadeu pado rana ko kiada ko elou ta. Ni vo Baṉara ta omadeu pado inio.[2]

²¹Noi nio, vo Mosese ko Bazu ta ko pazoka vo Baṉara ko leveleveo kio? Maba pui! Ako vo Mosese ko Bazu ta ko katimela animea maba poso mela ko noqola kama saevo tea, animeta sidopu inio meda elo Baṉara ko kelokelozato kale vo Mosese ko Bazu ko lulueko kale.

²²Melai kota pui so inio ko kava, ako ko Tabu ama Riki ta kasa ko ikake ko kiadama peuru ma peuru kale amu ta ke piriziake boutare kale, tu ko leveleveo ta koma katizio oqu kale se tuvevo ke ivani vo Jisu Karisito.

²³Ni puliako komia oqu kilo, eṉea Jiua ṉela ta ṉe biriziovi Mosese ko Bazu kale, ni eṉeta pui ruparupasia ṉela ti kobeta baroake vo Baṉara ko ṉela kaseko ko oqu ko kalo.

²⁴So sole vo Baṉara ta o soroeke Mosese ko Bazu tu kota ko sikulu pueṉelo eṉe omadeuvo kala mama ta o soroeva jari kala vovo nabulu tu o sikulu puevo voa mama vo meqora. Ni koa Bazu ta ko sikulu pueṉele eṉe ti ko aveaveṉele Jisu kasi, ni vo Jisu o kueva ko tova inio eṉeta sidopu ṉe evake vo Baṉara ko kelokelozato kale eṉeko oqu kale.

²⁵Ni erisaṉa ko oqu ko kalo ta ko ṉelai baroa ni eṉeta pui vo Mosese ko Bazu ko vima ṉe evani ṉela.

²⁶Ni vai oqu kale vo Karisito inio mea kiada mela ta vo Baṉara ko meqora poso mela.

²⁷Ako me bapitaiso me eveni mela vo Jisu Karisito ko saevo kale inio mata omadeu me vati eveni mela ni voko saevo me qoeni mela.

²⁸Ako vo Jisu Karisito omadeu saevo me vati evani mela kale ta puliama koko azavo sole se Jiu mu ni pui Jiu amu, ni puliama koko azavo mabaku ni ruparupasi ala maba, ni puliama koko azavo se rekoreko ni lasive amu, ako mea kiada mela ti omadeuvo vo Jisu Karisito kale sole vo Baṉara ko kelokelozato kale.

²⁹Meta vo Karisito ko mela, sole mea kiada mela inio vo Ebarahami ko vikuvikula kalea mela. Ni mea kiada mela inio me qoani mela vo Baṉara ko sidopu puto, vo Baṉara leveleveo o ikema Ebarahami kasi.