Read Bilua Hiburu 1 Bible Online

Hiburu 1 - Bilua bible

Hiburu 1

¹Lulavo, vo Baṉara ta o pesiovi kubo taku animeko taite poso kasi ni kubo keve kale se poropita madu kale kude,

²melai komia tovatovama taku kale vota o pesiovi anime kasi vovo Meqora kale kude. Vokale kude Baṉara ta o ereke peuru ma peuru, ni vo inio vo Baṉara o pitoeveni tu lekasa oka elou kiadama quli Baṉara o erekema quli.

³Vo inio o puratikeni vo Baṉara ko ṉaṉaidara ko zararamana ni vo inio vo Baṉara ko maba ereere o eveni, ni voko piza kama pesio ta ko kati taliovou ko peuru ma peuru. Vota o vovi tu o puratiko maba madu ko sarueko poso ko akoekato. Koko tova, vota o papuake raura kama zaekale Baṉara ko palo rana vasia rana aukale, tu o lekasa puo, vo Raura kala ni Piza kala kasi.

⁴So sole vo Baṉara vo Meqora ta raura o evake se mateana madu kasi azo, omadeuvo vo Baṉara o kativema raura kama ṉi ta kokai paloasa seko ṉi poso.

⁵Ako vo Baṉara ta maba pui eri pa kiove kala pado vovo mateana kasi, “Ṉota aṉavo Meqora ṉa; vairutu aṉata a bazueṉa ṉo, ta aṉata ṉovo Mama lala.” Ni Baṉara ta pui opa kaseke kala mateana kale avo, “Aṉata vovo Mama a elou, ni vota aṉavo Meqora o elou,” kio.

⁶Melai so keru Baṉara o soroeve keru vovo pado Meqora[1] peuru ma peuru kale, vota eri kiolake, “Kiadama vo Baṉara ko mateana madu ta ke ilusivou vo,” kiolake.

⁷Se mateana madu kale avo Baṉara ta eri kiolake, “Aṉa Baṉara lala ta ururu a ima aṉako mateana poso, ni urusana a ima aṉako nabulu poso.”[2]

⁸Melai voa Meqora kale avo ta eri kiolake vo Baṉara, “Baṉara, ṉoko lekasa puo ta noqola ko elou latau ṉaniu ni ka ṉaniu! Ṉota ṉo mati vaila ṉoko maba madu sidopu kale.

⁹Ṉota ṉo roqueka ko sidopu, ni ṉoqai kideipa ko sarueko. Sokale inio aṉa ṉovo Baṉara lala ta a bitoeṉe ṉo ni aṉata a qatiṉe ṉo raura kama raurailo ko zoleilo kokai paloasako ṉoko baerebaere poso a qatimema.”

¹⁰Ni vota mata eri kiolake Jisu kale avo, “Ko tanitanila kale Lekasa ṉa ta ṉo ereke ko miduku, ni ṉoko ṉase kale ṉota ṉo ereke ko au.

¹¹Ko quli poso ta kota ruvurou, melai ṉota noqola ṉo elou; Ko quli poso ta suma jaria rotizio kota elou.

¹²Ṉota tana kama sabosabo jaria pokopokoeko ṉo elou, ni kota suma jaria besizio ko elou. Melai ṉota kiada keru pui ṉo besiziani ṉa, ni ṉota noqola kalaṉa kiada keru.”

¹³Baṉara ta maba pui eri pa kiove kala vovo mateana kasi vovo Meqora kasi kiovevo jari: “Papi koi aṉako palo rana vasia rana ti kobeta barou ṉoko kana poso aṉa ṉoko kiti iviivi a imou keru.”

¹⁴Sole loma madu inio se mateana madu? Sea kiadamu inio se auvana madu se keva nabuluputani pala vo Baṉara ni ke Soroini vokale tu ke tauvemo seke koani ko pakio.