Read Bilua Kelokelozato 1 Bible Online

Kelokelozato 1 - Bilua bible

Kelokelozato 1

¹Komia riki ta ko kaseka kiadama quli vo Jisu Karisito o puratikema quli ko kalo, ko quli vo Baṉara ova kasekema tu vota kasa oma iko voko nabulu poso ko taukavole ko ereilo ama quli. Vo Jisu Karisito ta kasa olai ikake kiadama quli aṉa vovo nabulu Jone lala voko lai soroevo kale kala vovo mateana,

²nio aṉata a qaseka kiadama quli ko aṉa a qevema. Komia aṉako riki ta aṉako kai bazuto vo Baṉara kasi azo kolai kuevima bazubazu ni koa tuveano ko vo Jisu Karisito kasa olai ikema.

³Maurumauru ala voa maba vo o tiromiko ala komia riki ni maurumauru amu seke viqo amu koa leveleveo sama bazubazu, ni seke zoriko amu komia riki kale ko rikiziovima quli. Ako kota pui tu kopa keuvou ti komi quli ta ko ereilou sole.

⁴Aṉa Jone lala ta a joroeka aṉako roquano mea sikeura lotu qoqono Eisia rana me evani mela kasi. Pakiezato sama roquano ni bule vo Baṉara kasi azo ko kuevako ta meko, vo koko tanitanila kale o eveni, ni vo erisaṉa obeta evani, ni vo mainio opa kilo ala, ni koa sikeura auvana kasi azo ama koko evako voko papupapu ko kuleto,

⁵ni vo Jisu Karisito kasi azo ama, vo kerula kala bazubazuto ko maba, ni kaka kala Meqora vo kuleto o saeveni voukale azo, vo peuru ma peuru kale ama aikovakova poso azo raura kala. Vota o roquemela anime, ni voko voukale vota lula o rupasimela anime animeko sarueko kale azo

⁶ni vota vo Aikovakova Baṉara keva nabuluputani siama madu o imeleni anime tu animeta meva nabuluputo vovo Mama Baṉara. Tu animeta mevai rauraekou vo Jisu Karisito ko ṉaṉaidara ni pizato latau ṉaniu ni ka ṉaniu! Emeni.

⁷Keatini, vota ota kilou lei poso kale! Sea kiadamu peuru ma peuru kale amu ta ke velou vo, seke vouvaeveni melai ke velou vo. Ni kiadama maba poso miduku kale amu ta duki keva elou vo. Kota tuvevo ko elou! Emeni.

⁸“Aṉata kiadama quli koko tanitanila ni koko paitopaito lala,” kiola vo Baṉara, vo koko tanitanila kale o eveni, ni vo erisaṉa obeta evani, ni vo mainio opa kilo ala, vo kiadama pizato sala.

⁹Aṉa Jone lala mevo lotu tamania kalea lala, aṉata a zomanani lala me sase animeko omadeu vati elo kale vo Jisu koa olaquama saevo kale inobea tareko voko lekasa puo ko kilo. So inio aṉata ke noqoelake ni kepa vaelake Patimosi o ṉi sala udu kale ako aṉata lula aqai bazubazutani lala vo Baṉara ko bazu ni koa tuveano vo Jisu kasa o ikema sole.

¹⁰Animevo Lekasa ko tabu ama ṉaniu kale inio vo Tabu ala Auvana ta olai avoziake aṉa, nio sai nio aṉata a viqake kama pado matuma kora kuvili ko kelato jari ama kobeta pesiake aṉako tova vasi.

¹¹Nio kota eri kikolake, “Rikieka ko ṉoṉo qeako quli, ni soroeka koa riki koa sikeura lotu qoqono kasi ko kobeta evako Epesasi, Samena, Peqamami, Taiataira, Sadisi, Piladelepia ni Leodisia,” kikovema.

¹²Aṉata a liliziake a dova vasi tu a velo voa maba vo aṉa o lati pesiani kialake, nio aṉata a qati inotake sikeura qolo papupapu juke ko.

¹³Nio koa sikeura juke ko papupapu ko tiania ta obeta lojoake kala pado maba jaria velo ala, vo okai saboivani ko rosia sabosabo koko tava baroako o kiti raki kasi, vo qolo zadozado okai zadoekani o dumidumi.

¹⁴Voko tou ta tapotapo ama valaka ko tapo jari, ni o vilu ta uza ko urusana jaria urusoma,

¹⁵ni o kiti ta matu bulebule ama barasi jaria kapikapito ama sala. Ni voko kora ko kelato ta omadeuvo ko matuma tovoko zara kale ama jari ama.

¹⁶Vota sikeura suti o palo ṉase kale sala, ni omuqa rana ivoivo ama benisi ta kota va saqorake voko suto kale, ni o loilo ta ṉadale ama ṉaniu ko tipatipato jari ama sala.

¹⁷So keru aṉa a veve keru vo, aṉata ada bousarake voko kiti raki kasi ni aṉata kala voula maba jari ada evake. Sai nio vota olai ivikake voko palo ṉase ni eri la kiolake, “Pui ṉalo! Ako aṉata kiadama quli ko tanitanila ni koko paitopaito lala sole.

¹⁸Aṉata noqola saevo a evani lala! Aṉata lula ada vovini lala inio melai erisaṉa ta a jaeva tu noqola saevo a elou latau ṉaniu ni ka ṉaniu. Aṉata pizato salala tu aṉata mata a jaevimou se voumu, ni aṉata pizato salala tu aṉata a jaqorimou se voumu seke piriziakoi kale azo.

¹⁹“So sole ṉota rikieka ko ṉoṉo qeako quli, koko ereivako quli erisaṉa ni koko ereilo ama quli tova.

²⁰Koa sikeura suti ko ṉoṉo qeako aṉako palo rana ṉase topi, ni koa sikeura qolo juke ko papupapu ko mamola puekako ko kio ni kalo ta eri nio: koa sikeura suti ta koa sikeura lotu qoqono ko mati vailako mateana poso ikio, ni koa sikeura qolo juke ko papupapu ta koa sikeura lotu qoqono ikio.