Read Bilua Hiburu 9 Bible Online

Hiburu 9 - Bilua bible

Hiburu 9

¹Kuleto ama leveleveo kale ta ikoana ko ilusato ko bazu poso ni maba ko erekema tepe pade ko bazu sai ke ilusivakoi vo Baṉara.

²Koa tepe pade ko poro kale sai Baṉara ke ilusivakoi, seta ke inainaeke kuleto ama lose Tabu ama Zae kekai nokaekema. Koa lose kale seta ke vaekake ko sikeura kata kama juke ko papupapu, ni tevolo koko bereti topi kota ka evako sama, ke kativema vo Baṉara.

³Koa tepe pade ko poro kale ta inovoana mata kala pado lose suma otu ala koko poro kale vasia rana ko Matu Tabu ama Zae kekai nokaekako.

⁴Koa lose ko poro kale inio ko evakoi qolo sara sai uria tui ama pari[8] ke siqaekakoi tu ke kativo vo Baṉara, ni so jari vo Baṉara ko Leveleveo ko Dolu, qolo kale ke saboekema, leveleveo ko lomaloma sama, qolo raro mana sama, ni Eroni ko daṉa ko lula qotuqotu ni leko sama, ni omuqa lesa lado toni bazubazu kokai rikiziovima sama.

⁵Koa Dolu ko topi ta omuqa beku zabu sama, vo Baṉara sai o zomana kio ko kasekako. Nioqako zabu ta ko viuru pueka koa Dolu ko suta, sai koa dara vo Baṉara okai akoekake maba madu ko sarueko poso ko pirupusaivakoi. Melai erisaṉa ta pui koko taku tu ririziko kiadama quli.

⁶Koa lomaloma poso ko inainailo ko tova, se siama madu ta ke amaqea koa kuleto ama lose kale ni seta ke ereka seko koidi poso kiadama ṉaniu,

⁷melai vo Ṉisa Siama o kiada inio o amaqea koa tepe pade ko poro kale ama Matu Tabu ama Zaekale omadeu taku omadeu sabere kale. Vota pui o utu amaqea sai, melai vota o borika biaṉa ko meqora ko dara tu vota o kativo vo Baṉara, o ṉaviko sarueko ko siqasiqa kaqe, ni vota o kati ola ko biaṉa ko dara vo Baṉara okai akoekato maba poso ko sarueko, ko se pui kai nianiio kale ke erekema sarueko poso ni pui sarueko pa ka kikevema.

⁸Kiadama ko quli kale Tabu ala Auvana ta uria kasa o mela ika anime ko anime mebeta ziovou lulueko ko tepe pade ko kalo tea, animeta pui nio me zarizia amaqeo ko Matu Tabu ama Zaekale, vo Baṉara ko tanama kale.

⁹Kiadama ko quli ta mamola pala ko kasa ko mela ikako anime vo Karisito ko iruruputo. Kota kasa ko ika anime kasi ko katizato ni biaṉa kale siqasiqa ereko Baṉara kasi ta pui ko male tu kasa va iko vo maba ko voko sarueko ta kota va akoiva.

¹⁰Koa katizato poso, ni siqasiqa poso, ni mata sailao ni ju ni lomaloma ko bulebule iko ko bazu, ta tupu kale ama quli ko bazu vo Baṉara o puarikema puju ama taku kaqe pala ni kota kota paita voko besieko kale kiadama quli.

¹¹Melai komia taku vo Karisito ta lula Ṉisa Siama okai eva ko uri ama quli ko lula ko baroako. Vota lula okai amaqea koa qulepo ama ni korotoma tepe pade. Koa tepe pade ta pui maba madu kepa erekema ni kota pui komia peuru ma peuru ko kama kena.

¹²So keru vo Karisito okai amaqeovi keru omadeu pado taku kale ko malezikako kiadama taku koa Matu Tabu ama Zae ta pui opa borike ko bulumakau ni qouti ko dara tu o ereko kama pado siqasiqa, melai vota o borike o ṉaviko dara ni kokale animeta me qoe ko noqola kama pakio animeko sarueko poso kale azo.

¹³Seta ke koa ko qouti ni bulumakau ko dara, ni vairu ama bulumakau lula ke siqaekako ko pari, ju sate ke valuvaluekako, ni kemai pirupusaeka se pui nio bulebule ke evani maba poso tu seta bulebule ke elo vo Baṉara ko kelokelozato kale.

¹⁴Melai vo Jisu ko dara ko pizato ta kokai paloasa soama biaṉa poso ko dara tu bulebule ko imo se maba poso. Ako vo Jisu ta maba sidopu ala siqasiqa o evake Baṉara kasi o ṉavi anime kaqe vo noqola kala Tabu ala Auvana ko pizato kale, so sole vota bulebule o ika animeko bulo poso tu animeta pui me lulueko ko utube ama iruruputo koko melati ziovo ama auvana kale ama voukale, tu animeta meva nabuluputo ni me luluevo vo saevola Baṉara.

