Read Bilua Kelokelozato 4 Bible Online

Kelokelozato 4 - Bilua bible

Kelokelozato 4

¹Ni koko tova ta mata kama pado uloito jari ama kelokelozato a qeake. Aṉata a dadatake ni a qeake aukale ko veukaveuka kama veutu. Sai nio koa kuvili ko kelato jari ama kora ko lula ko lati pesiovima ta eri kikolake, “Koivi koi nio aṉata aṉa kasekou ko quli ko ereilo ama quli komia erisaṉama taku ko tova.”

²Nio taukavole vo Tabu ala Auvana ta olai sukatake aṉa. Sai nio aṉata a qeake kama pado lekasa ko papupapu aukale o ṉavi Baṉara obe kai papuako.

³Voko velo ta mudamuda kama lado poso jasipa ni karaneliani jaria luqumu ni diri simanamana kama; ni koa papupapu ko levoano kale ta qose rerevana sama ko luitikake luqumu lado emerali jari ama.

⁴Voa papupapu ko levolevoani tetebara kale ta mata kobeta evake mata karabete ariku papupapu ko karabete ariku lekasa poso kebe kai papuako se tapo sabosabo amu, ni qolo tarapae ke kiakani seko lezu topi.

⁵Voa papupapu kasi azo inio ko kapi ta ko laqatake, ni ko au kalea paka ta kota seresereraitake. Ni sikeura juke bainoma ta kobeta bainake voa papupapu ko kuleto vasia rana; ko ikio vo Baṉara ko sikeura auvana.

⁶Ni mata voa papupapu ko kuleto vasia rana ta ivere mudamuda kama jaria kelo ama, koko kapikapitako qelasi lado jaria bulebule ama. Ni koa tianiama papupapu ko levoano koko ariku rana vasi ta kobeta evake ariku biaṉa saevoma, ko kuleto ni tova kubo vilu sama.

⁷Ni kuleto ala ta laione jaria velo ala; omuqala ta bulumakau jaria velo ala; zouke ala ta maba loilo ala; ni ariku ala ta kala zako o akazani jaria velo ala.

⁸Ni koa ariku saevo ama biaṉa ta varivarimuja koko zabu sama, ni koko zabu ta topi ni vima vilu sama ni pui ke mamazani kerao ipu ni ṉaniu, se eri kikelani: “Tabu ala tisoiko vo Kiadama Pizato sala Baṉara, vo koko tanitanila kale o eveni, ni vo erisaṉa obeta evani, ni vo mainio opa kilo ala,” kikelani.

⁹Ni koa ariku saevo ama biaṉa ta kokai keraova ko ṉaṉaidara ni raurato ni uriavo sama kera poso vo papupapu topi o papuani kasi, vo noqola saevo ala latau ṉaniu ni ka ṉaniu. So keru se kebeta keraova keru inio

¹⁰sidopu avole sea karabete ariku lekasa poso ta ke loquna voa papupapu topi o papuani ko kuleto ni seta ke ilusiva voa noqola saevo ala. Ni seta ke ivika seko lekasa ko tarapae voko papupapu ko kuleto ni eri kikela,

¹¹“Eṉevo Lekasa ni ṉe Baṉara ṉa! Ko male tu eṉeta ṉe ṉaṉaidara pueṉou, ni ṉe rauraeṉou, ni ṉeṉai ilusikou ṉoko pizato, ako ṉo inio ṉo erekeni ṉa kiadama quli sole, ni ṉoko vatolo kale inio kota ko tanite ni saeve,” kikela.