Read Bilua Qelesia 6 Bible Online

Qelesia 6 - Bilua bible

Qelesia 6

¹A qaka ni visi poso, esa kala me azo ta mevai potou o erekou keru ko saruilo, ta vo Tabu ala Auvana kale me odiziani mela inio me ziovou nio meba tauvevou sidopu puevo. Melai meta me jidopu puevou vo zarazarailo sama keve kale, ni me balauvou, ako me ṉavi melai me ereko kale sole soama saruilo.

²Meta tauvekiniomo meko tapata poso keru. Ni meta so me qalou, inio meta tuvevo avole me zorikou vo Karisito ko bazu.

³Ni kala ta eri kiovou “Aṉata qulepoa lala,” kiovou, melai vota pulia quli maba inio vo, ta ota lipalipata o ṉavi.

⁴Ni vota pui o mati podetiovou edolomu, melai vota o podetikou o ṉaviko kalo, so inio vota okai zoleilou o ṉavi o erekako quli.

⁵Ako kalakala o ṉavi nio o borikou sole o ṉaviko bouro.

⁶Ni meme qoani mela vo Baṉara ko nianiiekato ta puarikomo kiadama uri ama quli kama kena meko nianiiekato ko maba poso kasi.

⁷Meta pui lipalipaito me ṉavi, melai paqumukomo ko eri: meta pui meba roveovou ubeubevo vo Baṉara. Ako vo maba ta ko quli o papakako quli kio mata o kajorikou sole, ni so jari nio o kovou koko besibesi ko quli vo o erekako quli voko saevo kale ama.

⁸Ni vo maba ta o papakou jari voko saevo kale ko quli o ṉaviko zario ko zolekako quli ta ko ikio mata o kajorikou noqola kama tolailo kale. Melai vo o papako ala Baṉara ko Auvana ko zolekako quli voko saevo kale ta o kovou ko noqola kama saevo vo Baṉara ko Auvana kale.

⁹So sole animeta pui me jairozo uri ereko, ako so inio animeta me qovou sole koko epa noqola kama, tutututuki ama taku kale. Sole animeta pui niaba me elo.

¹⁰Ni so keru anime meqai roveovo ama taku kale animeta me dauvemou kiadama maba madu ni me dauvemou matuvole se kevai oquani vo Jisu Karisito.

¹¹Kemoni komia matuma riki erisana a ṉaviko ṉase kale a mela rikiekako![5]

¹²Sea maba madu seke matu madoekani zolizoliemelo me tu meta me moveilo ta ke ereka ko quli tu se Jiu amu ta kemai zoleilo se, tu seta kekai aikailo kupekupe ama quli. Ni seta so ke kava tu seta keta ka lapasou koa koqotailo seke kovo ama Jiu mu kasi, seta kekai bazubazuta tea Jisu ko vou korosi topi ama ko kiada.

¹³Ni seke luluekani moveilo ko bazu melai pui ke lulueka koa pado ama Mosese ko Bazu, melai seta kekai zaria tu meta me moveilo tu meta me luluekou se kikelani ni ke melai raurailou me meko tupu ko moveilo kale avo.

¹⁴Melai aṉata pui aba kai raurailou soama quli, melai aṉata aqai raurailou animevo Lekasa Jisu Karisito ko vou korosi topi ko kiada. Ako vo Jisu ko voukale korosi topi inio komia peuru ma peuru ko utu ama kerukeru ko keve ta kota mela patoi jari anime ni animeta meda ka vovi jari komia peuru ma peuru ko kerukeru.

¹⁵Ako vo Baṉara ko kelokelozato kale vo maba ta o moveilou ma pui o moveilou melai kota pui matuma quli. Melai ko matuma quli ta vo maba ta vairu o elou voko saevo kale Tabu ala Auvana ko pizato kale.

¹⁶Bule ni tauvezato sama roquano ta ko elou se tona seke lulueko amu koa vairu ama saevo ko bazu, ni kiadamu vo Baṉara ko maba madu kasi, ako se inio ko tuvevo ama Izireli qoqono Baṉara ko sole.

¹⁷So sole meta pui mata me qatilou aṉa kama tapata, ako aṉako tupu kale a qoema tabi ko taki ta kasa ko ila aṉa ta aṉata vo Jisu Karisito vo tuvevo ala nabulu lala sole.

¹⁸A qaka ni visi poso, aṉata a melati vararaita me tu animevo Lekasa Jisu Karisito ko pakiezato sama roquano ta ko elou meko saevo kale. Emeni.