Read Bilua Hiburu 11 Bible Online

Hiburu 11 - Bilua bible

Hiburu 11

¹Oqu saṉa elo ta kai nianiio animeko ṉeamuko ko quli anime meqai keruako tu me qovo, ni kota kai nianiio ta tuvevo ama quli kio ko anime pui me qeako quli.

²Ako oqu kale inio lulavo se lulamu ta ke zoleve vo Baṉara.

³Oqu kale inio animeta me baqumuka ta Baṉara inio o ereke ko pado ama peuru ma peuru o ṉaviko pesio kale kio nio me qeako quli ta ko erei ko pui me qeako quli kale.

⁴Oqu kale inio vo Ebolo, Adami vo visi ala meqora, ta o kativake vo Baṉara ko siqasiqa Keini vovo kaka ko siqasiqa kokai paloasako. So sole Baṉara ta ova zoleike voa maba ni vota ova nokaekake sidopu ala, ako vota o tuvevo puevake vo sole. Baṉara ta zakaremu o ike ko anime kasi ako vota o baroekike koa katizato poso Ebolo o kativema vo sole. Voko tuvevo puto kale, Ebolo ta obeta pesia jari erisaṉa anime kasi, vota ota vovi melai.

⁵Oqu kale inio Inoke ta pui opa vovi, melai Baṉara ta o koivieve vo saevola aukale. Puliala ta mata opa veve vo, ako Baṉara ta o koivieve vo aukale sole. Tabu ama Riki kikolani ta puliako Inoke vati koilo, vota o zoleve vo Baṉara.

⁶Puliala maba ta o rovea zolevo vo Baṉara oqu pide ala, ako vo oka zariani kilo Baṉara kasi ta o tuvevo puevou vo Baṉara ta inevoana, ni o tuvevo puekou ta vota reketekete saṉa o imani seke vailivani vo.

⁷Oqu kale inio Noa ta o viqake Baṉara ko balauvato sama pesio, so keru vo ovai bazueke keru ko nioqololo koko kilo ama ko vo pui vima sase opa kevema. Vota o zorivake vo Baṉara ni o erevake kala matula vaka sai vo ni voko saidi ke pakiovikoi. So sole vota kasa o ikake vo Baṉara ko titizimo sea so keru ama peuru ma peuru kale ama maba madu seko ruqe ama kalo kale avo, melai vo Noa ta o koe vo Baṉara ko sidopu, vota oqu sala sole.

⁸Vo Ebarahami ta ovai oqui vo Baṉara ni vota o zorive vo so keru vo Baṉara o nokaeve keru tu vota o tanito talio tu o zio kama pado peuru kale vo Baṉara o kativo ama ka kiolako tu vota o ṉeamuko ko. Vota o vaekake voko ṉisa peuru kai nianiio pideakoi sai vo o ziovoa koi ka kiolakoi.

⁹Oqu kale inio vota kala pakepakeo maba jaria elo o evake koa miduku kale vo Baṉara lula ova kasekema tu kota voko leveleveo ko elou. Vota o evake tepe pade poso kale, ni Aisake ni Jekopi melai soa elo qo eve, vo Baṉara lula oka kasekeni nioqa koa zae tu nioqa melai qo ṉeamukou ka kioveni nioqa.

¹⁰Ako vo Ebarahami ta o tarekake koa peuru aukale ama vo Baṉara uria ereko o evema, koa vinavina vola kama peuru.

¹¹Oqu kale inio Ebarahami ta o roveake kala mama elo vo lula matu qole ala keru ni voko reko Sera melai padu ama keru, vota ovai oqui sole vo Baṉara, vo ova kasekeni voko leveleveo.[10]

¹²Koa taku keru vo Ebarahami ta lula matu qole ota evake ni sipole ota vou kiolake melai vikuvikula poso koko tanitema voko qole ala keru azo ama ta omadeuvo aukale ama suti poso ko kubo jari ko evake, ni omadeuvo ko keta kale ama karokoni ko kubo jari, ko pui ko roveako atailo.