¹⁵Sokale avo inio vo Karisito o lojoani Baṉara ni maba ko tiania, ta o ereka ko vairu ama leveleveo tu vo Baṉara o pitoemeni maba poso ta ke kovou koa uri ama quli vo Baṉara lula oma inainaekako tu o katimo se tu seta noqola ṉeamuko ke elou. Komi quli ta kota ereilou ako Karisito ko voukale se maba poso ta ke rupasiovi ruqe ama quli kale azo seke erekema seko lulueko kale kuleto ama leveleveo.

¹⁶Leveleveo ta kama pado vikuvikula koko vikuako vo maba kasi so keru koa lomaloma sala o vouva keru.

¹⁷So keru obeta saeva keru voa maba, ta koa vikuvikula ko leveleveo ta pesio pala ikio, melai so keru vo o vouva keru, ko ikio koa taku koa leveleveo pizato saṉa ko elou keru.

¹⁸Sokale avo inio ko kuleto ama leveleveo vo Baṉara o erekema maba madu kasi ta biaṉa poso ko dara kale pala pizato saṉa ko eve.

¹⁹Mosese ta omai bazuekake se maba poso kiadama bazu poso Baṉara ko Bazu kale ko evako. Saita inio vota o koake ko vairu ama bulumakau ni qouti ko dara, ni o valuvaluekake ju sate ni vota o koake kama pado seulele papapapa ko kata, hisopi kekai nokaekako, ni o nasoekake ko diri ama sipi ko tou, ni vota o duluekake koa dara kale ni o pirupusaekake Bazu ko buka topi ni so jari kiadama maba poso topi.

²⁰So keru vo o pirupusaeka keru koa dara koa buka ni se topi vota eri kiolake, “Komi kio koa dara ko vinavina ko ikako ko leveleveo vo Baṉara lula o melai bazuekema me tu meta me lulueko ko,” kiolake.

²¹So jari Mosese ta mata o pirupusaekake koa dara tepe pade topi, sai seke siqatakoi vo Baṉara kasi, ni kiadama quli se kekai iruruputema Baṉara vai ilusiko kale topi.

²²Koa Bazu kikolani ta sipole kiadama quli ta dara kale inio bulebule ko eva Baṉara ko tanama kale. Sokale inio seko reretiko ko dara kale ko kiada inio Baṉara ta o rovea akoeko ko sarueko poso.

²³Lulavo ta ko malezike seko soa reretiko ko dara tu kota bulebule ko iko koa lomaloma poso vo Baṉara ko tanama kale, ni koa lomaloma ta tuvevo ama aukale ama lomaloma ko laumuna pala. Melai koa tuvevo ama quli aukale ama ta omadeu pado qulepo ama siqasiqa ikio bulebule ko ika.

²⁴Karisito ta lula o amaqeovi aukale ni vota o lojoa erisaṉa vo Baṉara ko kuleto tu o tauvemelo anime. Vota pui opa amaqeovi maba ko erekako tabu ama tepe pade kale koko mela mamola puekako pala anime koa zae sai vo Baṉara o evakoi.

²⁵So keru vo Jiu ala Ṉisa Siama o amaqea keru Matu Tabu ama Zaekale kiadama sabere kale, vota o borika biaṉa ko dara, pui o ṉaviko. Melai Karisito ta okai amaqeake omadeu taku koa Matu Tabu ama Zae ni siqasiqa o evake o ṉavi Baṉara kasi.

²⁶Kubo taku okai amaqeovi tea, vota ota tolailo inio kubo taku kale peuru ma peuru ko erei keru azo. Melai koko ereima kale vota kasa o eve omadeu taku ko kiada ko malezikako kiadama taku komia tovatovama taku kale, tu vota siqasiqa o elo o ṉavi, tu vota noqola zauteko o elou maba poso ko sarueko poso.

²⁷Kiadama maba madu ta ke vouvou omadeu taku pala ni seko vou ko tova Baṉara ta o pitasimou se ruqe amu sidopu amu kasi azo voko titizato kale.

²⁸So jari nio vo Karisito ta siqasiqa o eve o ṉavi omadeu taku pala tu vota ota ma akoeko kubo maba madu ko sarueko poso, ni vota mata o vaitou komia peuru ma peuru kale omuqama pado taku kale. Koa taku kale vota pui opa kilou akoekole ko sarueko poso, melai vota o kilou pakiemole voko maba madu, seke tarevani vo.