Read Bilua Qelesia 5 Bible Online

Qelesia 5 - Bilua bible

Qelesia 5

¹Vo Karisito o rupasimelo anime tu animeta meqai saevo koa ruparupasi. So sole meta piza kavole lojomo ni pui mata vo Mosese ko Bazu ko mabaku me elou.

²Ni meta didianomo! Aṉa Paula lala, ta eri kiala mekasi, meta me vaitou vo Mosese ko Bazu kale ni me moveilou, ta vo Karisito ta utu ala inio ota elou mekasi.

³Ni mata kama taku aṉata eri kiala kiadama lasive poso mela kasi: Meta meqai zariovou moveilo, ta meta me maba luluekou koa kiadama vo Mosese ko Bazu.

⁴Ni kake mela me meqai zariani mela lulueko vo Mosese ko Bazu, ta meda pitasia inio vo Karisito kasi azo ni meta me epeza tuvevo pueko Baṉara ko roquano kale ama sidopu puto.

⁵Melai eṉeta oqu kale, ni eṉeko tuvevo puto sama kerukeru kale ni vo Tabu ala Auvana ko zuvarato kale inio eṉeta ṉebe tareka vo Baṉara ko sidopu iṉelo eṉe.

⁶Ni eṉe omadeu ṉe evani ṉela Jisu Karisito sase ta ṉe baqumukani ṉela ta pui ko tauveṉela ko moveilo ni pui moveilo tu sidopu elo Baṉara ko kelokelozato kale. Ako qulepo ama quli ta oqu ikio sole, koa oqu ko kasa ko evako roquano kale.

⁷Meta matu uria zio mebeta eve meko vai oqu vo Karisito meko matuma madolo kale, sole lala inio o dokolimele meko lulueko kale ko tuvevo ama keve?

⁸Noni? Vo Baṉara vo o nokaemelani me ta o dokolimele me, kio? Maba pui!

⁹Meta me balauvou! “Ako matu silo pala isiti ta ko rovea rapukiko sole ko palava.” Ni isiti jari inio matu silo pala ruqe ni saruilo ta kokai zaroa pado ama saevo ni kerukeru sole.

¹⁰Melai aṉata avai kerua vo Baṉara ta meta pui mata kama edoloma kerukeru meba luluekou. Ni vo Baṉara ta o koqotaevou voa maba vo niuniala o imelani me, kala obe elou ta.

¹¹A qaka ni visi poso, aṉata pui a nianiiekimani lala se maba madu tu ke moveilo. Aṉata aqai nianiiekata ko moveilo tea, se maba poso ta pui nio kepa lai kaikuapo. Ako so tea, aṉako kai bazubazuto vo Jisu ko vou korosi topi ama ta pui tapata kopa mai elou se.

¹²Soama maba madu seke niumaemelani me ta ama zaria tu kebeta ziovou ko topi tiniavo seko moveilo ni koa ziole ke ruboilou![4]

¹³Melai a qaka ni visi poso, vo Baṉara ta o nokaemele me tu me rupasio. Melai koa meko rupasio ta pui tu meko ruqe ama zario kaqe, melai koko kio ni kalo ta meta tauvekiniomo roquano kale.

¹⁴Ako koa kiadama vo Mosese ko Bazu ta komia omadeu pado Bazu topi ko kiada, ko eri kikolako, “Roquema edolomu omadeuvo ṉo ṉavi ṉo roquiva jari,” kikolako.

¹⁵Melai meta mebeta ziovou niumaniumaekinio ni periperikinio ta mainio meta mebeta maba ruvurou. Meta piru ama biaṉa ko nanaekinia ni ko niamuniamuekiniako jari meda kava sole!

¹⁶Ni aṉata mata eri kiala mekasi. Meta pizatomo kiada keru Tabu ala Auvana kale, nio meta pui meba erekou meko bulo kale ama ruqe ama kerukeru kokai zariako quli.

¹⁷Ako animeko bulo kale ama kerukeru ko ruqe ama zario ta pui ijatinia ko kati eva sole vo Baṉara ko auvana kale ama zario, ni komia omuqa quli ta kota kanaekinia. Sole meta odiziomo Baṉara ko Auvana kale tu pui ereko meko ruqe ama kerukeru kokai zariovo ama quli ereko.

¹⁸Melai meta me zarievou vo Baṉara vo Auvana tu o odiemelou me, so inio kasa ko elou ta meta pui vo Mosese ko Bazu kale me evani mela.

¹⁹Ni animeta meqai nianiia maba ko bulo kale ama ruqe ama kerukeru ko puratikako kalo ta eri ama, zave ni rusurusuavo, pui ko mabuako vailikinio, kovasa,

²⁰beku ko ilusiko, basato, kanaekinio, ketuketuekinio, konoilo, korakorailo, muino kapakapato, pitasikinio,

²¹sebisebito, piza kama ju doilili kai elo ni ruqe ama ṉojolao, ni ereko mata kama soama quli. Melai aṉata a balauvimela me erisaṉa, omadeuvo aṉata a balauvimele ko paloasako taku kale jari, ako seke erekani komi quli ta pui kepa kovou vo Baṉara ko lekasa puo kale ama mauruto sole.

²²Melai vo Tabu ala Auvana o puratikako kalo ta eri ama, roquano, zoleilo, bule, pataito niumaniumato kale, baiseo, uri ama kalo, kerula elo,

²³inobe, ni me ṉaviko aveavezio. Puliama kama bazu ta soama uri ama quli ko kaitika.

²⁴Ni anime vo Jisu Karisito ko maba madu mela ta lula me vaekani mela animeko bulo kale ama ruqe ama kerukeru kokai zariako kalo ni saevo, omadeuvo animeta me batoeka jari koa kalo ni saevo korosi topi.

²⁵Animeta me qoeni mela vairu ama saevo vo Baṉara vo Auvana kale so sole animeta me lulueko vo Baṉara vo Auvana kiolani.

²⁶Ni animeta pui me aikailou, ni pui me niumaekiniou ni pui me qonoekiniou me ṉavio kude.