Read Bilua Pilimone 1 Bible Online

Pilimone 1 - Bilua bible

Pilimone 1

¹Aṉa Paula lala, aṉa pirito pade kale a evani lala aṉako va nabuluputo vo Jisu Karisito kale avo, animevo lotu visi Timoti sase, ta a rikita ṉokasi aṉavo baerebaere Pilimone ṉa kasi, ṉo aṉa jaria nabuluputo ṉova evani ṉa vo Baṉara.

²Ni aṉata a qaseka aṉako roquano sea lotu qoqono kasi seke padoivani ṉoko pade kale, ni so jari aṉako lotu visi Apia kasi ni vo Akipasi kasi, vo anime jaria parania nabuluputo o evani.

³Ni aṉata a vararaita, tu vo Baṉara animevo Mama, ni vo Lekasa Jisu Karisito ta qo katimelou ko pakiezato sama roquano ni bule.

⁴A baerebaere Pilimone ṉa, kiada keru aṉa a vararaita keru aṉata a qaseṉa ṉo ni a qativa ko uriavo aṉavo Baṉara.

⁵Ako ada ṉa viqa ṉoko roquemo kiadama Baṉara ko maba madu ni ṉoko vai oqu vo Lekasa Jisu sole.

⁶Aṉako vararaito ta ṉoko oqu ko puratikako tauvezato sama roquano ta ko pizatou ṉoko uria paqumuko kale kiadama mauruto ko anime me qoako animeko omadeu vati elo kale vo Karisito.

⁷A baerebaere ṉa, ṉoko roquano ta ko matu zolela ni ko zuvarila aṉa, ako ṉota lula ṉoda ma zoleka kiadama vo Baṉara ko maba poso ko bulo sole.

⁸So inio aṉata ada roveo nio sidopu avole katiṉo ko piza kama bazu, tu ṉota ereka ko quli uri ama quli, ako vo Karisito ta o katila aṉa koa pizato tu soa bazueṉo a elo.

⁹Melai aniqeko roquekinio lotu kale ama ko kio kale aṉata pui bazu aba katiṉou, melai aṉata paseto ikio a ereka ṉokasi. Aṉa Paula lala, kala qoleqole lala ni a biriziani lala vo Jisu Karisito va nabuluputo kale avo,

¹⁰ta a ereka komia paseto ṉokasi vo Onesimasi kaqe. Vota aṉavo maba meqora jari ala Karisito kale, ako aṉa pirito pade kale abeta eva keru inio aṉata a odieve vo Karisito kasi sole, nio aṉata vovo mama jari a eveni lala.

¹¹Kuleto vota puliama tauvezato sala ṉokasi, melai erisaṉa vota kala uri ala tauvezato ota eva ṉo ni aṉa kasi.[1]

¹²Erisaṉa aṉata a vaitoeva vo ṉokasi, ni aṉata a matu roqueva vo, o vaela aṉa sole.

¹³Aṉata ava zario nio tu koi obeta elou aṉa kasi, vo ṉovo besibesi o roveovo ala tauvelo aṉa, so keru aṉa abeta eva keru koi pirito pade kale aṉako kai bazubazuto ko Uri ama Bazu ko kio kale avo.

¹⁴Melai aṉata pui aqa zaria tu aṉako noqoevo vo ta ko zuruzurueṉo ṉo tu ṉota ṉo dauvelou aṉa. Aṉata aṉa zaria ṉo tu ṉo erekou ko ṉo ṉaviko vatolo kale sole. So inio aṉata pui aba erekou kama quli ko ṉo pui ṉoqa zariovo ama.

¹⁵Esa vo Baṉara ta vaṉa ota ṉa ive vo Onesimasi ṉokasi azo puju ama taku kale pala, tu kokale ṉota mata noqola ṉeamuvo ṉo elou vo.

¹⁶Ako erisaṉa ta vota pui kala mabaku ala pala inio sole, melai ikoana vokasi ko kokai qulepako voko mabaku elo: vota anime Karisito ko tamania mela kale ala. Vota matu qulepo ala aṉa kasi, ni maba matu ti matu qulepo ala ṉokasi, voko mabaku elo kale melai, voko Lekasa ko tamania kale elo kale melai.

¹⁷Ṉota ṉo baqumuka ta aniqeta omadeuma iruruputo qe erekani qela kio, so sole ṉota baroekiva vo omadeuvo aṉa ṉoṉo baroekilou jari.

¹⁸Esa vota o sarueke kama quli ṉokasi ma lipulipu oṉai ike ṉo kama quli, ta aṉako tava ika.

¹⁹Keatini, aṉata a rikiekou komi a maba ṉaviko ṉase kale: Aṉa, Paula lala, inio a dabariṉou ṉo. (Aṉata pui aba ṉai kerukeruekou ṉo ko aṉa kasi ṉo erekako lipulipu, koa ṉoko vairu ama saevo Karisito kale ama aṉako bazubazu kale ṉo qoema.)

²⁰So sole a baerebaere ṉa, ṉota uri ala tauvezato la eve aṉa animevo Lekasa va nabuluputo kale, ni ṉota zoleka mata aṉako bulo!

²¹Aṉako ṉai keru kale inio aṉata a rikieka komi, ako aṉata aqai nianiia ta ṉota ṉo erekou ko quli aṉa a basekako quli, ni mata koko topi tiniavo ṉota ṉo erekou ko aṉa pui a basekako uri ama quli.

²²Ni mata kama pado quli, ṉota la inainaeva aṉa kala pado lose, ako aṉata aqai kerua ta vo Baṉara ta o opatikou kiadama meko vararaito tu aṉata a vaito mekasi.

²³Vo Epaparasi, vo aṉa sase obeta evani pirito pade kale voko Jisu Karisito va nabuluputo kale, ta o soroeka voko roquano ṉokasi,

²⁴ni so jari aṉako tauvezato ko maba poso Maka, ni Arisitakasi, ni Dimasi, ni Luke.

²⁵Ni aṉata a vararaita tu vo Lekasa Jisu Karisito ko pakiezato sama roquano ta ko elou mea kiada mela tona. A baika.