Read Bima MATIUS 10 Bible Online

MATIUS 10 - Bima bible

MATIUS 10

¹D̄isab̄ua ainaina Ruma Isa ou kab̄orona anamori-Na sampuru d̄ua ede. Edempara Sia mbeina d̄i siad̄oho kuasa d̄i b̄aka kalosakaina roh-roh seta ro d̄ikatahokaina samenana supu ro sara'a pahu ma'iha sarumbu.

²Ngara sampuru d̄ua rasu ede, eded̄u: sarambakaina, la Simon (d̄ipehekai rau la Petrus) lab̄o arina la Andreas, edempara la Yakub ro arina la Yahya, eded̄u ana-ana la Zebedeus.

³Sawa'u b̄a ede la Filipus ro Bartolomeus, lab̄o la Tomas, ro la Matius, mataki tagi bea ro la Yakub ana la Alfeus, ro la Tadeus;

⁴Edempara macumpukaina la Simon, la Patriot ro la Yudas Iskariot ma d̄onggo Ruma Isa d̄i dou-dou ma musu-Na.

⁵Sampuru d̄ua rasu ede nggadu b̄a Ruma Isa lao kai rakana ngoa ra tei b̄une ake, ”Aina laomu aka dana ra rasa dou ma laina Yahudi. Ai rauna laomu aka kota-kota dou Samaria.

⁶Pala laopu aka dou-dou Israel, mapenti aka siad̄oho ma santuda.

⁷ Ngoapu siad̄oho b̄a one Karaja'an Saroga wa'ura d̄eni.

⁸Katahopu dou-dou ma supu; kamori mbodapu dou-dou ma made; katahopu dou-dou ma ncola, ro b̄aka kalosapu roh-roh seta. Nggomid̄oho mawa'ura tarima sara'ana ede kai mpoa. Ndad̄i, mbei mpoa raupu.

⁹Aina wa'amu piti masa, piti salaka, atao piti goba rau.

¹⁰ Ai rauna wa'amu kad̄ud̄u d̄irahokaimu sadeka, atao d̄ua ndo'o kani ra lombo d̄i ade lampa ra laokaimu, atao sapatu, atao tiki rau. B̄ara dou ma karawi, mustiku d̄imbei au raparaluna.

¹¹Nggara nggomid̄oho wa'usi rongga d̄i kota atao kampo, ngupapu sab̄ua dou ma ne'e tarima nggomid̄oho. Ngge'epu lab̄o dou ede sampe nggomid̄oho lao walimu.

¹²Wakatu nggomid̄oho lu'umu d̄i ade uma, nggahipu, ’Raho-raho to'impa Ruma mbeina bareka nggomid̄oho.’

¹³Nggara dou-dou d̄i uma ede natarimasi nggomid̄oho, co'opu salammu ede nangge'e mpa d̄i siad̄oho. Pala nggara siad̄oho wati tarimana nggomid̄oho, weha b̄atupu salammu ede.

¹⁴ Nggara warasi uma atao kota mawati ne'e tarima nggomid̄oho atao ma wati ne'e ringa au ratei b̄a nggomid̄oho, tu'u wi'ipu hid̄i ede ro furapu kalub̄u mawara d̄i kopa ed̄imu.

¹⁵ Kawarapu! D̄i Ainana Kiama, dou-dou kota Sodom ro Gomora nawancuku ncewi mod̄ana d̄ikangampu wea b̄a Ruma Hatalla, ntewikaisi dou-dou d̄i kota ede.”

¹⁶ ”Ringa kab̄aepu ake: Nahu manggadu nggomid̄oho b̄une jimba ma wati loa au-au d̄i ade woha lako doro manggange. Nggomid̄oho jaga-jagapu b̄une sawa ro nira ademu b̄une nasi dara.

¹⁷ Jaga-jagapu b̄ara nggomid̄oho d̄iwa'u ra d̄ileto ro d̄iwa'a aka mahkama-mahkama. Nggomid̄oho d̄ikancoki aka uma-uma sambeakai.

¹⁸Nggomid̄oho d̄iwa'a aka tando dou mana'e-na'ekaina ro d̄itando sangaji-sangaji b̄ara nggomid̄oho anamori Nahu. Ro edeku wakatuna d̄i ru'u b̄a nggomid̄oho d̄imbeikaimu sakasi mab̄oha Nahu d̄i siad̄oho ro d̄i dou-dou ma wati pata Ruma Hatalla.

¹⁹Pala nggara nggomid̄oho d̄iwa'a ru'u d̄iparesa, aina darura auku d̄inggahi ra nuntu b̄a nggomid̄oho atao b̄uneku d̄i nuntu ra nggahi b̄a nggomid̄oho ede. B̄ara au d̄ipab̄ua d̄i nuntu ra nggahi b̄a nggomid̄oho ede, d̄ingoa d̄i nggomi rakasi wakatuna.

