Read Bilua Kelokelozato 8 Bible Online

Kelokelozato 8 - Bilua bible

Kelokelozato 8

¹So keru vo Sipi Meqora o veukake keru koa sikeurama vinavina ta olomoiza kota evake sai aukale kama kobu aoa tiniavo.

²Nio aṉata a meake sea sikeura mateana madu ke lojoani vo Baṉara ko kuleto, se o katimeni sikeura kuvili.

³Ni mata kala pado mateana vo bube siqato ko qolo teamuteamu o kamakani ta o kuevake ni o lojoake sara, ko sipole. Ni kubo bube siqato ko ta ko katiziake vokasi tu vota o kati padoeko kiadama vo Baṉara ko maba madu ko vararaito poso, ni vota o siqaekake ko koa qolo sara topi koko lojoako koa papupapu ko kuleto.

⁴Nio koa bube siqasiqa ko kolu ta ko koivake vo Baṉara ko maba madu ko vararaito sase vo mateana ko ṉase topi azo vo obeta lojoani Baṉara ko kuleto.

⁵Nio sai nio vo mateana ta o koake koa bube siqato ko teamuteamu, ni okai sukatikake ko uza koa sara kale azo ama, ni vota o risaekake ko miduku topi. Ti ko au kalea paka ikio kobeta seresereraitake, ni matuma laqato sama kapi kota evake, ni nunu kota evake.

⁶Nio sea sikeura mateana madu ta ke inainaoke tu seta ke puzeko seko sikeura kuvili.

⁷Ni vo kuleto ala pado mateana ta o puzekake voko kuvili. Nio ko aisi lado tibilili ni uza, dara valuvalu ama ta ko piake miduku topi. Ni zouke ama kobu miduku ta kota siqaike, ni zoukezouke ore poso kale azo omaomadeu ore ta kota siqaivake, ni kiadama qotuqotu poso ta kota siqaivake muli.

⁸Ni vo omuqala mateana ta o puzekake voko kuvili. Nio kala pado quli omadeuvo kala matula sopu vo o urusani jari ala ta ota ṉamuike ivere kale. Nio ko zouke ama kobu ivere ta dara kota evake,

⁹ni zoukezouke saevoma biaṉa poso ivere kale ama kale azo ta omaomadeu biaṉa ta kota vouvake, ni zoukezouke vaka poso kale azo ta omaomadeu vaka ta kota niumaike.

¹⁰Ni mata voa zouke ala mateana ta o puzekake voko kuvili. Ti ko kala matu suti nio kezuzu jaria siqailo obeta evake, ni o piake okale azo ni o piake zoukezouke ju poso kale azo omaomadeu jukale.

¹¹Voa suti ko ṉi ta Paza. Ni zoukezouke ju poso kale azo omaomadeu ju ta paza kota evake koko ju, ni matu kubo maba ta keta vouvake koa ju ke nozuekani, ako kota paza kota evake sole.

¹²Ni vo ariku ala mateana ta o puzekake voko kuvili. Nio vo zouke ala kobu ṉaniu ta ota vouvake, ni so jari zouke ala kobu kaboso ni mata zouke ala kobu koa suti poso kasi azo, so sole seko zakaremu ta kutumana kota evake koa zouke ama kobu taku, nio zouke ala kobu taku ṉaniu ko poro kale ta puliama zakaremu ko evake ni so jari koa zouke ama kobu taku ipu kale.

¹³Ni aṉata a lilitake ni ada va viqake kala zakaparau vo o akazani matu okate vasi okale ko matuma kora ko eri kikolako, “Kei! Kei! Matu ṉaloṉalo ama quli se miduku kale ke evani kasi ta ko elou so keru sea zouke mateana se pui nio ke puzetani ke puzekou keru seko zouke kuvili!” kikolako.