Read Bilua Jiudi 1 Bible Online

Jiudi 1 - Bilua bible

Jiudi 1

¹Aṉata Jiudi lala, vo Jisu Karisito vo nabulu, ni Jemisi vo visi lala. Aṉata a rikieka komia leta mekasi vo Baṉara lula o nokaemelani mela kasi, me animevo Mama Baṉara ko roquano kale ni Jisu Karisito ko vailo kale me evani mela.

²Ni aṉata a melati vararaita me, tu baiseo, ni bule, ni roquano ta ko sukatou me tona.

³Aṉako baerebaere poso mela, aṉata aqa matu zariovi tu rikito mekasi tu kai bazuto ko pakio animea kiada mela me ṉeamukako, melai aṉata a qea ta uri tu a rikito mekasi tutumazi avole tu a mela titio meko piza kai oqu koa tuveano besizio pide ama vo Baṉara lula o katimelema me voko mabamu mela.

⁴Ako kake se pui Baṉara ke luluevani ta lula ke sukuiva ni ke melai zomana animeko lotu qoqono poso kale, seke besiekani ko pakiezato sama roquano ko bazu seko tupu kale ama viluloqu ko lulueko kale, ni seke tava zoliani vo Jisu Karisito, vo animevo Tanala ni Lekasa. Matu lulavo ko Tabu ama Riki kale ta lula ko pidokiovi koa kuiripato seke kovo ama.

⁵Meta mebe kai nianiiani mela inio komi quli, melai aṉata aqa zaria tu melai kerukerueko me ko eri, vo Baṉara ta o saqorime se Izireli amu Ijipi azo, melai koko tova vota o vouvaemake se pui kepa tuvevo puteni.

⁶Ni kerukeruekomo kake mateana madu ta pui kepa kai zolei seko koidi ni pizato vo Baṉara o katimema, ni seta ke vaekake seko ṉisa peuru, nio sea mateana madu ta ke piriziake noqola kama piri kale kutumana kale ti kobeta barou koa matuma ṉaniu kale seke titiziovou keru.

⁷Meta kerukeruekomo ko Sodomo ni Qomora peuru ni koko ketaketama peuru poso kale amu se sea mateana ko kalo jaria kalo ke eveni, seke pauvezateni, ni se ke ṉavio kude ke erekateni lasive amu. Seta ke tolaiva koa paito pide ama uza kale koko siqaeko ama se boutare samu, ni kota ko katimela animea kiada mela ko balauvato.

⁸Omadeuvo so jari nio sea lipalipa kama nianiiekato ko maba poso ta ke ereka kama uloito ni sarueko saṉa ke ika seko tupu poso, ni ke bikoirika vo Baṉara ko bazu ni ke ruqe kasema se aukale ama nanaidara kama mateana madu.

⁹Vo mateana madu vo kuleto ala Maekolo o ṉi sala ta pui opa ereke soama quli. Ako so keru vo ni Setani qokai zolizoliekinie keru vo Mosese ko tupu, vo Maekolo ta pui o madoekake tu ruqe kasevo ni kuiripato saṉa ivo vo Setani, melai eri nio kiolake, “Vo Baṉara ta o dokoliṉou ṉo!” kiolake.

¹⁰Melai sea ruqe ama maba madu ta ke ruqe kaseka ko quli se pui ke paqumukako quli, melai ko quli ke paqumukako quli tu ke ereko kerukeruto pide biaṉa poso jari, ko quli kio ko maba niumaemako se.

¹¹Matu ṉaloṉalo ama quli kio komai barolou se! Ako seta ke lulueka vo Keini ko keve sole. Ni takula ko kovo ko kio kale seta ke lulueka koa saruilo vo Beilami o erekema. Seta ke pikipikinio puta Kora[1] o kaevo pikipikinio puto jari ni vo jaria vou keta eva.

¹²Sea maba poso ta kaqa keta mela ika meko bairumuo vuato ako kokale seta qurato pide ke utu zoleiva ke ṉavi sole ni seta ke kerukeruiva ke ṉavi pala. So inio seta nioro pide ama lei, koko alazikako ko ururu jari amu. Ni seta epa pide ama ore jari amu, so keru koko epako ko taku keru melai epa pide ama, seta ko rabuivako ni ko vouvako ore jari amu.

¹³Seta omadeuvo ko ivere kale ama tovoko poso jari, ni seko qurato sama kalo ta ko purata koko supalala jari. Seta omadeuvo koa suti poso ko pui ko luluekako ko ṉaviko keve jari, se inio vo Baṉara lula oma inainaekani kama pado matu kutumana kama zae tu seta noqola elo ke elou sai.

¹⁴Inoke ta varimujala koilokoilo Adami ko vikuvikula kasi azo, vo matu lulavo o mati pidokikeni ko eri, “Keatini! Vo Baṉara ta o kilou kubo voko tabu ama mateana poso sase,

¹⁵tu o kati kilo ko titizato sea kiadamu tona, tu omai kuiriko sea kiadamu seke erekako sarueko poso, ni kiadama seko ruqe kasevo vo Baṉara seko ruqe ama pesio poso kale!”

¹⁶Sea maba poso ta kiada keru kemai ṉuruṉuruani edoloma maba madu, ni seta ke lulueka ke ṉaviko ruqe ama zario poso. Seta ke raurarauraivani ke ṉavi pala, ni ke oluoluema edolomu tu kekai kovo avo se keka zariako quli.

¹⁷Melai kerukeruekomo, me a lolo poso mela! Meta kerukeruekomo ko quli lulavo ke melai bazuekema vo animevo Lekasa Jisu Karisito ko apositolo madu.

¹⁸Seta eri kikeve mekasi, “Tovatovama taku ko barou keru, so keru inio seke melai balebaleito amu me ta ke puratou, seke lulueko amu ke ṉaviko kutumana kama zario poso.”

¹⁹Se inio sea maba poso seke erekani ko pitasio ko kalo, ni seke luluekani seko tupu kale ama zario poso, ni se pui ke ṉeamukani vo Baṉara ko Auvana.

²⁰Melai me a baerebaere poso mela, meta rapukomo me ṉavi meko matu tabu ama oqu kale. Meta vararaitomo vo Tabu ala Auvana ko pizato kale,

²¹ni meta emo vo Baṉara ko roquano ko poro kale, meko tarevo kale vo animevo Lekasa Jisu Karisito tu o katimelo me ko noqola kama saevo voko akoekato sama roquano kale.

²²Meta baisemomo se niuniala kama lotu maba poso.

²³Pakiemomo mata kake ni saqorimomo heli ko uza ko vualavuala kale azo. Ni so jari meta baisemomo balauvo sate mata kake, seke piriziani seko tupu kale ama zario ko puratikako sarueko kale, melai balauvomo tu pui me lulueko seko kalo, ni tamai kedumo seko suma poso, ko kaqa ke ikako koa ruqe ama kalo kale.

²⁴Erisaṉa vokasi o roveani melati vailo kiadama pialo kale azo, tu o lojoemelo me remeremedu pidea mela voko ṉaṉaidara ko tanama kale zolezolea mela;

²⁵vo omadeu pado animevo Pakio Baṉara kasi, vo Jisu Karisito animevo Lekasa kale kude, ta ko elou ko ṉaṉaidara, raurailo, lekasa puo, ni naizato, koko tanitanila keru azo ama, ni erisaṉama, ni latau ṉaniu ni ka ṉaniu! Emeni.