Read Bilua Kelokelozato 6 Bible Online

Kelokelozato 6 - Bilua bible

Kelokelozato 6

¹Nio aṉata a veake voa Sipi Meqora ta ota va rupasikake kuleto ala koa polopolozi buka ko sikeura vinavina kale ala, ni aṉata ada va viqake kala pado koa ariku saevoma biaṉa kale ala ko au kalea paka ko kelato jari ama kora, “Kua!” kikolako.

²Nio aṉata a lilitake ni aṉata a veake kala tapo ala hose. Voa hose ta maba ovai zazuani sala, bokala o kamakani. Ni vo Baṉara ta o kativake ko lekasa ko tarapae, ni voa koqotato ko maba ta o olake tu o koqotato.

³Nio voa Sipi Meqora o rupasike keru koa omuqama vinavina inio aṉata a viqake vo omuqala saevola biaṉa ko kora ko eri kikolako, “Kua!” kikolako.

⁴Ti ko mata kala pado hose diri ala inio obeta puratake. Ko topi o zazuani ta vo Baṉara ta o kative ko pizato tu o kati kilo ko pazokinio miduku kale tu maba poso ta ke vouvaekinio ke ṉavio kude, ni vota o koe kama pado matuma benisi.

⁵Ni voa Sipi Meqora ta mata o rupasikake zouke ama vinavina; nio aṉata ada va viqake zouke ala saevola biaṉa ko eri kio, “Kua!” kio. Nio aṉata a lilitake ni a veake kala pado sibi ala hose. Ni vo okai zazuani ko ta o kamakake ko podepodeti, lomaloma ko duki kekai podetikako.

⁶Ni a viqake maba ko kora jari ama koa ariku saevoma biaṉa ko tiania vasi azo ko eri kikolako pesio, “Ṉota puju ṉoda ma ikou se maba poso ko sailao. Omadeu kilo vuiti, ta pado ama ṉaniu ko tabara, ni zouke kilo bale ta mata kala ṉaniu ko tabara. Melai ṉota pui ṉoda ma niumaekou ko olive ore ni vaini kiaro!” kikolako.

⁷Nio voa Sipi Meqora ta mata o rupasikake ariku ama vinavina, nio aṉata a viqake ariku ala saevola biaṉa ko eri kio, “Kua!” kio.

⁸Nio aṉata a veake sai kala daledale ala hose. Ni voa maba vo ovai zazuani voa hose ko ṉi ta Vou, ni Heli, ta mata kala vo sate ala. Nioqata qo koake ko pizato, tu nioqata qo vouvaemo matu kubo maba poso, ariariku maba poso kale azo omaomadeu maba ta qo vouvaemou komia peuru ma peuru kale pazokinio kale, ni luapo kale, ni piru ama biaṉa poso kale.

⁹Nio voa Sipi Meqora ta mata o rupasikake sike ama vinavina, sai nio aṉata a qeake se lula ke vovini ko auvana poso sara, ko raki kasi seke vouvaini seko kerula kai bazubazuto kale vo Baṉara ko bazu.

¹⁰Seta ke pesiake matuma kora kale, ni eri kikelake, “Kiadama Pizato salaṉa, Tabua laṉa ni Tuvevoa laṉa! Noi keru tinia inio ṉoṉo ditizimo avo ni ṉo qatimo avo ko koqotato se miduku kale ke evani maba poso, seko eṉeko vouvaeṉelo ko kio kale avo?” kikelake.

¹¹Ni vo Baṉara ta o katimake sea kiadamu ko rosia tapo sabosabo, ni vota o bazuemake tu silo pala taruano inio ke elou, ti kobeta okotou seko lolo poso vo Baṉara ko nabulu poso ko ataataiti, se mainio ke vouvaemo amu.

¹²Ni so keru voa Sipi Meqora o rupasike keru koa varimujama vinavina inio aṉata a qeake matuma nunu ta kota evake, nio vo ṉaniu ta mukamuka kama suma jaria matu sibisibi ota evake, ni vo kaboso ta maba dara jaria diridiri ota evake.

¹³Ko suti poso ta kota piake miduku kale, omadeuvo ko piqi, ore ko poji ama epa piza kama ururu ko vilieka ta ko piako jari.

¹⁴Ko au ta kota vaekaziake omadeuvo ko kobo maba ko lokiekako jari, ni kiadama sopu poso ni udu poso ta kota vatutake koko zae poso kasi azo.

¹⁵Nio se peuru ma peuru kale ama aikovakova poso, ni se raura kamu ni parani poso, ni se batiro amu, ni se piza kamu ni mata kiadama maba poso, se mabaku poso ni se pui mabaku amu ta keta mutaivake keaka poso kale ni lado poso ko vima sopu poso kale.

¹⁶Nio seta eri kikelake koa sopu poso ni koa lado poso kasi, “Ṉelai pialomo tu daipaeṉelomo eṉe vo papupapu topi o papuani ko vilu kasa azo ni voa Sipi Meqora ko korakorailo kale azo!

¹⁷Nioqako matuma korakorailo sama ṉaniu ta lula kota barola, nio puliala inio o roveovou taka pataito ko!” kikelake.