Read Bilua Kelokelozato 22 Bible Online

Kelokelozato 22 - Bilua bible

Kelokelozato 22

¹Ni vo mateana ta mata ola kasekake aṉa ko noqola kama saevo ko katimako orori ko ju, koko saqorako qelasi jaria simanamana kama Baṉara ni Sipi Meqora ko papupapu kasi azo,

²ni kota ko rerea koa matu peuru ko keve ko kolabale. Koa orori ko omuqa tana topi ta ko qotupa koa noqola kama saevo ko katimako ore, koko epamatako toni omuqa taku omadeu sabere kale, kota ko epamata kaboso poso sole, ni koko leko ta peuru ma peuru kale ama qoqono poso mai urikiko lomaloma.

³Puliama vo Baṉara okai levezako quli ta kopa puratou koa matu peuru kale. Vo Baṉara ni Sipi Meqora ko lekasa puo ko papupapu ta ko elou koa matu peuru kale, ni voko nabulu poso ta ke ilusivou vo.

⁴Seta keta va kelou voko loilo, ni voko ṉi ta kota ma rotiziovou seko kape poso topi.

⁵Sai ta puliama ipu kopa elou, ni seta pui kepa ka zariovou ko juke ni ṉaniu ko zakaremu, ako vo Baṉara sevo Lekasa inio sevo zakaremu o elou, ni seta aikovakova ke elou latau ṉaniu ni ka ṉaniu.

⁶Ni vo mateana ta eri kiolake aṉa kasi, “Komia bazu ta tuvevo ni kerula kama bazu. Ni vo Baṉara vo o katimani voko Tabu ama Auvana se poropita madu, ta o soroeve vovo mateana tu oma kaseko voko nabulu poso ko taukavole ko ereilo ama quli,” kiolake.

⁷Eri kiola vo Jisu, “Viqomo! Aṉata a qilou taukavole!” kiola. Maurumauru amu seke zorikani ko pidokato ko bazu komia buka kale ko evako.

⁸Aṉa Jone lala inio a viqeni ni a qeveni lala kiadama ko quli poso. Nio aṉako viqo ni kelo ko tova, aṉata a loqunake vo mateana vo ola kasekeni kiadama ko quli poso ko kiti raki kale tu aṉata a ilusivo vo, kialake.

⁹Melai vota eri kiolake aṉa kasi, “Ṉota pui ilusilo aṉa! Aṉata kala pado ṉokale ala nabulu lala sole, ni ṉoko lotu tamania kalea lala, ni se poropita madu ni seke zorikani komia buka kale ama bazu kalea lala sole. Ṉota ilusiva vo Baṉara o kiada!” kiolake.

¹⁰Ni vota mata eri kiolake aṉa kasi, “Ṉota pui tama mutako se maba poso komia buka ko pidokikake bazubazu, ako ko taku koko kasekako quli ko ereilou keru ta sipole sole.

¹¹So sole vo ruqe ala maba ta vaeka tu ruqe obeta erekato, ni vo kuna kama iruruputo o erekani ta vaeka tu koa kuna kama quli obeta erekato. Ni vo sidopu ala ta vaeka tu sidopu ama quli obeta erekato, ni vo o tabutabuani vo Baṉara kasi ta vaeka tu o tabutabuo!”

¹²Eri kiola vo Jisu, “Viqomo! Aṉata a qilou taukavole! Aṉata a qati kilou ko vaitotola ni reketekete tu amai okotiko se maba poso koko male ama lula seke erekako ruqe ni uri kale avo.

¹³Aṉata kulekuletoa lala ni tovatova lala, ko tanitanila ni koko paitopaito lala,” kiola.

¹⁴Maurumauru amu ko seke pusaekani seko rosia sabosabo poso ni vairu ke ikani! Ako se inio ko seke maleziko amu tu kuo koa noqola saevo ko katimako ore ko epa, ni seta ke amaqeovou koa matu peuru ko veutu poso kale.

¹⁵Melai koa matu peuru ko kupekupe ta inisiana se siele jari ke kavani ruqe ama kalo ke luluekani, ni se kakokakoto ke erekani, ni se ruqe ama iruruputo ke pauvekani, ni seke vouvatani, ni seke ilusikani ko beku, ni seke lipalipatani seko pesio poso kale ni seko iruruputo poso kale.

¹⁶“Aṉa Jisu lala ta a joroeve aṉavo mateana ni vota o kaseke komi quli mea lotu qoqono poso kalea mela kasi. Aṉa inio ko vo Devita ko vikuvikula kalea lala ni aṉa inio vo uria talolola raneodola lala.”

¹⁷Vo Tabu ala Auvana ni vo Jisu ko reko[9] ta eri kiqola, “Kua, Lekasa Jisu!” Ni uri tu kiadamu ke viqani komi ta mata “Kua, Lekasa Jisu!” kikevou. Kua, ṉoṉo rokauvani ṉa tu pa koa ko noqola kama saevo ko katiṉo ama ju tabara pide ama.

¹⁸Aṉa Jone lala ta a balauvimela mea kiada mela meme viqani mela ko pidokato sama bazu poso koko evako komia buka kale, ko eri: esa kalaṉa ta ṉoqa zariovou kati padoto kama quli sai, ta Baṉara ta mata o ṉati padotou ṉo ko koqotato koa ave poso koko kaseima komia buka kale.

¹⁹Ni esa kalaṉa ta ṉo ṉamukou kama koko pidokato ko bazu poso koko evako komia buka kale, ta Baṉara ta ota ṉa ṉamukou ṉoko kenakena koa noqola kama saevo ko katimako ore ko epa kale ama, ni ṉoko zae voko Tabu ama Peuru kale ama, koko kaseima komia buka kale.

²⁰Vo kasa olai ikeni kiadama komi quli poso ta eri kiola, “Tuvevo, taukavole aṉata a qilou.” Emeni tu kua, Lekasa Jisu!

²¹Vo Lekasa Jisu ko pakiezato sama roquano ta ko elou mea kiada mela Baṉara ko maba poso mela tona.