Read Bilua 2 Timoti 3 Bible Online

2 Timoti 3 - Bilua bible

2 Timoti 3

¹Mata komi ta ṉo uria kerukeruekou: kama tapata kama taku poso ta kota elou komia peuru ma peuru ko paitopaito kale ama taku kale.

²Ako koa taku kale maba poso ta ke ṉavi ke kerukeruilou, ni ke vailivailikou ko takula, ni ke aikailou, ni ke rauraraurailou; seta keta ruqe pesiovou, ni pui kepa zorimou seko mama ni niania poso, puliama seko kaseko seko uriavo, ni seta Baṉara ko bazu ke bikoirikani maba madu;

³seta puliama roquano samu, ni odouvo pide amu, se kekai pesiani ko maba, ni pui ke uria odiziani ke ṉavi, seta niumaniuma kamu, ni kekai kideipani ko uri;

⁴seta pui kerula kamu, ni puliako kerukeruto ke erekani ko ruqe, utu aikailo ko maba madu, ni ke roquekani ko utube ama zoleilo ko quli vo Baṉara ko roquevo kale azo;

⁵seta ke noqoekou ko lotu ko kupekupe ama iruruputo, melai seta ruqe keta ka ikou koko tuvevo ama pizato. Ṉota tama papariovi soama maba poso.

⁶Kake sea maba poso ta ke olaolaita maba poso ko pade kale ni ke lipalipaema se pui uri ama lezu sama rekoreko poso se duki amu seko sarueko poso ko kuiripato kale ni seke saruivani seko lulueko kale kubo azaazama vatolo poso.

⁷Sea rekoreko ta kiada keru keka zariani viqo kama vairu ama nianiiekato melai seta puliako keru kepa paqumuko amu ko tuveano.

⁸Omadeuvo Jenisi ni Jaberesi[1] qo ivevoa tizaevo vo Mosese jari, so jaria tizaeko inio nia maba poso ke evani ko tuveano, se sarube ama kerukeru sama maba madu se kekai lipalipaitani ko oqu.

⁹Melai seko ruqe ama iruruputo ta pui puṉazo kopa ziovou, ako kiadamu ta ke nianiiekou seko sarube puto sole, omadeuvo koko ereima jari nioqa Jenisi ni Jaberesi kasi.

¹⁰Melai ṉota lula ṉo qeveni ṉa aṉako nianiiekato, aṉako kalo, aṉako saevo kale ama zuato, aṉako oqu, aṉako inobe, aṉako roquano ni aṉako pataito,

¹¹aṉako toraeko ko naqunaquto ni aṉako tolailo sama upotuqu. Ṉota ṉobe paqumuka kiadama koko ereima quli aṉa kasi sai Anitioko, Aikoniami, ni sai Lisitara peuru poso kale, koa matu ruqe ama niumaniumato poso ko aṉa ko tolaelema! Melai vo Lekasa Jisu ta o pakiele aṉa koa kiadama tapata poso kale azo.[2]

¹²Ako kiadamu seke madoekani tu ke uria luluevo vo Jisu Karisito seko sidopu ama kalo kale ta ke toraekou ko naqunaquto,

¹³ni se ruqe ama maba madu ni se lipalipa kamu ta matu ti matu ruqe avo ke kalou, ni seta ke lipaemou se edolomu ni ke lipailou ke ṉavi.

¹⁴Melai ṉo ṉavi ṉota pizaka noqoeka koa tuveano ko lula ṉo ṉoqai nianiiako ni ṉo matu tuvevo puekako. Ako ṉota ṉomai nianiia sole sea kerula kamu se kekai nianiiekiṉeni koa tuveano,

¹⁵ni so keru ṉo siloa laṉa keru azo ṉota lula ṉoqai nianiiovi ko Tabu ama Riki poso, koko roveako kasa ṉa iko koa keve, koko pakieṉo ama ṉo Jisu Karisito vai oqu kale.

¹⁶Kiadama Tabu ama Riki poso ta vo Baṉara ko vatolo kale inio ko rikiziovi, ni kota piza kama iruruputo ko lomaloma Baṉara ko tuveano kai nianiiekato kale. Ni koa Tabu ama Riki poso ta ko riqaeka ko lipalipato, ni kota ko sidopu pueka ko sarueko poso, ni kota ko puarika ko bazubazu sidopu ama elo ko.

¹⁷So inio koa Tabu ama Riki poso kale vo maba vo ova nabuluputani vo Baṉara ta o kovou koa bokao poso tu vota o ereko kiadama uri ama iruruputo.