Read Bilua Epesasi 3 Bible Online

Epesasi 3 - Bilua bible

Epesasi 3

¹Ni komi ko kio kale inio aṉata a melati vararaita me, aṉa Paula a biriziani lala vo Jisu Karisito vai bazubazuto kale avo tu me pui Jiu amu mela kaqe.

²Ako meta esa lula me viqe vo Baṉara ko katilo aṉa komia koidi voko pakiezato sama roquano kale tu aṉata a dauvemelo me.

³Ni vo Baṉara inio kasa ola ikake voko mutamuta kama vatolo ni o lati nianiiekikake. So inio aṉata silo pala ada ka rikieka koko pesipesi

⁴ni so keru meme ataekou keru ko quli aṉa a rikiekako nio meta me qelou aṉako paqumuko vo Baṉara ko vatolo mutamuta kama ko evema, ko vo Karisito kale kasa ko evema.

⁵Ako lulama taku keru ama maba poso ta pui kepa kai nianiiovi sole koa mutamuta kama vatolo. Melai erisaṉa vo Tabu ala Auvana kale inio vo Baṉara ta kasa o ika koa mutamuta ko evema vatolo se apositolo madu ni se poropita madu kasi.

⁶Ni komi kio koa mutamuta kama vatolo: se pui Jiu amu ta se Jiu mu sate amu vo Baṉara ko mauruto kale, ni sea kiadamu ta omadeuvo ko omadeuma tupu kale ama kata poso jari amu ni ke kovou koa omadeuma leveleveo vo Baṉara o erekema vo Jisu Karisito kale.

⁷Ni vo Baṉara ko roquano sama puaro kale inio vota o puarike komia koidi aṉa kasi, inio aṉata nabulu a eve tu aqai bazutou ko Uri ama Bazu. Ni vo Baṉara inio o katile koa roquano sama puaro o ṉaviko pizato kale.

⁸Ako aṉa inio matu zara kalala sole se vo Baṉara ko maba madu kasi azo. Melai vo Baṉara ta o katilake aṉa komia puaro; vota o katilake komia sake tu aṉa inio amai bazuekoa lala se pui Jiu amu vo Karisito ko aqasiele ama Uri ama Bazu, ko puliala opa roveovo ama podetiko.

⁹Ni vo Baṉara inio o katile aṉa komia iruruputo tu aṉata amai bazuekou kiadama maba madu vo Baṉara ko vatolo ko kavani. Koa mutamuta kama vatolo ta o mutake vo Baṉara koko tanitanila keru azo, vo o erekeni au ni miduku.

¹⁰Ako voko zario ta erisaṉa pado inio kiadama mateana madu ni kiadama ko lekasa puako ziolo poso ta melou vo Jisu ko lotu qoqono, nio kekai nianiiovou vo Baṉara ko nianiio kiadama quli kale.

¹¹Vo Baṉara ta o vatovatoeke komi quli koko tanitanila keru, ni vota o erekake ko vo animevo Lekasa Jisu Karisito kale.

¹²Ni animeko omadeu vati elo vo Karisito kale ni animeko vai oqu kale vo inio animeta zariekato samela tu me zio puliama ṉalo sate vo Baṉara ko tanama kale.

¹³So sole aṉata a basemela me tu meta pui lekuleku me elou ko aṉa kobe lai ereivako tapata ni tolailo ko kerukerueko kale, ako aṉako kai tolailo aṉako melati koidipo me ta meko rauraemelako quli kio sole.

¹⁴Sokale avo inio aṉata a iqeiqea ni a vararaita vo Mama Baṉara kasi,

¹⁵vo o puratikeni ni omai katikeni koko ṉi kiadama toutou ni tamania aukale ama ni miduku kale ama.

¹⁶Ni aṉata a baseva vo Mama, tu vota o katimelou me ko pizato voko matuma ṉaṉaidara kale azo, tu meta me bizatou meko auvana kale voko Tabu ama Auvana kale.

¹⁷Ni aṉata a vararaita vo Karisito tu meta mevai oquvou tu vota o elou meko bulo kale, ni aṉata a melati vararaita me tu meko saevo ta ko pizatou roquano kale ni me rapukou roquano kale.

¹⁸Ni aṉata a vararaita tu me ni mata sea kiadamu vo Baṉara ko maba madu ta me qovou ko pizato tu meqai nianiiovou vo Karisito ko matu aqasiele ama ni palopaloasi ama roquano.

¹⁹Ako vo Karisito ko roquano ta aqasiele ama ni palopaloasi ama, ni maba poso ta pui ke rovea paqumuko ko. Melai aṉata a melati vararaita me tu meta meqai nianiiovou koa voko matu aqasiele ama roquano, tu meta me jukatou vo Baṉara ko saevo kale.

²⁰Vo Baṉara ko pizato koko iruruputako anime kasi ta ko rovea ereko ko kokai paloasako kiadama quli anime me basekako quli ni me qerukeruekake quli,

²¹so sole animeta mevai rauraeko vo Baṉara voko ṉaṉaidara kiada keru voko lotu qoqono kale ni animeko omadeu vati elo vo Jisu Karisito kale, latau ṉaniu ni ka ṉaniu. Emeni.