Read Bilua 1 Timoti 5 Bible Online

1 Timoti 5 - Bilua bible

1 Timoti 5

¹Pui riqaevo kala qole ala maba, melai ṉota ṉovo mama jaria kerukeruevo eve vo tu baise ama pesio kale vai titiovi vo. Ni ṉo visi poso jaria roquemo ni mati vailo eve se vairu ama maba madu,

²ni se qole rekoreko poso ta ṉo niania poso jari, ni se vairu ama rekoreko poso ta ṉo jaqi poso jaria roquemo ni mati vailo eve kiadama ṉoko bulebule ama kalo sate.

³Ṉota bazuema saizama lotu qoqono tu seta keta ma paṉaovou ni ke tauvemou se reko naboko poso se ojolou elo kebeta evani.

⁴Melai kama naboko ta meqora sama ma mabuzu sama ko elou ta sea meqora ni mabuzu poso ta ke paqumukou ni ke erekou seko lotu ko mati soruekako iruruputo tu ke tauvemou seko saidi kale amu ni ke besiekou koa tauvezato seke koema lulavo seko mama ni niania ni taite poso kasi, ako komi kio vo Baṉara okai zoleivako sole.

⁵Koa naboko koko kiada pado, ko puliala o kati vailako, ta ko noqoiva vai keru vo Baṉara, ni kota ko vararaita ipu ni ṉaniu koko paseko kale voko tauvezato.

⁶Melai koa naboko koko pauvezatako ta kota lula kota vouva jari so keru ko kobeta saeva keru.

⁷Ṉota mai bazueka saizama lotu qoqono komia bazu poso tu puliala se azo ta kuiripato saṉa o elou.

⁸Melai voa maba vo pui o mati vailani voko mabamu, ta o vaekani nio ko lotu saevo, ni vo pui oma lilitani voko saidi kale amu ta kala matu ruqe ala maba, vo omai paloasani se kutumana kamu koa voko ruqe ama kalo kale.

⁹Pui sea kiadamu naboko poso inio lotu qoqono ke mati vailo amu, melai sea naboko poso se varimuja toni sabere lula kekai baroani, ni se omadeu taku pala ke roroteni,

¹⁰ni se kota ma kaseivani seko uri ama iruruputo poso, ni seke mati uria vailani seko meqora poso, ni seke baroekimani se edolomu seko pade kasi, ni se keta ma panaovani ti kema koidipani seke luluevani vo Karisito, ni se lula ke tauvezatani tapata keru, ni se dikidauputole ke erekani kiadama uri ama iruruputo. Se ke kiada inio.

¹¹Melai lotu qoqono ta pui ko mati vailou se vairu ama naboko poso, ako so keru seko tupu kale ama zario ko ajoema keru seta keka zaria tova roroto, ni seta kuiripato saṉa keta eva seko pui lulueko kale seke erekema leveleveo. Koa leveleveo kale inio seta keva nabuluputou vo Karisito pado ama seko taku kale ka kikevema. Ni seta ke vaekani seko oqu ni seta kekai nianiia ko taku ko niumaeko seko pade azo pade kalo kale, ni koko topi tiniavo ta seta ko maba kekai pesiani rekoreko keta eva ni seta utu ato ke evani edolomu ko iruruputo kale, ni kekai pesiani ko pui seko quli tu kai pesio.

¹⁴So sole aṉata aqa zaria tu se vairu ama naboko poso ta ke roroto, tu seta meqora saṉa ke elo, ni ke uria ereko seko pade kale ama iruruputo, tu animeko kana poso ta ke tizailou ni pui ke roveovou ruqe kasemelo anime.

¹⁵Ako kake naboko poso ta lula ke vaeka ko oqu ni ke lulueva vo Setani sole.

¹⁶Sole koko raki komia bazu ta ko lotu reko ko kama reko naboko poso sama koko saidi kale, kota ko mati matu vailou tu pui matu riteraite ke ikou ko lotu qoqono. So inio ko lotu qoqono ta ko mati vailou se reko naboko poso ke kiada saevo kebeta evani kiada keru.

¹⁷Se lotu tanatanamu seke uria erekani seko odikato ko iruruputo ta ke male tu seta ke uria kerukeruilou ni ke kovou ko uri ama tabara. Ni kota ko matu suirima se kekai mumuasa puivani ko bazubazuto ni nianiiekato.

¹⁸Ako eri nio kikolani ko Tabu ama Riki sole, “Ṉota pui taka mukieko ka pado bulumakau ko suto tu pui ko vuato so keru ṉo ṉoqai iruruputou keru ko tu kai lojo ko vuiti ko rurururu,” ni “Vo iruruputo ko maba ta o tabariovou,” kikola.

¹⁹Ṉota pui tava viqo kala maba vo ovai kuirikani vo lotu tanala ko ruqe, ko pui omuqa ma zouke maba sase ko roveako tuvevo puilo.

²⁰Melai ṉota riqaema se lotu tanatanamu vaki ale seke erekani ko sarueko, tu sea kiadamu ta ke balauvo.

²¹Aṉata a bazueṉa ṉo vo Baṉara ni Jisu Karisito ni tabu ama mateana madu ko tanama kale tu ṉota zorika aṉa kialani ni ṉota riqaeva ubutiania voa lotu tanala vo o saruekani ṉovo uri ala lolo obe elou melai.

²²Pui jijiro vai iviko ṉoko ṉase kala maba, tu tabu ivo vo Jisu va nabuluputo kaqe. Pui kai zomano ereko edolomu ko sarueko, melai ṉota rurubiatana saevo eve.

²³Ṉota pui ju ko kiada nozueko, melai nozueka silo pala vaini tu kota ko tauveko ṉoko siapa ni ko tauveṉo ṉo ṉoko vereverepaito kale.

²⁴Kama maba poso ko sarueko ta ko uria keazaiva, ni seko sarueko poso ta ko mati ola se titizato kale, melai kake ko sarueko ta kasa ko elou tova.

²⁵Ni so jari nio ko uri ama kalo ta kasa ko eva, ni koa uri ama kalo ko erisaṉa ko mutaivako, ko melai pui noqola mutailo kopa elou.