Read Bilua Kelokelozato 20 Bible Online

Kelokelozato 20 - Bilua bible

Kelokelozato 20

¹Ni aṉata mata a veake kala mateana vo obeta saqorani aukale azo, vo o ṉase topi ta matu saqoroma rosia soqili ko vidulu sala ni kama pado duki ama seini sala.

²Vota o saputivake vo matu dole, vo kuleto o eveni dole, voa ziolo vo Setani va kikelani, ni voa mateana ta o pirievake voa dole koa seini kale omadeu vuro sabere ko tiniavo ama taku kale.

³Vo mateana ta ovai risatake voa matu dole matu saqoroma rosia soqili ko poro kale, ni vinavina tibuliko o evake koa soqili, tu voa matu dole ta pui mata o lipalipaekou ko peuru ma peuru kale ama qoqono poso ti kobeta paloasou ko omadeu vuro sabere. Koa taku ko tova, vota o rupasiovou kama puju ama taku kale.

⁴Sai nio aṉata a qeake kama lekasa ko papupapu poso, ni sea maba poso sai ke papuani; seta ke koake ko titizato ko pizato tu seta ke ereko ko titizato. Ni aṉata mata a qeake seke lezuemeni maba poso ko auvana se kekai bazubazuteni koa tuveano vo Jisu o puratikema ni vo Baṉara ko bazu. Se pui kepa ilusiveni vo biaṉa ni voko beku, ni se pui kepa koeni vo biaṉa ko mamola seko kape poso topi ni seko ṉase poso topi. Se inio ke saeve ni aikovakova poso ke eve ni ke lekasa puake vo Karisito sate omadeu vuro sabere ko tiania.

⁵Melai sea kiadamu ke vovini ta pui kepa saeve ti kobeta paloase koa omadeu vuro sabere. Ni ke lezuemeni ko mata saevo ko kiada ikio ko kuleto ama mata saevo voukale azo ama.

⁶Matuma mauruto ke koa se kekai zomanani ko kuleto ama mata saevo voukale azo. Ako omuqama vou ta puliama pizato kopa elou se tona; ni seta vo Baṉara ko tabu ama siama poso ke elou ni Karisito ko, ni seta ke vati lekasa puovou omadeu vuro sabere kale sole.

⁷Ni omadeu vuro sabere ko tova inio vo Setani ta o rupasiovou voko piri kale azo,

⁸ni vota o saqorou ni o lipalipaekou komia peuru ma peuru kale ama matuma qoqono poso ko Qoqi ni Meqoqi ṉi sama. Ni vo Setani ta o padoemou sea kiadamu tu ke pazokinio, nio seko ataataiti ta omadeuvo ko keta kale ama karokoni ko kubo jaria kubo amu.

⁹Seta kekai pailailou ko pado ama peuru ma peuru ni ke qoloekou vo Baṉara ko maba poso ko pade poso ni koa matu peuru vo o roquekake. Melai ko uza ta ko saqorou aukale azo ni ko muovou.

¹⁰Nio vo Setani, vo o lipalipaemani se, ta ke risaevou nai sama uza ko urusana ko tiania, sai vo biaṉa ni vo lipalipa kala poropita lula ke risaekakoi. Sai nio sea zouke ke kovoa koi ko noqola kama tola ipu ni ṉaniu, latau ṉaniu ni ka ṉaniu.

¹¹Ni aṉata mata a qeake matuma lekasa ko papupapu tapotapo ama ni vo o papuani ko topi. Miduku ni au ta kota va soqoike voko tanama kale azo, ni kota parakake.

¹²Ni aṉata a meake se voumu lekasa poso ni botoroa maba poso se kebeta lojoani koa papupapu ko kuleto. Ni se mateana madu ta ke redanikake se voumu ko iruruputo ko bazu sama buka poso, ni mata ka pado ko noqola saevo samu ko ṉi ko buka ta ke redanikake. Ni se voumu ta ke koake koko vaitotola ma koko reketekete ko se lula ke erekako ruqe ni uri kale avo, ko lula buka poso kale ko rikiziako kale.

¹³Ni ko ivere ta ko puratime se voumu sai ke vovini. Vou ni Heli, ta qo puratime se voumu nioqa qo mati vailani. Sea kiadamu ta ke koe koko reketekete se lula ke erekako ruqe ni uri kale avo.

¹⁴Ni Vou ni Heli ta ke risaekake koa nai sama uza ko urusana ko tiania. (Komia uza ta omuqama vou ko uza ikio.)

¹⁵Ni sea kiadamu se pui kota ma rikiziani seko ṉi saevo samu ko ṉi ko buka topi ta ke risaivake koa uza ko poro kale.