¹³Kiadama sea qole ama maba poso ta kevai oqui vo Baṉara ti kobeta baroi seko saevo poso ko paito keru. Seta pui nio ke koake vo Baṉara oma inainaekema quli, melai seta ke gelekake vaṉʼazo ni keka zoleike, ni seta pui keta ka kamiziake maba madu kio, se puliama zae samu komia peuru ma peuru kale.

¹⁴Seko so kio kale ta ke uria kaseka ta seta kebe madoekake tu kelo kama pado zae tu ke ṉisa peuru kaqe.

¹⁵Seta pui kepa kerukerueke koa zae ko seke vaekema. Ako seta viluloqu kekai eve ko tea, seta keta vaito inio mata sai.

¹⁶Melai koa qulepo ama peuru seke zuatikema ta aukale ama peuru. Sokale inio vo Baṉara ta ota zoleiva tu seta ke kasevo vo ta vota sevo Baṉara, ako vota lula o inainaeke kama pado zae tu se kaqe sole.

¹⁷Oqu kale inio Ebarahami ta siqasiqa kaqe o ivo kiolake vovo meqora Aisake so keru vo Baṉara o madoeve keru vo Ebarahami. Ebarahami ta kala pado maba vo Baṉara lula o kativeni ko vario ko leveleveo, melai vota o inainaoke tu vota ovai ereko ko siqasiqa vovo pado meqora kiolake.

¹⁸Baṉara ta lula eri kiove vokasi, “Vo Aisake kale kude inio ṉota ṉo ṉeamukou koa vikuvikula ko lula aṉa aṉa kasekema tu a qatiṉou ṉo,” kiolake.

¹⁹Melai vota o zarievake vo Aisake tu siqasiqa o ivo, ako Ebarahami ta ovai oquake vo Baṉara, ta vota ota roveovou saevivo vo Aisake voukale azo kiolake sole. Ni koa keve kale Ebarahami ta o voake vo Aisake voukale azo jari.

²⁰Oqu kale inio Aisake ta mauru o ikake Jekopi ni Isoa nio eri kiolake, “Baṉara ta o erekou ko uri qekasi ko kilo ama taku kale,” kiolake.

²¹Oqu kale inio Jekopi ta mauru o ikake vo Josepa ko lasive meqora kidi sipole o vou kiola keru. Vota o zukaidake voko daṉa topi ni vota o ilusivake vo Baṉara.

²²Ni vo Josepa ta mata kala vo ovai oquini vo Baṉara, nio puliako vo vou vota o kasekake se Izireli amu ke kalo avo saqoro Ijipi peuru kale azo, ni mata voko oqu kale vota omai bazuekake tu seta ke borikou ni ke kati ziovou voko piza poso seke vaekou keru ko Ijipi peuru.

²³Oqu kale inio Mosese ko niania ni mama ta qo mutavake vo Mosese zouke kaboso tiniavo o alile keru azo. Nioqata qo veake vo ta kala ileile ala meqora, ni nioqata pui qota ka ṉake bikoiriko vo Ijipi ala aikovakova ko bazu Izireli amu ko lasive meqora poso ko vouvaemo ko kasekako.

²⁴Oqu kale inio so keru Mosese o rapuke ni matu o eve keru ta ota kai lupaovi tu vota vo Ijipi ala aikovakova ko taiza meqora vo meqora va kio.

²⁵Vota o pitoekake tu vota o zomanou tolailo vo Baṉara ko mabamu sate, ko kobe kai qulepako o koako zoleilo puju ama taku kale ruqe ereko kale.

²⁶Vota o kerukerutake ta voa Pakio vo Baṉara o soroevo ala komia peuru ma peuru kale vai toraeko ko qurato ta kokai paloasa ko Ijipi ama batiro, ako vota okai zuatake ko reketekete vo Baṉara o kativo ama vo sole.

²⁷Oqu kale inio Mosese ta o zolaike Ijipi peuru kale azo pui taka ṉalo kale vo Ijipi ala aikovakova ko korakorailo kale. Vota ota pataitake ako vota o veve jari vo mutamuta kala Baṉara sole.

