Read Bilua Kolosi 1 Bible Online

Kolosi 1 - Bilua bible

Kolosi 1

¹Aṉa, Paula lala, Timoti sase, vo animevo visi, aṉata a joroeka komia leta mekasi. Vo Baṉara ta o pitoele aṉa tu aṉata kala apositolo Jisu Karisito vo a elo.

²Aṉata a joroeka komia leta me Kolosi peuru kale amu mela kasi vo Baṉara ko qoqono mela kasi, eṉeko kerula kama tamania kale amu mela, lula omadeu me evani mela vo Karisito sase. Eqeta qe vararaita tu vo Baṉara animevo Mama ta o katimelou ko tauvezato sama roquano ni bule.

³Eqeta qe kativa eqeko uriavo vo Baṉara kiada keru, animevo Lekasa Jisu Karisito vo Mama, so keru eqe qe melati vararaita keru me.

⁴Ako eqeta lula qe viqa meko vai oqu vo Jisu Karisito ni meko roquemo kiadama vo Baṉara ko maba madu.

⁵So keru kulekuleto ko baroi keru ko tuvevo ama ni Uri ama Bazu mekasi, ta me viqe ko quli ko lula ko inainaivako aukale ko me qovo ama koa Bazu kale, kerukeru kale me ikema. So inio meko oqu ni roquano ta lula kota vinaiva meme qerukerueka tu meta me qovo ama quli kale.

⁶Ko Uri ama Bazu ta ko kati kueva ko mauruto ni ko aera peuru ma peuru, omadeuvo kota ko aere jari me tona koa taku keru azo, me kuleto me viqe keru ni me uria paqumuke keru vo Baṉara ko pakiezato sama roquano.

⁷Kota lula meqai nianiiovi vo Epaparasi kasi azo. Vota kala pado eqe kale ala qe matu roquevani nabulu, ni vota ova uria nabuluputani vo Karisito eqeko iruruputo ko tauveko kale.

⁸Vota lula o qelai bazueka eqe meko roquekinio Tabu ala Auvana o katimelako.

⁹Sokale avo inio eqeta qe melati vararaita me vo Baṉara kasi so keru qeta mela viqe keru azo meko bazu, qe paseva tu meta meqai uria nianiiovou voko vatolo kiadama voko auvana kale ama nianiio ni paqumato kale, vo o katimelako me.

¹⁰Eqeta qeka vararaita komi tu meta se Baṉara ko maba madu jaria elo me elou, ni meta me zolevou vo Baṉara kiada keru, ni meta me uria erekou kiadama uri ama quli, ni meta me rapukou meko patapataevo kale vo Baṉara,

¹¹ni meta me bizatou Baṉara kale, koa pizato kale, koko kuevako voko ṉaṉaidara kama pizato kale, ni meta noqola ni vinavina me elou kiadama quli kale zoleilo sase.

¹²Ni meta kativomo meko uriavo vo Baṉara animevo Mama, ako vota lula o malezimela me tu meta me qovou meko kena koa uri ama quli ko lula ko inainaivako tu voko maba madu mela kaqe vo Baṉara ko zakaremu kale me evani mela.

¹³Baṉara ta o pakiemele anime kutumana ko pizato kale azo ni o amaqimele anime vo o matu roquevani Meqora ko lekasa puo kale,

¹⁴vo o rupasimeleni anime, voko tamela akoeko kale animeko sarueko poso.

¹⁵Karisito inio vo kasa o ivani vo mutamuta kala Baṉara ko kalo anime kasi, vo lula o eveni Meqora puliako peuru ma peuru ereilo, vo raura kala kiadama vo Baṉara o erekema quli kale azo.

¹⁶Ako vokale kude inio Baṉara ta o ereke kiadama quli aukale ama ni miduku kale ama koko keazaivako vilu kale ni pui ko keazaivako quli, ko piza kama auvana poso, ko auvana lekasa poso, ni vailo ko auvana poso, ni kiadama auvana ko pizato poso. Baṉara ta o ereke kiadama quli vokale tu vo kaqe.

¹⁷Karisito ta o eve puliako ereilo kiadama quli, ni kiadama quli ta noqola korokoroti ko eve vokale kude.

¹⁸Vo inio koko lezu voko lotu qoqono, ni vo inio koko raki koko saevo, vo inio vo kuleto ala vo o saeveni voukale azo, tu vo o kiada ta raura o elo kiadama quli kale azo.

¹⁹Ako o ṉavi Baṉara ko vatolo kale inio pado ama voko saevo ni kalo ta Karisito tona ko eve.

²⁰Vo Meqora kale kude inio Baṉara ta o pitoeke tu kiadama maba poso ni kiadama quli vo o erekema ta odouvato saṉa ke elo vokasi. Baṉara ta o ereke ko bule vovo Meqora ko voukale korosi topi, tu kiadama miduku kale ama ni aukale ama quli ta odouvato saṉa ko elo vokasi.

²¹Lulavo, meta meda pitasiovi Baṉara kasi azo, ni kana me eve, meko ereko kale koa ruqe ko meme qerukeruekema,

²²melai erisaṉa vovo Meqora ko tupu kale ama voukale Baṉara ta lula o daipaemela o ṉavi tona. Vota soa daipaemelo o eva, tu vota tabu o imelo me ni bulebule ni sarueko pide o imelo tu o amaqimelo voko tanama kale.

²³So sole meta vinavina tuvevo puekomo ko Uri ama Bazu tu pizaka lojomo ni pui epeilo kerukerueko koa uri ama quli meme qovo ama ko lula meme viqema Uri ama Bazu kale, koa Uri ama Bazu aṉa Paula lala aqai iruruputako tu aqai bazuto kiadama maba kasi.

²⁴Komia taku aṉata a doraeka ko tapata ni tola meko tauvemelo kale avo, melai aṉata ada zoleiva ako aṉako tolailo ta kokai zomana okotiko vo Karisito ko tola, ko vo o lainikema voko tauvemelo kale anime vo Baṉara ko maba madu mela.

²⁵Aṉako ka nabuluputo ko lotu qoqono ta lula Baṉara olai pitoekema aṉa tu a dauvemelo me aṉa kai bazubazuto kale pado ama vo Baṉara kasi azo ama bazu.

²⁶Koa bazu ta mutamuta kama ko eve; Baṉara ta ota ma mutake sea kiadamu lulavo ke eveni kasi, melai erisaṉa vota uria kasa o ika voko maba madu kasi.

²⁷Kota vo Baṉara ko zario tu kota uria kasa ko elo voko maba madu kasi, se kiadama peuru ma peuru kale ama qoqono poso kale amu, koa bazu lulavo mutamuta kama ko evema, ko qulepo ama ni ṉaṉaidara kama. Komi kio koa bazu: vo Karisito ta o eva meko saevo kale, ni Sokale avo meta me uria vakakuka ta meta meqai zomanou pado ama vo Baṉara ko ṉaṉaidara ni mauruto.

²⁸So sole eqeta qevai bazubazuta vo Karisito kiadama maba madu kasi, ni eqeta qe balauvima kiadama maba madu ruqe ama keve poso kale azo, mai nianiiekiko kale kiadama raura kama nianiio. Eqeta qe ereka ko, ako eqeko zario ta kiadama maba se omadeu ke evani Jisu Karisito sase ta uria muqaro ke elou, so keru eqe kasa qe imou keru se Baṉara ko vilu kasa.

²⁹Aṉata a matu iruruputa tu a ereko koa iruruputo ni a matu madoeka vo Karisito ko pizato kale ko aṉa ko matu pizatilako.