Read Bilua 2 Jone 1 Bible Online

2 Jone 1 - Bilua bible

2 Jone 1

¹Aṉa lotu ko vilua pikopiko lala, ta a rikieka komia riki ṉoa pitopito ama rekoreko ṉa vo Karisito kalea laṉa kasi ni ṉoko meqora poso[1] kasi: Aṉata tuvevo avole a roquemela mea kiada mela, ni pui aṉa a qiada melai sea kiadamu se kekai nianiiani ko tuvevo ama bazu melai ke roquemela me.

²Ni eṉeta ṉe roquemela me koa tuvevo ama bazu ko kio kale, ako koa tuvevo ama bazu ta ko eva sole anime tona erisaṉa ni kobeta elou kiada keru.

³Vo Baṉara animevo Mama ni vovo Meqora Jisu Karisito ko pakiezato sama roquano, ni tauvezato sama roquano, ni bule ta ko elou anime tona. Ni animeta me qovou vo Karisito ko tuveano ni roquano ko puratikako mauruto.

⁴Aṉata ada matu zoleike, so keru amai nianiiovi keru kake ṉoko meqora poso seke luluekani tuvevo ama bazu seko saevo kale, ako so inio animevo Mama o melati soruekani sole.

⁵Ni aṉata a bazueṉa ṉoa rekoreko ṉa, ko eri: animeta me roquekinio muli. Komia bazu ta pui vairu ama bazu, melai kota koa omadeuma bazu ko mebe viqema koko tanitanila keru azo.

⁶Ni roquekinio ko kalo ta lulueko vo melati kiolani animeko saevo kale. Ni eri nio vo Baṉara kiolani: meta me jaevou roquano kale. Ni komia bazu ta mebe viqema koko tanitanila keru azo.

⁷Matu kubo lipalipa kama nianiiekato ko maba madu ta iniseana komia peuru ma peuru kale. Ni seta eri kikela, vo Jisu Karisito ta pui maba opa eve ni pui opa kuevi miduku kale koa voko maba elo kale kikela. Vo so kiolani ta lipalipa kala nianiiekato ko maba ni vo inio vo Karisito vo kana.

⁸So sole meta balauvomo! So inio meta pui meqai suatou koa reketekete ko eṉe lula ṉe melai bazuekema me eṉeko iruruputo kale, melai meta me qovou koa kiadama.

⁹Ako animeta mebeta ziovou lulueko vo Karisito ko nianiiekato ko kiada. Melai vo okai paloaso ala vo Karisito ko nianiiekato kasi azo, ta vota pui vo Baṉara sate ala inio. Melai vo obeta ziovo ala lulueko vo Karisito ko nianiiekato, vo inio vo Mama ni Meqora sate ala.

¹⁰Ni kala maba ta o kilou mekasi, ni okai nianiiekatou edoloma nianiiekato, pui vo Karisito ko nianiiekato jari ama, ta pui me zarievou tu o kilou meko pade kasi, ni pui me baroekivou vo.

¹¹Ako meta me baroekivou vo, ta meta me vati tauveka inio koa ruqe ama iruruputo sole.

¹²Matu kubo quli kio aqai zaria melai bazueko, melai pui aqai zaria tu melai bazueko rikito kale. Melai kama taku inio aqa zaria tu a qilou a ṉavi ni aba soipimelou, so keru inio animeta me uria pesipesitou omadeukoi. So inio meta me uria zoleilou.

¹³Noko pitopito ama visi vo Karisito kale ama ko meqora poso[2] ta ke soroeka seko roquano ṉokasi. A baika.