Read Bilua Kelokelozato 9 Bible Online

Kelokelozato 9 - Bilua bible

Kelokelozato 9

¹Ni mata vo sike ala mateana ta o puzekake voko kuvili. Ni aṉata a veake kala pado suti vo lula o piani miduku topi, ni vo Baṉara ta o kativake vo koa rosia saqoroma soqili ko vidulu ziolo poso ko piriziakoi ko.

²Ni voa suti ta o veukake koa rosia saqoro ama soqili ti kolu kota saqorake sai kazo. Ni koa matu vualavuala kama uza ko kolu jari ama kolu koa rosia saqoro ama soqili kale azo ko koivima ta kutumana ko ikake ko ṉaniu ko zakaremu ni koa oka.

³Nio ko niopi poso ta ko saqorake koa kolu kale azo ti kota piake miduku topi, ni koa niopi poso ta ko koake ko sikupetala jari ama nanato ko pizato.

⁴Seta ke bazuike tu seta pui ke niumaeko ko peuru ma peuru kale ama seulele ni ore poso ni kama papapapa, seta ke niumaemou pala sea maba poso se puliama vo Baṉara ko kejo samu seko kape poso topi.

⁵Koa niopi ta pui ko vouvaema sea maba poso, melai kota ko katima ko tola sike kaboso ni koa tola seko ta sikupetala ko nanato ko tola jari ama.

⁶Koa sike kaboso ko tiania ta seta ke vailikou se kekai vouvo avo melai seta pui kepa kelou ko, seta keka zariovou vou melai seta pui kepa vouvo amu inio.

⁷Koa niopi poso ko kelo ta omadeuvo ko hose poso koko inainaivako tu pazokinio kaqe jari amu, ni seko tarapae ta lekasa ko qolo tarapae jari ama ni seko loilo poso ta maba ko loilo jari amu.

⁸Seko tou ta rekoreko ko tou jaria rosi ama, ni ke taka ta laione ko taka jaria ivo ama.

⁹Seko dumidumi ta kekai saboeka ko dumidumi topi ke ikako aeani zadozado jaria kelo ama kale, ni seko zabu ko kelato ta omadeuvo ko totiaqolo kubo hose ko rajaekako pazokinio kale ko amaqea keru jari.

¹⁰Seko sipuku ta sikupetala ko sipuku jari ama, ni koa sipuku poso kale inio ko evakoi ko sike kaboso tola ko imako tola se maba poso ko pizato.

¹¹Seta ke aikovakova oma lekasa puani samu inio, vo inio vo mateana koa rosia saqoroma soqili o kati vailani. Voko ṉi Hiburu pesio kale ta Abadoni, Quriki pesio kale ama ṉi ta Apolione, ni koa ṉi ko kio ni kale ta “Vo o ruvuzatani” kio.

¹²Vo inio voa kuleto ala tapata obe paloasani, melai koko tova ta mata omuqa tapata ta ko elou.

¹³Ni vo varimujala mateana ta mata o puzekake voko kuvili, ni aṉata a viqake kama pado kora koko kuevako qolo sara, ko ariku suba kale azo koko lojoako vo Baṉara ko kuleto.

¹⁴Koa kora ta eri kikolake voa varimujala mateana kasi, “Rupasima sea ariku mateana se piri kale kebeta evani Iupareiti matu sukuru kale!”

¹⁵Nio sea ariku mateana ta ke rupasiake maba koa aoa kale, ni koa ṉaṉiu, ni koa kaboso ni sabere kale ko vo Baṉara lula o inainaemeni tu koa taku kaqe amu, tu seta ke vouvaemo se maba madu. Ni seta ke vouvaemou matu aqasielea kubo maba poso, zoukezouke maba poso kale azo omaomadeu maba ta ke vouvaemou.

¹⁶Se hose topi ama pazokinio ko maba madu ko ataataiti ta ko kaseivake aṉa kasi, ta seta omuqa paizana milioni madu inio.

¹⁷Ni aṉako kelokelozato kale ta aṉata a meake koa hose poso ko kekai zazuani maba poso: seta dumidumi topi ama zadozado samu uza jaria diridiri ama, ni kota mudamuda kama lado sapaea jaria luqumu ama, ni nai jaria vaqovaqo ama. Koa hose poso ko lezu ta laione ko lezu poso jari ama, ni seko suto kale azo ta kota saqorake ko uza, ni kolu, ni nai.

¹⁸Aqasielea matu kubo maba poso, zoukezouke maba poso kale azo omaomadeu maba ta ko vouvaemake koa zouke ave, koa uza, ni kolu, ni nai koko saqorako koa hose poso ko suto kale azo.

¹⁹Ako koa hose poso ko vouvato ko pizato ta ke suto kale inio ko evakoi ni ke sipuku poso kale sole. Seko sipuku poso ta dole lezu sama jari ama, nio kokale inio maba madu ke tolaemani.

²⁰Sea kiadama maba poso se pui ko vouvaemani koa zouke ave ta pui kepa liliziovi seko beku poso ke ṉavi ke erekema kasi azo. Seta pui kepa epeze ilusiko ko ziolo, ni koa beku poso, ko qolo, ni siliva, ni boronisi, ni lado, ni ore kale ke erekema, ko pui ko roveako keazato, ni viqaviqazata, ni talio.

²¹Mata seta pui kepa liliziovi seko vouvato kale azo, ni seko kakokakoto kale azo, ni seko pauveko ruqe ama iruruputo kale azo ni seko kuilo kale azo.