Read Bilua 3 Jone 1 Bible Online

3 Jone 1 - Bilua bible

3 Jone 1

¹Aṉa lotu ko vilua pikopiko lala, ta a rikieka komia riki a baerebaere Qaiasi ṉa kasi, ṉo tuvevo avole a matu roqueṉani ṉa.

²A baerebaere, aṉata aṉai nianiia ta ṉota ṉobeta uria pizata ṉoko auvana kale. Ni aṉata a ṉati vararaita tu ṉota ṉo uria elou kiadama quli kale ni ṉoko saevo melai uri ko elou.

³Ako kake aniqeko lotu tamania kale amu ta ke kuevi ni kelai bazueke sole ṉoko lulueko ko tuveano ṉoko saevo kale. Ni ko ikio ko matu zolela aṉa.

⁴Ni kiada keru aṉata a zoleiva a viqa keru aṉako lotu meqora poso ko lulueko ko tuvevo ama bazu vo Jisu Karisito ko.

⁵So sole a baerebaere, matu uri ṉota ṉobeta ola tauvemo se pakepakeo lotu maba madu, ni so jari se ṉo pui ṉomai nianiiani melai ṉo dauvema.

⁶Ako nia lotu tamania madu ta kemai bazueka sole se lotu kale amu ṉoko roquano. So sole matu uri tu ṉota beta ola tauvemo se tu seta kebeta zio seko talio kale, ako so inio ṉo zolevou sole vo Baṉara.

⁷Ako seta lula ke taniekako ikio sole seko talio kale va nabuluputo vo Karisito, ni seta pui keta mai zaria se kutumana kamu ko tauvezato.

⁸So sole anime lotu maba mela inio me dauvemou soama maba madu. Ni so keru me erekou keru koa iruruputo animeta me mati puarikinia inio se tuvevo ama bazu ko iruruputo kale.

⁹Aṉata a rikieve kala riki se lotu qoqono madu kasi.[1] Melai vo Daeoterapesi ta ota lupaoke viqo aṉa kialani, ako vo inio o raurarauraivani sole tu mevo vilua pikopiko o elou.

¹⁰Melai so keru a ṉavi a qilou keru, inio avai kuirikou vo Daeoterapesi o erekako quli. Ako vota o lipalipata ni o ruqe kasela sole aṉa. Ni pui koko kiada ikio o erekako, melai vota ota lupaova tu tauvemo se pakepakeo maba madu se keva iruruputani vo Karisito. Ni so jari vota o dokolima sea maba madu se kekai zariani tauvemo se, ni o kupema lotu qoqono kale azo.

¹¹A baerebaere ṉa, ṉota pui lulueko ko ruqe ama kalo melai lulueka ko uri ama kalo. Ako vo o erekani uri ama quli ta vo Baṉara vo inio, melai vo o erekani ko ruqe ta pui ovai nianiiani vo Baṉara sole.

¹²Kiadama maba madu ta kekai bazubazuta vo Dimitiriasi ko uri. Ni voko lulueko ko tuveano melai ko tuvevo pueka se kikelani. Ni eṉe melai ṉeda vai bazubazuta voko uri. Ni ṉota ṉoqai nianiia ta eṉe kiṉelani ta tuvevo avo.

¹³Aṉata matu kubo quli kio aqai zariako tu ṉai bazueko, melai pui aqai zaria tu ṉai bazueko rikito kale.

¹⁴Melai sipole inio abe ṉai kilou soipiṉole, kiala nio omadeukoi qe uria pesipesitou.

¹⁵Sole bule ta ko elou ṉo tona. Ni se ṉoko lolo poso aṉa kasi ke evani ta ke soroeka seko roquano. Roquano kiadama eṉeko baerebaere poso saizamu kasi omaomadeu kale kude.