Read Bilua Kelokelozato 14 Bible Online

Kelokelozato 14 - Bilua bible

Kelokelozato 14

¹Ni koko tova ta mata kama pado uloito jari ama kelokelozato a qeake. Aṉata a veake kala Sipi Meqora ta obeta lojoake Zaione sopu kale 144,000 maba madu sate se voko ṉi ni vovo Mama ko ṉi lula kota ma rikiziovini seko kape poso topi.

²Ni aṉata a viqake kama pado kora aukale azo ama omadeuvo ko matuma tovoko zaru kale ama ko qurumo jari ama, ni au kalea paka ko seqelo jari ama. Koa kora aṉa a viqema ta se mikeo ko maba poso ke kelaeka keru seko mike poso ko kelato jaria viqoma.

³Nio sea 144,000 maba madu ta ke lojoake ni koa Baṉara ko papupapu kasi vasia loilo ke evake, ni koa ariku biaṉa poso, ni se lekasa poso. Ni seta kevai keraovake kala pado vairu ala kera. Seke kiada ke roveani vai nianiio voa kera, se lula ke pakiziani se peuru ma peuru kale ama maba poso kasi azo.

⁴Se inio sea maba madu se pui kepa vaeveni vo Baṉara tu ke ilusiko lipalipa kama quli, omadeuvo kala maba vo pui o vaekani o reko tu o pauveko edoloma jari. Seta ke lulueva vo Sipi Meqora kiadakoi sai vo o olakoi. Seta lula ke tatabarai ni keta pitasiovi kiadama se ruqe ama maba madu kasi azo, seta omadeuvo koa kuleto ama epa kiaro kale ama jari koko katiziako vo Baṉara ni voa Sipi Meqora kasi jari.

⁵Seta maba puliaka taku kepa lipalipate ni seta saruilo pide amu.

⁶Ni aṉata mata a veake kala pado mateana vo o akazani okate vasi okale, noqola kama ni uri ama bazu sala tu o kaseko se miduku kale ke evani maba poso kasi, kiadama toutou poso kasi, se aza pesiomu, kiadama qoqono kale amu ni se azaaza tupu amu kasi.

⁷Ni vota eri kiolake matuma kora kale, “Tava paṉaomo vo Baṉara, ni rauraevomo vo! Ako taku ta kota baroa tu o titizimo kiadama maba poso sole. So sole ilusivomo vo, vo au ni miduku, ni ivere, ni ju poso o erekeni!” kiolake.

⁸Omuqala mateana ta o luluevake vo kuleto ala pado, ni eri kiolake, “Babiloni matu peuru[3] ta lula kota niaqaria! Ako koa peuru kale amu ta matu ruqe ama pauvezato ke erekani ni kemai pakeka koa omadeuma kalo peuru ma peuru kale ama qoqono poso, omadeuvo kala maba ta o kativa edolola maba ko vaini ko ju tu matu doilili o ivo vo.”

⁹Ni zouke ala mateana ta o luluekake nioqa omuqa kuleto ama mateana kidi, nio vota eri kiolake matuma kora kale, “Sea kiadamu seke ilusivani vo biaṉa, ni voko beku, ni seke koani voko mamola seko kape topi ni seko ṉase topi,

¹⁰ta ke kovou vo Baṉara kasi azo ama matuma koqotato, ko akoekato pide ama, omadeuvo kala ta o nozueka ko matu piza kama vaini ko ju jari puliama ju valuvalu ju sama! Sea kiadamu ta ke matu tolailou uza kale ni vualavuala kama naikale se tabu ama mateana poso ni vo Sipi Meqora ko tanama kale.

¹¹Koa uza se ko tolaemako ko kolu ta noqola koilo ko elou latau ṉaniu ni ka ṉaniu. Puliama mamazo samu inio ko seke ilusivani vo biaṉa ni voko beku, ni seke ṉeamukani voko ṉi ko mamola.”

¹²So sole koa taku kale vo Baṉara ko maba poso mela ta inobea pataitomo, meme zorikani mela vo Baṉara ko bazu ni me kerula luluevo me evani mela vo Jisu.

¹³Ni mata a viqake kama pado kora ko kuevako aukale azo ko eri kikolako, “Rikieka ko eri kio: Maurumauru amu inio seke vouvani se erisaṉa azo ke vouvani se omadeu ke vati evani vo Lekasa Jisu!” Ni Tabu ala Auvana ta eri kiola, “Tuvevo avole maurumauru amu inio. Keta zoleilou inio seke mamazani seko matuma iruruputo kale azo, ako seta ke kovou seko nabuluputo ko reketekete sole,” kiolake.

¹⁴Ni koko tova ta mata kama pado uloito jari ama kelokelozato a qeake, ni a qeake ko tapo lei, ni koa lei topi ta obeta papuake kala maba jaria ereere ala ni voko velo ta soa velola, lekasa ko qolo tarapae o kiakani o lezu topi ni bizu likoto ivo ama ta o ṉase topi sala.

¹⁵Ni kala pado mateana ta o saqorake aukale ama Jelepade kale azo ni o upaupaevake matuma kora kale voa pado vo obeta papuani lei topi kasi, “Noko bizu likoto ivo ama kale ṉota kajorika ko muqaroma epa, ako kota baroa koko taku, ni komia peuru ma peuru ta omadeuvo kiaro jari kota musuka koko muqaro kale sole!”

¹⁶Nio voa pado vo o papini lei topi ta o sulupikake voko bizu likoto ivo ama, ni o katimake ko matuma koqotato se peuru ma peuru kale amu omadeuvo vo o kajorikani ko muqaroma epa jari.

¹⁷Ni aṉata mata a veake kala pado mateana vo o saqorani koa aukale ama Jelepade kale azo, ni vo melai bizu likoto ivo ama sala.

¹⁸Ni mata kala pado mateana uza o kati vailani ta o kuevake siqato ko sara, kasi azo. Vota o matu upaupaevake vo bizu likoto ivo ama sala mateana, “Noko bizu likoto ivo ama kale ṉota taka kobueka ko vaini siakona poso ko epa poso miduku kale ama, ako koa vaini ko epa poso ta kota muqara sole!” kiolake.

¹⁹So sole voa mateana ta o sulupikake voko bizu likoto ivo ama miduku topi, nio o kobuekake ko vaini siakona ko epa poso, ni o risaekake vo Baṉara ko korakorailo ko vaini ko ju keta ka zuzuekakoi zama matu teamuteamu ko poro kale.

²⁰Nio koa zuzuzuzu ta ke ijaikake koa peuru ko kupekupe, sea maba poso vo Baṉara omai korakoraivani, ni dara kota nioqololo putake koa zuzuzuzu kale azo nio 300 kilomita tinia vaṉa kota baroake ni koko okate ta ko kati ijatinia puivake ko hose ko suto kale ama qusini ṉomaṉoma.