Read Bilua Kelokelozato 10 Bible Online

Kelokelozato 10 - Bilua bible

Kelokelozato 10

¹Ni aṉata a veake mata kala pado piza kala mateana vo obeta saqorani aukale azo lei valuvalu ni qose kota vai bibuliani voko lezu. Voko loilo ta vo ṉaniu jaria talo ama, ni voko omuqa kiti ta uza barabara jari ama.

²Ni vota o kamakake kama pado silo ama polopolozi buka lula ruparupasi ama o ṉase topi. Vota o lojoake ni o palo rana kiti ta ivere kale, o made rana kiti ta miduku topi ketale,

³nio vota o upaupatake matuma kora kale omadeuvo laione ko matuma zialo jari. Voko upaupato ko tova inio sikeura au kalea paka ta ko opatake koko seqelo kale.

⁴Kobe paikake podoko ko sikeura au kalea paka, ti abe rikieko inio be kialake ko kikolani. Melai aṉata a viqake ko kora aukale azo ko kuevako, ko eri kikolako, “Ṉota mutaka koa sikeura au kalea paka kikolani ni pui rikieko!” kikolako.

⁵Ni voa mateana vo aṉa lula a veani vo o lojoani ivere kale ni miduku topi ketale ta o lojoekake voko palo ṉase aukale,

⁶ni vota kejo o erekake vo Baṉara ko ṉikale, vo noqola kala, vo o erekeni ko au, ni miduku, ni ivere ni kiadama quli sai ko evako quli. Ni voa mateana ta eri kiolake, “Mata puliama taruano ta kopa elou!

⁷Melai so keru voa sikeurala mateana o puzekou keru voko kuvili, ko ikio koa taku so keru vo Baṉara o erekou keru voko vatolo mutamuta kama ko evema, vo kiovevo jari voko nabulu poso se poropita madu kasi.”

⁸Ni koa kora ko aṉa lula a viqema ko aukale azo ko kuevima ta mata ko pesiake aṉa kasi, ni eri kikolake, “Ola tu pa koa koa lula reparepasi ama polopolozi buka voa mateana ko ṉase topi ko evako vo o lojoani ivere kale ni miduku topi ketale.”

⁹So sole aṉata a olake voa mateana kasi ni a basekake koa sasa polopolozi ama buka tu vota o katilo aṉa. Nio vota eri kiolake aṉa kasi, “Koa tu kie ko, ni ṉoko suto kale ta variqore ko epa ko saroro jari kota elou, melai ṉo quirikou saita inio kota paza ko elou ṉoko siapa kale.”

¹⁰Nio aṉata a qoake koa sasa polopolozi ama buka voko ṉase topi azo ni a quake, ta kota variqore ko epa jaria saroro kota la ikake a juto. Melai aṉa lula a quirikake ko ko tova inio paza kota la ikake ko siapa.

¹¹Ni vo Baṉara ta o bazuelake, ni eri kiolake, “Ṉota mata kai bazubazuto pa kai eve vo Baṉara ko bazubazu, koa bazubazu koko kasekako vo o titizimo avo sea kubo toutou poso, se aza pesiomu, kiadama qoqono kale amu, se azaaza tupu amu, ni seko aikovakova madu.”