Read Bilua Kelokelozato 19 Bible Online

Kelokelozato 19 - Bilua bible

Kelokelozato 19

¹Ni koko tova inio aṉata a viqake kama kora matuma vaki ko upaupato jari ama aukale vasi, ko eri kikolako, “Ilusivomo vo Baṉara! Vai ilusikomo animevo Baṉara ko pakiezato, ni voko ṉaṉaidara, ni voko pizato!

²Voko titizato ta matu sidopu ama ni korokoroti ama! Vota kuiripato saṉa lula o ike koa matu jou koko saruemema ko peuru ma peuru kale amu koko ruqe ama pauvezato sama iruruputo kale. Baṉara ta o koqotaeke ko ako kota ko vouvaeme voko nabulu poso sole,” kikolako.

³Ni mata kama upaupato ke evake, “Ilusiva vo Baṉara! Ko kolu koko siqaivako matu peuru kale azo ko koivako ta noqola ko elou latau ṉaniu ni ka ṉaniu!” kikelake.

⁴Nio sea karabete ariku lekasa ni ariku biaṉa saevoma ta ke loqunake ni ke ilusivake vo Baṉara vo obeta papuani o lekasa ko papupapu topi, ni eri kikelake, “Emeni! Ilusivomo vo Baṉara!” kikelake.

⁵Ni kama pado kora ta ko kuevake vo Baṉara ko papupapu kasi azo, eri kikolako, “Me ilusivo animevo Baṉara, kiadama voko nabulu poso mela, ni kiadama maba poso mela, lekasa poso mela ni botoroa maba poso mela, me meda va paṉaovani mela vo!” kikolako.

⁶Ni aṉata a viqake matuma vaki ko kora jari ama kora, omadeuvo ko matuma tovoko zara kale ama ko qurumo jaria qurumo ama, ni au kalea paka ko seqelo jaria kelato ama. Ni aṉata ada ma viqake seko eri kio, “Ilusivomo vo Baṉara! Ako vo Baṉara, vota animevo piza kala Lekasa ni noqola lekasa puola sole!

⁷Animeta me zurailo ni me zoleilo, ni mevai ilusiko voko lekasa puo! Ako vo Sipi Meqora ko bau vuato ko taku ta lula kota baroa sole, ni voko reko ta lula koka inainaovako ko navi sole.

⁸Vo Baṉara ta o katika ko matu vairu ama tapo sabosabo tu kokai saboilo.” (Koa tapo sabosabo ta vo Baṉara ko maba poso ko uri ama iruruputo poso ikio.)

⁹Ni vo mateana ta eri kiolake aṉa kasi, “Rikieka ko eri kio: Maurumauru amu se lula ke taipaziani vo Sipi Meqora ko bau vuato kale,” kio. Ni vo mateana ta o paqulikake koa pesio, ni eri kiolake, “Komi poso ikio vo Baṉara ko tuvevo ama pesio poso,” kiolake.

¹⁰Aṉata a loqunake voko kiti raki kasi tu a ilusivo vo kialake, melai vota eri kiolake aṉa kasi, “Pui ilusilo aṉa! Ako aṉata kala pado ṉokale ala nabulu lala inio, ni ṉoko lotu tamania kalea lala, ni seke kati inazani vo Jisu o puratikema tuveano kalea lala sole. Ilusiva vo Baṉara o kiada. Ako koa tuveano vo Jisu o puratikema ikio se poropita madu komai avoziako sole,” kiolake.

¹¹Ni aṉata a qeake au ko veukazio, ni aṉata a veake kala tapo hose sai. Ni vo o papuani ko topi ta voko ṉi ta Kerula kala ni Tuvetuve ala; vota sidopu ama titizato ni pazokinio sala voko kana poso kasi.

¹²Voko vilu ta uza ko urusana jaria urusoma, ni vota o kiake voko lezu topi kubo lekasa ko tarapae. O ṉi ta kovai rikiziovima ta o ṉavi o kiada inio o paqumuka ko.

¹³Koa rosia sabosabo vo okai saboima ta o kana madu ko dara kale ke duluekema. Ni voko ṉi ta, “Baṉara vo Bazu.”

¹⁴Ni se aukale ama vaki ta ke luluevake vo, seke zazuani tapo ama hose poso topi, se kekai saboivani ko bulebule ama tapo suma.

¹⁵Matu ivo ama benisi ta ko saqorake voko suto kale kude, ko okai koqotaeko ama kiadama peuru ma peuru kale ama qoqono poso. Vota kade ala lekasa oma elou voko aeani daṉa sase, ni vota o vouvaemou se, vo Kiadama Pizato sala Baṉara ko matuma iqailo sama korakorailo kale omadeuvo kala maba ota ka zuzuekani vaini ko epa ko ju jari.

¹⁶Voko rosia sabosabo ni kiti topi ta ko rikiziovi koa ṉi: “Piza kala Aikovakova kiadama aikovakova madu azo ni Piza kala Lekasa kiadama lekasa poso azo,” ikio koa ṉi.

¹⁷Ni mata aṉata, a veake kala mateana vo obeta lojoani ṉaniu topi. Vota o matu upaupaemake se biaṉabiaṉa poso seke akazani matu okate vasi okale, “Kuemo, tu padoimo vo Baṉara ko matuma ṉojola kale!

¹⁸Kuemo, tu pa tama kumo se aikovakova madu ni se sirula madu ko marabau, ni se parani amu ko, ni hose poso ni se kekai zazuani ko ko marabau, ni kiadama maba madu ko marabau, mabaku amu ni lekasa poso!” kiolake.

¹⁹Nio aṉata a veake vo biaṉa ni komia peuru ma peuru ama aikovakova poso ni seko pazokinio ko maba madu ke padoivani, tu seta ke vati pazokinio vo o zazuani hose topi, ni ke kati pazokinio voko pazokinio ko vaki.

²⁰Ni seta ke noqoevake voa biaṉa ni ke noqoevake voa lipalipa kala poropita vo o erekani ko aqasiele ama iruruputo voa biaṉa ko tanama kale. (Koa aqasiele ama iruruputo omai lipalipaekema seke koeni vo biaṉa ko mamola ni keta va ilusikeni voko beku.) Ni voa biaṉa ni voa lipalipa kala poropita ta omadeu risaeko ke evake saevoa nioqa uza kolabale ni ke siqaekake nai sama uza kale.

²¹Ni nioqako pazokinio ko maba poso ta vo hose topi o zazuani maba ta o vouvaemake voko suto kale kude ko saqorako benisi kale; nio kiadama biaṉabiaṉa poso ta matu pudopudoli kekai evake seko marabau.