Read Bilua Kelokelozato 13 Bible Online

Kelokelozato 13 - Bilua bible

Kelokelozato 13

¹Ni aṉata a veake kala pado matu biaṉa vo o puratani ivere ko omele azo. Vota toni sotasota sala ni sikeura lezu ala. Koa sotasota poso topi ta lekasa ko tarapae sala, ni koa lezu poso ta ṉi poso kokai rikiziako koko perivako vo Baṉara tu maba poso ta ke ilusivo voa biaṉa ni pui ke ilusivo vo Baṉara.

²Voa biaṉa aṉa a veveni ta vota matula pusi lepodi va kikelani jaria velo ala, ni o kiti ta matula biana bea va kikelani ko kiti jari ama sala, ni o suto ta laione ko suto jari ama sala. Vo matu dole ta o kativake o ṉaviko pizato voa biaṉa, ni matuma naizato tu o ṉavi jari o lekasa puo.

³Ni kama pado lezu voa biaṉa ko ta lula matu tabi ama, vou ko male ama tabi jaria keloma, melai koa matuma tabi ta kota urikake. Nio koa pado ama peuru ma peuru kale amu ta ke luluevake voa biaṉa.

⁴Sea maba poso ta ke ilusivake voa dole, ako vota lula o kativake voko pizato vo biaṉa sole. Ni so jari seta ke ilusivake voa biaṉa, ni eri kikelake, “Puliala inio voa biaṉa jari ala! Puliala inio o rovea vati pazokinio vo!” kikelake.

⁵Ni voa biaṉa ta o zariziake kaseko ko matu aikailo sama pesio, koko perivema vo Baṉara tu maba poso ta ke ilusivo vo biaṉa ni pui ke ilusivou vo Baṉara, ni kota kova zariziake tu vota o lekasa puo zouke sabere varimuja kaboso.

⁶Voa biaṉa ta o taniekake vati levezo vo Baṉara, ni voko ṉi, ni koa zae sai vo o evakoi, ni kiadamu se aukale ke evani.

⁷Ni vota o zariziake tu o mati pazokinio vo Baṉara ko maba poso tu vota o koqotaemo se, ni kova zariziake tu vota oma lekasa puo kiadama koa toutou poso kale amu, se aza pesiomu, ni koa qoqono kale amu, se azaaza tupu amu.

⁸Kiadama maba poso peuru ma peuru kale amu ta ke ilusivou vo, sea kiadamu se pui kopa tama rikiziovini seko ṉi puliako peuru ma peuru ereilo, voa Sipi Meqora vo lula o vouvaini kasi azo ko kuevako noqola kama saevo samu ko ṉi ko buka topi.

⁹Uri tu meme viqani mela komia bazu ta meta paqumukomo meme viqako quli!

¹⁰Vo ke rapevo ala, ta tuvevo avole vota ke rapevou, ni vo benisi kale ke vouvaevo ala, ta tuvevo avole vota ke vouvaevou benisi kale. So sole koa tapata ko melai barou keru vo Baṉara ko maba poso mela ta inobea pataitomo ni kerula emo.

¹¹Ti ko mata abe veake inio kala pado biaṉa vo o puratani miduku kale azo. Vota sipi meqora jaria omuqa sotasota kala, ni dole jaria pesio o eveni.

¹²Vota okai iruruputake voa kuleto ala biaṉa ko matuma pizato voa kuleto ala biaṉa ko tanama kale. Nio vota o zuruzuruemake kiadama peuru ma peuru kale ama maba poso tu seta ke ilusivo voa kuleto ala biaṉa, vo matuma tabi kale sipole o vovini melai kota va urikeni.

¹³Ni nea omuqala biaṉa ta o erekake aqasiele ama iruruputo, vota o erekake ko uza koko saqorako aukale azo miduku kale, kiadama maba poso ko vilu kasa.

¹⁴Ni vota o lipalipaemake kiadama maba poso seke evani miduku kale voko ereko kale koa aqasiele ama iruruputo ko kova zariziako voa kuleto ala biaṉa ko tanama kale. Voa omuqala biaṉa ta o soruemake se maba poso peuru ma peuru kale ke evani tu seta ke erevo kala beku tu keta va ereko ko mamola vo kuleto ala biaṉa benisi kale tabi o eveni, ni vo o saeveni.

¹⁵Ni voa omuqala biaṉa ta o zariziake ni ovai kozatake vo kuleto ala biaṉa ko beku ni o saevivake, sai nio voa beku ta ota pesiake ni o vouvaemake sea kiadamu se pui ke ilusivani vo.

¹⁶Nio voa biaṉa ta o zuruzuruemake kiadama maba poso, lekasa poso ni botoroa maba poso, batiro amu ni ozaoza kamu, mabaku amu ni ruparupasi amu, tu ke vaeko ko mamola seko palo ṉase topi ni seko kape poso topi.

¹⁷Puliala maba ta opa tatabaraekou ma opa kai tatabaraovou puliama koa mamola sala. Koa mamola ta voa biaṉa ko ṉi ma voko ṉi ko naba.

¹⁸Raura kama nianiio kale inio vo nianiiola maba ta o roveovou kati podetato koa naba voa biaṉa ko, ako kota ko mamola pueka kala maba ko ṉi sole. Ni koa naba ta 666.