Read Bilua 2 Tesalonaika 2 Bible Online

2 Tesalonaika 2 - Bilua bible

2 Tesalonaika 2

¹Aṉata aqa zaria mela bazueko me vo animevo Lekasa Jisu Karisito ko vaito ni voko odiemelo anime tu me badoilo vokasi kio kale avo. Aṉata a basemela me a visi poso ni kaka poso mela,

²tu meta pui kapiavole niuniala me elou meko kerukeru kale ni pui tiṉoliṉoli meqai elou kama lipalipa kama bazu. Ako kake ta keta lipata ni eri kikela, eṉeta ṉeqai bazuta vo Tabu ala Auvana ko avozio kale ma eṉeko bazubazuto kale ma kama leta kale, ko animevo Lekasa Jisu okai vaitako Ṉaniu ta lula inio kota baroi kio sama bazu.

³Meta pui zarievo kala tu vota o lipaemelo kama keve kale, ako koa Naṉiu ta pui erile kopa barolou sole, melai kota ko kilou kuleto kubo madu ke matu bikoirivou keru vo Baṉara ni o puratou keru vo matu ruqe ala maba, vo noqola tolailo o elo ala heli kale.

⁴Vota o matu kanaevou vo Baṉara ni o ṉavi ta ota rauraraurailou kiadama quli maba poso baṉara ka kikelako quli azo. Ni vota o amaqeovou komia miduku kale ama Jelepade vo Baṉara ko kale ni o papuvou sai tu okai rairiziovou ta vo inio vo Baṉara.

⁵Meta pui me qerukerueka komi quli kio? Ko ikio aṉa lula a melai bazuekema quli so keru aṉa a eve keru mekasi.

⁶Melai ikoana voko tizaevako quli tu voa matu ruqe ala maba ta pui opa puratou erisaṉa, ni meta mebe paqumuka loma ikio ko ko. Vo Baṉara ko korotoma taku kale inio voa ruqe ala maba ta kasa o elou.

⁷Ako mutamuta kama ta lula kota ereiva ko ruqe sole, melai ikoana voko tizaevako voa matu ruqe ala maba. Ni kota ko tizaevou ti kobeta barolou koko taku tu ko epezou.

⁸So keru inio voa matu ruqe ala maba ta o puratou ni animevo Lekasa Jisu ta o vouvaevou vo voko suto kale azo ama kozakoza kale ni vota o niumaevou vo koa ṉaṉaidara vo o kati kilo ama kale.

⁹Voa matu ruqe ala maba ta o kilou vo Setani ko pizato sase ni vota o erekou kiadama lipalipa kama urikato ni aqasiele ama iruruputo tu o lipalipaemo maba poso ni vota Baṉara jaria kerukeruevo ke elou,

¹⁰ni vota okai iruruputou kiadavo ama lipalipato se noqola tolailo ke elo amu tona. Seta noqola tolailo keta elou ako seta pui ke baroekika ko tuveano nio vo Baṉara ta pui opa pakiemou se sole.

¹¹So sole vo Baṉara ta oma soroeka ko saruilo sama kerukeru tu kokale seta ke tuvevo pueko voa matu ruqe ala maba ko lipalipa kama quli.

¹²So inio se pui ke tuvevo puekani Baṉara ko tuveano ni lula kekai zoleivani seko boutare ta ke titiziovou muli.

¹³A visi ni kaka poso, animevo Lekasa o roquemelani mela, eṉeta ṉe ilusiva vo Baṉara kiada keru mekale avo, ako so inio koko male sole. Ako vo Baṉara ta lula o pitoemele me peuru ma peuru ko tanitanila keru azo tu meta me bakio Tabu ala Auvana ko pizato kale, tu kota voko tabu ama maba poso ko imelo meko kai oqu kale voko tuveano.

¹⁴Baṉara ta lula o nokaemela me koa Uri ama Bazu kale ko eṉe lula ṉeqai bazutako mekasi; ni vota lula o nokaemela me tu meta me zomanou kovo vo Lekasa Jisu Karisito ko ṉaṉaidara.

¹⁵So sole me, ṉe visi ni kaka poso mela, meta pizaka lojolo emo ni noqoekomo ko tuvetuve ama quli ko eṉe lula ṉe melati nianiiekikako me, eṉeko bazubazuto kale, ni so jari eṉeko rikito kale.

¹⁶Ni eṉeta ṉe melati vararaita me, o ṉavi animevo Lekasa Jisu Karisito kasi, ni Baṉara animevo Mama kasi, vo o roquemeleni anime, ni voko pakiezato sama roquano kale o katimeleni anime noqola kama zuvarato ni piza kama bokero tu animeta meqai keru voko leveleveo.

¹⁷Eṉeta ṉe melati vararaita tu vota o zuvarimelou me ni o pizatimelou me, tu mebe erekou ni mebe kasekou ko uri ama quli kiada keru.