²⁸Nio voko vai oqu kale vo Baṉara inio vota o taniekake ko Alokato ko Ṉojola kiadama sabere poso ko ereko kaqe, ni o bazuemake se Izireli amu tu ke vouvaeko ko sipi ko meqora ni ke pirupusaeko koko dara seko veutu tonama barabara topi, tu vo vouvato ko mateana ta pui o vouvaemou se Izireli amu ko kaka kama lasive meqora poso.

²⁹Se Izireli amu ko vai oqu kale vo Baṉara inio seta ke pakekake ko ivere ko Diri ama Ivere koko ṉi sama. Vo Baṉara ta o piqasikake koa ivere tu seta ke pakeo tabarioma miduku kale. Melai so keru se Ijipi ama pazokinio ko maba madu ke madoeke keru pakeko ta ivere ta ko vaitake ni sea kiadamu ta keta kujoike.

³⁰Oqu kale inio Jeriko peuru ko levoekako idi qara ta kota niaqariake so keru se Izireli amu ke levoeke keru ko sikeura ṉaniu ko tova.

³¹Oqu kale inio kama pado sasave Rehabi[11] ko ṉi sama koko vai keruima vo Baṉara ta kota ka lapasake ko vou. Kake maba poso se pui kepa zoriveni vo Baṉara ta keta vouvake, melai kota pui ko vouvake ako kota lula ko baroekikake ni ko amaqikake koko pade kale nioqa Izirelia nioqa qo keveni nioqa sai soukori puekole ko Jeriko peuru.

³²Aṉata pui a rovea kaseko mata kama quli soama maba poso kale avo. Ako puliama taku tu aṉata amai bazuto vo Qitioni, ni Beraki, ni Samusoni, ni Jepita, ni Devita, ni Samuela ni kiadama poropita madu seke kasekani vo Baṉara ko pesio.

³³Seko vai oqu kale vo Baṉara seta ke kati pazokiniake kama matu peuru poso ni ke koqotaekake; korotoma ni sidopu ama quli ke erekake ni ke koake ko quli vo Baṉara oma inainaekema quli. Kake ta ke evake laione poso sate, melai pui ko nanaemake.

³⁴Mata kake ta ke risaemake ko ṉaloṉalo ama uza kale, melai mata pui ko siqaemake se. Ni keta ka soqoike ko benisi kale ama vouvailo. Seta lekuleku amu, melai keta pizatake; keta pizatake pazokinio kale ni ke koqotaekake edoloma pazokinio ko vaki.

³⁵Baṉara vai oqu kale kama rekoreko poso ta ke keve vo Baṉara ko mata saevimo seko mabamu se lula ke vovini. Ni mata kake maba poso ta ke tolai seko oqu kale koa matuma tola seko kana madu ke katimema seko mai tuzatuzao kale se ti kebeta vovi, seta keta lupaoke rupasio melai seko voukale seta keka zariake kovo qulepo ama tova saevo Baṉara kasi.

³⁶Kake ta kemai balebaleitake ni ke pazomake ni kake ta ke piriemake seini kale ni ke vaemake pirito pade kale.

³⁷Kake ta ke taimake lado kale ni keta vouvake, ni kake ta omuqa kobu ke imake soe kale, ni mata kake ta ke vouvaemake benisi kale. Sea maba poso ta ozaoza kamu ni kekai saboini ko qouti ni sipi ko tupu, ni seko kana madu ta ke matu niumaniumaeme se.

³⁸Seta ke taliovi lealea kama zaekale ni sopu poso kale, ni ke loivake kea poso kale ni miduku barana ko omele olaquama maba poso jari. Seta uri amu, sole pui ko malezima komia peuru ma peuru.

³⁹Kiadama sea maba poso ta ke matu zolevake vo Baṉara ako seta kevai oquake vo sole. Melai seta pui kepa koe vo Baṉara o kasekema matuma quli,

⁴⁰ako Baṉara ta lula o korotike ko uri ama vado pui se kaqe pala, melai anime ni se kaqe. Ako voko vatolo ta anime ni seta omadeu tovozo sidopu me elou, melai anime pide ta seta pui so.