Read Bilua Hiburu 12 Bible Online

Hiburu 12 - Bilua bible

Hiburu 12

¹Sea matu kubo animeko taite poso se kekai bazuteni seko oqu ta inisiana animeko levoano kale, so sole animeta me ṉamukou kiadama quli koko tizaemelako anime, ni ko sarueko poso koko matu raitimelako anime, tu pataito kale animeta mebeta zomano animeko rereo kale ama voziekinio kale ko animeko kuleto ko inainaivako.

²Animeta me doiritoirivou vo Jisu, omadeuvo vo rereo ko maba ta o toiritoirika jari ko mamola vo o zuatikako, ako vota animeko oqu vo jutujutula koko tanitanila keru azo ti koko paitopaito kale, vo me luluevo ala. Vota o pataite so keru o vovi keru korosi topi. Ni vota pui opa qurate soa vou elo, ako vota o kerukeruekake koa zoleilo vo Baṉara lula ova inainaekake vo sole. Ako kokale avo vota lula o papua erisaṉa vo Baṉara ko raura kama papupapu ko palo rana vasia rana tu o lekasa puo.

³Meta kerukeruevomo vo Jisu, vo pui opa lupaovini tu vota o tolailo koa tola vo o koema tola se sarueko sama maba madu ko ṉase topi se kevai kideipeni vo. So sole meta pui duki ni koqo elo meko bulo poso kale.

⁴Meko kati pazokinio tu tizaeko ko sarueko ta pui nio ko kati ijatinia puekinia tu meta meqai vou.

⁵So sole meta pui ukaka iko vo Baṉara ko pesio poso, ko vo o melai zuvarikako me omadeuvo vo mama o zuvarima jari voko lasive meqora poso, ko eri, “A meqora, so keru vo Baṉara o korotiṉou keru ṉo, ṉota didiane ni ṉota pui niaba elo vo o riqaeṉou keru.

⁶Ako vo Baṉara ta o sidopu puema kiadamu se vo o roquemani ni vota o koqotaema voko ṉisa meqora poso.”

⁷So sole meta pui taka kaikuapo vo Mama ko sidopu puto, ako meko tola ta kasa ko ika ta meta vo Baṉara ko meqora mela. Ako animeta meqai nianiia ta kiadama meqora poso ta sevo mama inio o korotimani se sole.

⁸Meta pui me qoqo-taivani mela tea, meta pui voko maba meqora poso mela inio, ako kiadama meqora poso ta ke koa ko koqotato seko mama poso kasi. So ta meta omadeuvo kevea meqora poso jaria mela inio, se puliama sidopu puilo ko bazu ke koani seko mama poso kasi.

⁹So keru animeko mama poso ke sidopu puemela keru anime animeko sarueko poso kale azo, ta animeta meda ma paṉaova se. So sole uri tu animeta soa matu zorivo me elo vo Mama vo o erekeni ko pado ama saevo tu animeta me jaevo noqola kama saevo kale.

¹⁰Se animeko miduku kale ama mama poso ta ke sidopu puemela anime seko zolemako sidopu puto kale puju ama taku kale. Melai Baṉara ta o sidopu puemela anime koa sidopu puto kale koko tauvemelo ama anime tu animeta vo jaria bulebule me elou.

¹¹So keru anime me qoa keru ko sidopu puilo ko keve, ta kama pado tola kama quli anime kasi, kota pui zurao lomaloma. Melai animeko sidopu puilo ta ko tova puratika ko uri ama kalo anime kasi anime me qoani mela ko tauvezato kokale azo. Kota sidopu ko imela ni animeta bulea elo me eva.

¹²So sole meta zaubariomo mata, ni pizaka lojo emo.

¹³Pizaka talio emo sidopu ama keve kale tu se pui ke paqumukani seko oqu ta pui utu amu ke elo Baṉara kasi tu seta mata ke pizatou auvana kale.

¹⁴Matu madoekomo tu meta emo bule kale kiadama maba sase, ni madoekomo tu saevomo tabu ama saevo kale, ako koa tabu ama saevo pide ta pui meba velou vo Baṉara sole.

¹⁵Balauvomo tu puliala ta o liliziovou Baṉara ko pakiezato sama roquano kasi azo. Ni vailomo tu puliala ta o pasopasoilou, ako koko epamata keru ta ko pasopasoilo ta kubo tapata ko ereka seke tuvevo putani kasi ni ko niumaeka seko saevo.

