Read Bilua Hiburu 4 Bible Online

Hiburu 4 - Bilua bible

Hiburu 4

¹Baṉara ta lula leveleveo okai vaeka kama pado zae tu animeta me amaqeovou sai vo o evakoi tu me mamazou vokasi. So sole animeta me vailou, tu puliala anime azo kala ta nieu okai elou kelo ni kovo koa mamazo ko vo lula o mela inainaekema.

²Ako animeta lula me viqa ko Uri ama Bazu, lulavo kemai bazuekema jari ama. Seta ke viqe koa bazu, melai kota pui kopa tauveme se, ako so keru seke viqe keru ko, ta pui kepa ṉeamuke ni pui kepa kai oqui sole.

³Melai anime me duvevo putani mela inio me qoani mela koa mamazo vo Baṉara lula leveleveo okai vaekema. Vota eri kiolake, “Aṉata amai korakoraivake se ni ada ma kejomatake, ‘Seta maba pui kepa kai amaqeovou koa zae ko aṉa a qatimo ama se ka kialako tu kekai mamazo!’” Vota lula o paikake voko iruruputo koa taku keru vo o ereke keru ko peuru ma peuru, melai vota so kiove.

⁴Ako kama pado Tabu ama Riki kale ta o kasei voa sikeurala pado ṉaniu, “Baṉara ta o mamaze kiadama voko iruruputo kale azo voa sikeurala pado ṉaniu kale,” kikolako.

⁵Ni koa Tabu ama Riki ta mata eri kikola, “Seta maba pui kepa kai amaqeovou koa zae ko aṉa a qatimo ama ka kialako tu kekai mamazo!” kikolako.

⁶Se lulavo kuleto ke viqeni ko Uri ama Bazu ta pui kepa koe koa mamazo, ako seta pui kepa tuvevo pute sole. Melai erisana ta kama volei maba madu ta koma zarizia tu seta ke kovo ko.

⁷Kokale avo vo Baṉara ta o suirikake edoloma taku “Vairutu” ka kikolako. Kubo sabere kota paloasake inio vota o kaseke Devita kale kude Tabu ama Riki ko aṉa lula a qasekako kale, “Meta me viqou vo Baṉara ko pesio vairutu, ta meta pui zokele me ikou meko bulo.”

⁸Josua ta lula o katime sea maba poso koa mamazo vo Baṉara o kasekema tea, so keru o mati taliovi keru se, vo Baṉara ta pui nio opa kaseko mata kama pado ṉaniu.

⁹So sole koa pesio kale animeta meqai nianiia ta vo Baṉara ko maba madu ko mamazo ta ikoana, omadeuvo vo Baṉara o mamaze jari koa sikeurama ṉaniu kale.

¹⁰Ako vo o koani ko mamazo vo Baṉara o kasekema ta o mamazou voko iruruputo kale azo, omadeuvo vo Baṉara o mamaze voko iruruputo kale azo jari.

¹¹So sole animeta me matu madoekou tu me qovo koa pakio ko mamazo, tu puliala ta se kekai evevoa kabao okai elou ko, ako seta ke bikobikoirate sole.

¹²Ako vo Baṉara ko pesio ta saevoma ni piza kama, ni kota kokai paloasa ko omuqa rana ivoivo ama benisi ko ivo. Kota tutumazi avole ko jataeka omele ama saevo ni auvana maba ko saevo kale ama. Kota kasa ko ika vo maba ko mutamuta kama vatolo ni kerukeru poso voko bulo kale ama.

¹³Pulia quli ta ko rovea tava daipailo vo Baṉara, kiadama quli peuru ma peuru ko ereima ta kasale voko keazato kale. Animea kiada mela ta me lojolou voko kuleto ni animeta meqai eraeraovou kiadama quli ko lula anime me erekako quli.

¹⁴So sole animeta pizaka noqoe me elo ko oqu ko anime me ṉeamukako. Ako animeta kala Matu Ṉisa Siama samela sole, vo o koivini aukale Baṉara ko tanama kale, ni voa animevo Matu Ṉisa Siama inio vo Jisu, vo Baṉara vo Meqora.

¹⁵Animevo Ṉisa Siama ta o rovea lainike animeko lekuleku poso ko upotuqu, ako vota anime jaria maba o eveni sole, so sole vota o toraeke kiadama quli koko zolizolievema quli, omadeuvo anime me doraekako jari, melai vota pui opa sarueke.

¹⁶So sole animeta me barani puto tu me qilou vo Baṉara ko papupapu ko matu sipole sai vo o lekasa puakoi ni sai voko tauvezato sama roquano ko evakoi. Sai nio anime me qovoa koi ko sarueko poso ko akoezato ni me qeloa koi ko roquano koko tauvemelo ama anime animeko tapata keru.