Read Bilua Kelokelozato 11 Bible Online

Kelokelozato 11 - Bilua bible

Kelokelozato 11

¹Ni kama pado silo ama ore ta ko katiziake aṉa kasi daṉa tinia pado ama, ni a qoake vo Baṉara ko soru ko eri kikolako, “Ola tu pa podetika aṉako Jelepade ni sara, siqato ko zae, ni pa ataema sea maba poso seke ilusatani koa Jelepade kale.

²Melai ṉota pui ṉoda ka podetikou koko kupekupe ama taqo ako kota lula se pui Jiu ama qoqono poso ke katimema sole, seke koqotaeko amu ni ke biresuko amu ko Jerusalema Baṉara ko Tabu ama Peuru zouke sabere varimuja kaboso.

³Ni aṉata a joroekou aṉako omuqa poropita kidi baeke sabosaboa nioqa, buniubuniuo ko sabosabo, nio nioqa inio qokai bazubazutoa nioqa vo Baṉara ko upotuqu sama bazubazu koa zouke sabere varimuja kaboso kale,” lati kiolake.

⁴Nioqa omuqa poropita maba kidi ta omuqa olive ore ni omuqa juke koko lojoako vo miduku ko Lekasa ko kuleto jari Zekaraia o kasekema.

⁵Kake ta ke madoeko niumaeko nioqa kikevou, nio ko uza ta kota saqorou nioqako suto kale azo ni nioqata qo ruvurimou nioqako kana poso koa kalo kale, nio seke madoekani niumaeko nioqa ta keta vouvou.

⁶Nioqata pizato sanioqa tu nioqata qo tibuliko ko oka okale ama tu nioro ta pui ko elou so keru nioqa qokai bazuta keru vo Baṉara ko upotuqu sama bazubazu. Ni nioqata mata ko orori ju dara ko ikako ko pizato sanioqa, ni nioqata mata miduku kai voreko ko azaazama ave poso ko pizato sanioqa, tu nioqata tapata qo ikou ko peuru ma peuru kiada keru nioqa qoka zaria keru.

⁷So keru nioqa qo paikou keru kai bazuto vo Baṉara ko upotuqu sama bazu, matuma biaṉa ta ko saqorou matu rosia saqoroma soqili kale azo ni kota ko kati pazokiniou ni kota ko koqotaekou ni ko vouvaekou nioqa,

⁸ni nioqako tupu ta ko tekuvou koa matu peuru ko keve tona, sai nioqavo Lekasa o vovikoi korosi topi. Koa peuru ko ṉi koko mamola puekako koko ruqe ta Sodomo ni Ijipi.

⁹Ni kake koa toutou poso kale amu, se aza pesiomu, ni koa qoqono kale amu, se azaaza tupu amu, ta ke kelou nioqako tupu zouke ni kama kobu ṉaniu ko poro kale, melai seta pui kepa ka zariovou mutako koa tupu.

¹⁰Ni se miduku kale ke evani maba poso ta kekai zoleilou nioqako vou. Seta kekai okotikiniou soroekinio seko puaro poso tu ke mamola pueko seko zoleilo, ako nioqa omuqa poropita tapata qo imani sea miduku kale amu ta lula qota vouva sole.

¹¹Melai aṉata mata a qeake zouke ni kama kobu ṉaniu ko tova inio ko saevizato ko kozakoza ta ko kuevake vo Baṉara kasi azo ni kota kokai amaqeake nioqa, ni nioqata qo lojoake, nio seke keveni nioqa ta keta matu ṉake.

¹²Nio nioqa poropita kidi ta qo viqake matuma kora aukale azo ko kuevako ko eri kikolako, “Koiko koi!” kikolako. Nio nioqako kana poso ko vilu kasa inio nioqata qo koike aukale leikale.

¹³Koa taku kale inio matuma nunu ta kota evake; ni matu kubo pade matu peuru kale ama ta kota biresuake, tonitoni pade kale azo inio omaomadeu pade kota biresuake, ni sikeura vuro maba poso ta keta vouvake. Koa pado ama vaki ta keta polosake ni ke ilusivake vo aukale ala Baṉara.

¹⁴Vo inio voa omuqala tapata obe paloasani, melai zouke ala tapata ta taukavole ota kilou.

¹⁵Ni mata sikeurala mateana ta o puzekake voko kuvili, so keru inio matuma kora poso ta ko kuevake aukale azo, ko eri kikolako, “Peuru ma peuru kai lekasa puilo ko pizato ta erisaṉa ta animevo Lekasa Baṉara ko, ni vo o pitoeveni Pakio ko, ni koa lekasa puo ta ko elou latau ṉaniu ni ka ṉaniu!”

¹⁶Nio sea karabete ariku lekasa poso seke papuani ke papupapu topi vo Baṉara ko kuleto ta ke loqunake ni seta ke ilusivake vo Baṉara,

¹⁷ni eri kikelake, “Kiadama Pizato sala Baṉara ṉa, ṉo erisaṉa ṉobeta evani ṉa, ni koko tanitanila kale ṉo eveni ṉa! Eṉeta ṉe qaseka eṉeko uriavo ṉokasi ako ṉota lula kasa ṉo ika ṉoko matuma pizato sole, ni lula ṉo danie tu lekasa puo sole!

¹⁸Se kutumana kama maba poso ta keta matu korakoraivake, ako ṉoko korakorailo ko taku ta kota baroake sole, se voumu ko taku ko kovo ko titizato ni reketekete. Noko nabulu poso se poropita madu reketekete ko kovo ko taku ta lula kota baroa ni kiadama ṉoko maba poso, sea kiadamu se keta ṉa paṉaovani ṉo. Se peuru ma peuru ke niumaekani ko niumaemo ko taku ta lula kota barola!” kikelake.

¹⁹Sai nio vo Baṉara ko Jelepade aukale ama ta kota veukaziake, ni aṉata a qeake vo Baṉara ko Leveleveo ko Dolu sai. Ni kapi ta kota laqatake, ni au kalea paka ta kota seresereraitake, ni nunu kota evake, ni aisi lado kailokailo kota evake.