¹⁶Balauvomo tu puliala maba ta o ereko jou kama iruruputo ni kutumana iruruputo. Ako kutumana iruruputo ikio vo Isoa o erekema so keru vo okai tatabaraovi keru vo kuleto ala meqora ko puaro vovo visi Jekopi kasi, tu o kovo silo pala sailao.

¹⁷Koko tova vasi meta meqai nianiia Isoa ta oka zariake tu kovo kaka kala meqora ko mauruto, melai vovo mama Aisake ta pui o kativake. Vota oka ziake ko melai puliama kama pado keve kale vota o roveake besieko ko vo lula o erekema quli.

¹⁸Kerukeruekomo, meta pui me ola Sainai sopu kale. Meta pui me lainika ko Izireli amu kasi ko ereima ni ke lainikema quli lulama taku keru. Seta ke loje sopu ko raki kale, sai nio seta ke olake urusana ko evekoi, sai ta pata kutumana kama zae, ni so jari matuma varo kota evake sai.

¹⁹Sea maba poso ta ke viqake ko kuvili ko kelato ni seta mata ke viqake Baṉara ko kora ko o maba pikairikema. Koa pesio poso ko kora koko rukuima ta matu polosimo ko evake so sole seta ke pasevake vo tu vota pui mata soa pesio o elo kikelake.

²⁰Seta so kikelake ako koa bazu vo Baṉara ko kora ko kasekema ta ṉavaṉavala kama sekasi so keru koko rukui keru ko eri kikovema, “Kala maba o tibaekou koa sopu tea, maba madu ta ke taivou lado kale ni ke vouvaevou ni biaṉa melai so ke ikou,” kikovema.

²¹Ako ko quli seke kevema quli koa zaekale ta ko matu polosimake. O ṉavi Mosese ta eri kiolake, “Aṉata ada polosa ni ada ṉava,” kiolake.

²²Melai meta lula meda baroa Zaione sopu kale, sai Jerusalema zaekale, sai vo piza kala Baṉara o evakoi. Meta lula meqai baroa koa aukale ama Jerusalema sai kubo vuro mateana madu ke padoivakoi zoleilo kale.

²³Meta lula meqai baroa koa lotu qoqono kasi sai kiadamu ta kaka kala meqora jari ke evakoi, se Baṉara ota ma rikiekeni seko ṉi poso aukale ama buka kale. Meta lula meda baroa Baṉara kasi vo o pitasimo ala kiadama uri ama maba poso se ruqe amu kasi azo. Meta lula meqai baroa koa zae sai se sidopu amu ko auvana poso vo Baṉara lula o korotimakoi.

²⁴Meta lula meda baroa vo Jisu kasi vo o pizatikeni ko vairu ama leveleveo vo Baṉara o erekema maba poso kasi. Voko dara ikio koko pirupusaima, ko kasa ko ikako akoekato sama roquano tu anime kaqe, koko taka qulepako vo Ebolo ko dara vaitotola sama.

²⁵So sole meta balauvomo tu pui tava lupao viqo vo o pesiani mekasi. Ako sea maba poso se lulavo keta va lupaovini viqo vo okai pesiovini komia peuru ma peuru kale ko balauvimema bazu ta pui kepa taka soqoi. Sokale avo inio anime me viqani mela vo aukale azo o pesiani ta meda ka lupaovou viqo voko pesio, ta maba pui meba taka soqoilou.

²⁶Koa taku keru, vo Baṉara ko pesio ta ko vezokikake ko peuru ma peuru, melai erisaṉa vota lula leveleveo saṉa o ike voko eri kio kale, “Aṉata a vezokikou ko peuru ma peuru mata kama pado taku kale ni au melai aṉata a vezokikou,” kiolake.

²⁷Koa pesio poso vo o kasekema “mata kama pado taku kale,” kikolako ta ko melai bazue ta, vo Baṉara ta o ṉamukou kiadama quli koko roveako vezokato, koa kiadama quli vo Baṉara o erekema miduku kale, tu ko aukale ama quli pui ko roveako vezokato ta kobeta elou.

²⁸So sole animeta me ilusivou vo Baṉara, ako vota lula o zomanimela anime koa toutou kale vo okai lekasa puako, ko pui ko roveako vezokato. Animeta me ilusivou vo koa keve vo ko zolevo ama kale matuma paṉao sate.

²⁹Ako tuvevo avole animevo Baṉara ta uza jari ala, koko siqaekake kiadama quli sole.