²⁰B̄ara ma nuntu wakatu ede laina nggomid̄oho, malaisi Roh Ama ma d̄i saroga, kai ncai nggomid̄oho.

²¹ D̄imandad̄i b̄a one dou d̄imad̄onggo ari ra sa'e ndaina d̄i hade. Ro ede rau d̄imandad̄i d̄i weki ama lab̄o anana. Anad̄ohona d̄ima'ao ina ra amana, ro nad̄onggoku siad̄oho d̄i hade.

²² Nggomid̄oho d̄i daca'u b̄a samenana dou b̄ara nggomid̄oho anamori Nahu. Pala dou ma taha sampe cumpukaina d̄i kasalama.

²³Nggara nggomid̄oho kancokisi b̄a dou d̄i sab̄ua kota, raipu d̄i kota ma kalai. Nahu mangoa d̄i nggomid̄oho: Sawatipu b̄a nggorina nggomid̄oho laokaimu d̄i samenana kota Israel, Ana Manusia nawa'ura mai.

²⁴ Anamori wati ncewi na'e d̄i guruna, ro ada wati ncewi na'e d̄i rumana.

²⁵ Wa'ura ncihi nggara anamori ndad̄i b̄une guruna, ro ada ndad̄i b̄une rumana. Nggara mana'ekai uma ra salaja wa'ura tangarakai Beelzebul, au walipu sa'isi umana. Siad̄oho d̄i tangarakai mancewi iha wali!”

²⁶ ”Aina dahumu d̄i manusia. Wati wara ma'ili weki, ma wati d̄i da'eda, ro wati wara ma d̄irahasia rau ma wati d̄i dahengga.

²⁷Au ranggahi b̄a Nahu d̄i nggomid̄oho d̄i ade marindi pab̄uapu nggomid̄oho karawi mbodamu d̄i ade aimarai mataroa. Ro au rangoa nari d̄i fikomu, ngoa reropu ede d̄i samenana dou!

²⁸Aina dahumu d̄i siad̄oho ma hade sarumbu, pala wati ntauna kuasa hade nawa. Dahupu d̄i Ruma Hatalla ma ntau kuasa makaleli nataho sarumbu ra nawa d̄i ade anaraka.

²⁹D̄ua mbua kari'i loa d̄i weli kai sab̄ua piti ma to'i poda co'ina. Konena ndede wati wara kone sab̄ua rau mamab̄u awa dana nggara watisi kane'ekai b̄a Amamu.

³⁰Jumula honggo d̄i tuta raumu wa'ura reke sara'ana.

³¹B̄ara ndedena, aina dahu! Ncewi ntaupu co'i nggomid̄oho ntewikaisi kari'i-kari'i.”

³²”Cou-cou mamangaku d̄itando dou mamboto b̄a one sia b̄atuna Nahu, Nahu rau d̄imamangaku sia d̄itando Ama-Ku d̄i saroga.

³³ Pala cou-cou mawati mangaku d̄itando dou mamboto b̄a one sia b̄atuna Nahu, Nahu rau wati mangaku-Ku sia d̄itando Ama-Ku d̄i saroga.”

³⁴”Aina kacaimu b̄a one Nahu mawa'a damekai angi d̄i dunia ake. Nahu wati wa'aku damekai angi, pala d̄i aokai angi.

³⁵ Nahu maiku kandawiku ana mone d̄ima'ao amana, ana siwe d̄ima'ao inana, ro rido siwe d̄imancao lab̄o riana siwena.

³⁶D̄imandad̄i musu mana'e poda eded̄u anggota kaluarga ndai.

³⁷Dou ma meci ra ca'u ama atao inana nancewi ese ntewi kaisi meci raca'una Nahu wati patuna ndad̄i anamori Nahu. Ndede rau dou ma meci ra ca'u ana mone atao ana siwena ntewi kaisi meci ra ca'una Nahu.

³⁸ Ro dou ma wati ngawa tundu salibna ro b̄atuna Nahu, wati patuna ndad̄i anamori Nahu.

³⁹ Dou ma taha morina, d̄imambora morina, pala dou ma mbora morina b̄ara to'ana d̄i Nahu d̄imaraka morina.”

⁴⁰ ”Dou ma tarima nggomid̄oho, natarimaku Nahu. Ro dou ma tarima Nahu, natarimaku Sia ma ranggadu Nahu.

⁴¹Dou ma tarima nabi b̄ara sia ede nabi, d̄imatarima ufa sab̄ua dou nabi. Ro cou ma tarima sab̄ua dou ma taho b̄ara sia tahona, d̄imatarima ufa sab̄ua dou ma taho.

⁴²Cou-cou mambei oi nono, konena oi b̄usi mpoa d̄i sab̄ua dou d̄i ade weki dou rakatuna ra kab̄awa b̄a dou ake, b̄ara dou ede b̄atuna Nahu, imbipu sia pasti d̄imatarima ufana!”