Read Bilua Hiburu 13 Bible Online

Hiburu 13 - Bilua bible

Hiburu 13

¹Mea lotu tamania me evani mela vo Karisito kale, meta pui epezo roquekinio.

²Kerukerutomo tu meta baroekimomo se edolomu meko peuru kale, se puju ama taku me sase ke elo amu. Ako so keru kake maba madu ke ereke keru koa keve, seta ke tauvemake kake mateana madu, puliako nianiieme se.

³Kerukeruemomo tu tauvemomo se pirito pade kale ke evani maba poso; omadeuvo se jaria piripiri emo. Ni so jari meta kerukeruemomo se tapata ke evani, omadeuvo meta me lainika seko tola jari.

⁴Kiadama maba ta keta ka paṉao ko sidopu ama roroto saevo kiadama keve kale. Lasive poso roroto amu ni seko reko poso ta ke paṉaekiniou muli tu pui ke niumaeko seko roroto saevo pauvezato kale. Kerukeruekomo vo Baṉara ta o titizimou se ruqe ke erekani seko roroto saevo kale, ni so jari seke pauvezatani.

⁵Meta pui roqueko ko takula, ni meta maleziomo ko quli meme ṉeamukako quli kale, ako Baṉara ta eri kiove sole, “Aṉata maba pui aba vaemelou me ni aṉata pui uteo aba imelou me,” kiolake.

⁶So sole animeta me barani putou ni eri kimevou, “Baṉara inio aṉavo tauvezato, aṉata pui aba taka ṉalou maba olai ereko ama quli aṉa,” kimevou.

⁷Kerukeruemomo sea kuleto ama odikato ko maba poso seke kasekeni vo Baṉara ko bazu mekasi. Kerukeruekomo seke evevoa saevo ni vou, ni tuvevo puevomo vo Baṉara seke ivevoa tuvevo puevo vo jari.

⁸Jisu Karisito ta omadeuvo ravi, ni vairutu ni kiada keru. Vota pui o besiziani.

⁹So sole pui zarieko ko edoloma vairu ama pesio poso, se maba poso kekai erekako ko azaazama nianiiekato tu kota mela sarueko meko sidopu ama keve. Qulepo ama quli ta kovo vo Baṉara ko mauruto sama roquano. Ko ikio meko auvana kale ama pizato, pui se Jiu amu ko sailao ko Bazu poso ko zoriko. Ako seke zorikani koa bazu poso ta pui ke tauvezia kokale sole.

¹⁰Animeta kama pado edoloma siqasiqa samela, vo Jisu o erekema. Se siama madu ke nabuluputani se Jiu amu ko ilusato ko zaekale ta pui ke male tu kekai zomano kovo kama kena animeko sara kale ko evako siqasiqa.

¹¹Se Jiu amu vo Ṉisa Siama ta o kati amaqea biaṉa poso ko dara pala Matu Tabu ama Zaekale tu o ereko ko sarueko poso ko akoezato ko siqasiqa, melai koa biaṉa poso ko tupu ta ko siqaiva peuru ko kupekupe.

¹²Sokale avo inio Jisu ta soa vou o eve Jerusalema peuru ko kupekupe tu vota o ṉaviko tabu ama maba poso o imelo anime, voko dara kale.

¹³So sole animeta me vaemou seke madoekani tu kati vailo se Jiu amu ko siqasiqa, ni meqai zomanou voko qurato.

¹⁴Ako komia peuru ma peuru kale ta pui animeko ṉisa peuru sole animeta meqa zaria baro koa noqola kama peuru aukale ama sai anime me eloa koi.

¹⁵So sole vo Jisu ko pizato kale animeta pui me lalamatou ilusivo vo Baṉara, ako ko ikio animeko siqasiqa sole. Animeta mevai bazubazutou animeko kora kale edolomu kasi ta vo inio animevo Lekasa.

¹⁶Pui ukaka iko meko uri ereko edolomu kasi, ni meko tauvekinio, ako ko ikio koa siqasiqa vo Baṉara ko zolevako sole.

¹⁷Meta zorimomo meko lotu lekasa poso, ni erekomo ko quli seke melati soruekako me, ako se inio ke melati vailani me meko auvana ko saevo sole, ni se inio ko kilo ama ṉaniu kale ke lojo amu Baṉara ko tanama kale, tu ke kaseko seko iruruputo vokasi. Seta kevai bazuekou vo se lula ke erekako ni nonia ereko inio lula ke evani ko. So sole meta zorimomo se, tu seta ke zoleilou seko iruruputo kale, nio pui duki ke elou seko koidi kale, ako meko duki imo se ta pui kopa tauvemelou me sole.

¹⁸Meta pui lalamato vararaito kale tauveṉelo eṉe, ako eṉeta ṉe baqumuka ta pulia quli ko ṉelai loqaiva eṉe sole, ako eṉeta ṉeqa zaria ereko ko uri kiadama taku keru sole.

¹⁹Maba pasemelo a eva mea kiada mela tu la vararaitomo aṉa, tu vo Baṉara ta o bokerilou aṉa tu kapiavole mata a vaitou mekasi.

²⁰Baṉara ta o saevive vo Lekasa Jisu voukale azo, vo raura kala anime o melati vailani omadeuvo sipi o kati vailani maba jari. Vota o saevive vo koa dara ko pizato kale, koko vinaekema koa leveleveo, vo o erekema anime kasi tu kota noqola pizato ko elou.

²¹Aṉata a baseva vo Baṉara vo o vaekani voko bule se maba poso ko saevo kale, tu o katimelou me kiadama uri ama quli koko tauvemelo ama tu me erekou ko quli vo oka zariako tu me ereko. Aṉata a mela zaria anime tu vo Baṉara ta o iruruputou animeko bulo poso kale vo Jisu Karisito ko pizato kale, tu animeta me erekou kiadama quli voko zolevako. Nio vo Jisu Karisito ko raurailo ta ko elou latau ṉaniu ni ka ṉaniu. Emeni.

²²A visi poso, aṉata a basemela me tu paṉao kale viqomo aṉako zuvarato sama bazu. Komia leta aṉa a rikiekako mekasi ta puju ama.

²³Aṉata a mela zaria me tu meta kai nianiiomo ta seta lula ke zarieva saqorivo vo Timoti vo animevo visi vo pirito pade kale o eveni. Taukavole o kilou ta aṉata a vati kilou inio so keru aṉako kilo keru soipimelole me.

²⁴Eṉeta ṉe joroeka eṉeko roquano kiadama meko lotu lekasa poso kasi ni kiadama vo Baṉara ko maba poso kasi. Se Itali ama lotu tamania ta ke melati sorota me seko roquano.

²⁵Vo Baṉara ko mauruto sama roquano ta ko elou mea kiada mela tona.