Read Bima MATIUS 11 Bible Online

MATIUS 11 - Bima bible

MATIUS 11

¹Sawa'u b̄a Ruma Isa mbeina ngoa ra teina d̄i ru'u b̄a sampuru d̄ua anamori-Na, Sia tu'u wi'ina hid̄i ede. Sia lao tei ro kahabana nggahi ra eli ma ramai ta Ruma Hatalla aka kota-kota ma d̄eni lab̄o hid̄i ede.

²La Yahya Mataki kandeu karaso dou ma wunga ade uma bui naringaku mab̄oha karawi b̄a Al Masih. Edempara sia kauna pila-pila dou anamorina lao aka Ruma Isa d̄imasod̄i,

³”Ita kombi dou d̄imamai b̄une rasake b̄a Ruma Hatalla, atao pab̄ua kombi madad̄oho ngenamu dou makalai?”

⁴Cambe b̄a Ruma Isa, ”Lao mbalipu aka la Yahya ro ngoapu au raringa ro eda b̄a nggomi:

⁵ Dou mambuda naloa eda, dou mamade b̄inci naloa lampa, dou masupu ncola nataho; dou mampinga naringa, dou mamade namori mbali, ro Haba Mataho ma ramai ta Ruma Hatalla d̄i ngoa ra kahaba d̄i dou-dou mancoki mori.

⁶Taho ra ntikara dou ma wati wara alasa d̄imatula Nahu!”

⁷Sawa'u b̄a lao dou-dou ranggadu b̄a la Yahya ede, Ruma Isa tampu'ura nuntu d̄i dou mamboto mab̄oha la Yahya, nggahi-Na, ”Nggomid̄oho laomu aka so sarae matio auku? Salela mpori ra'ewu b̄a angi?

⁸Nggomid̄oho laomu auku lao tiomu? Sab̄ua dou ma kani mantika? Dou-dou ma kani mantika b̄une ede nangge'e aka asiku!

⁹Ndad̄i b̄ab̄auku nggomid̄oho laokaimu aka so sarae? Ma lao tioku sab̄ua dou nabi? Poda, mala nancewi na'e rad̄i nabi.

¹⁰ B̄ara la Yahya eded̄u ranggahi d̄i ade ayat Alkitab ake; ’Akera dou ranggadu b̄a Nahu, nggahi Ruma Hatalla, Nahu ranggadu uluku sia ede ampo Nggomi loakud̄u hengga b̄a sia ncai d̄i ru'u Nggomi.’

¹¹Kawarapu! D̄i dunia ake wati parana wara dou ma ncewi na'e ntewi kaisi la Yahya Mataki kandeu karaso dou. Konena ndede, dou ma cumpukai to'i d̄i ade anggota Karaja'an Saroga nancewi na'e ntewi kaisi lab̄o la Yahya.

¹² Ra'aipu la Yahya ngoa ra kahabana haba ede sampe wakatu ake, ela Karaja'an Saroga d̄i daca'u b̄a dou-dou ma usaha kuasa kai kasa.

¹³Sampe maikai la Yahya, sara'a hukum Musa ro ngoa ra tei b̄a nabi-nabi karonggana ranggahi Ruma Hatalla mab̄oha lampa rawi-lampa rawi ma pab̄ua ndad̄i.

¹⁴ Ro nggara nggomid̄oho mane'esi imbi, la Yahya edeku la Elia, b̄a maina wa'ura ngoa ulu b̄a Ruma.

¹⁵Nggara mantausi fiko, ringa ra kade'epu!

¹⁶Kai auku d̄i pab̄ua ntewi kai b̄a Nahu dou-dou jamana ake? Siad̄oho b̄une d̄ambe-d̄ambe to'i ma doho d̄i amba. Sakalompo manggahi nggao d̄i kalompo ma kalai,

¹⁷’Nami marawa-rawa kad̄ihikai ade d̄i ru'u b̄a nggomid̄oho, pala nggomid̄oho wati ne'emu tari! Nami marawa mancokikai ade, ro nggomid̄oho wati ne'emu nangi!’

¹⁸Mai la Yahya — sia napuasaku ro wati nonona anggo; ro nggahi b̄a dou-dou, ’Sia ralu'ukai b̄a seta!’

¹⁹Ake mai Ana Manusia, — Sia nangaha ra nono; edempara nggahi b̄a dou-dou, ’Tiopu dou ede! Na'e ngahana, naca'u mawu, lenga dou mataki tagi bea ro lenga dou madosa.’ Konena ndede, loa timba ra lemba Ruma Hatalla natada rad̄i hasi karawina.”

²⁰Edempara Ruma Isa tampu'ura rojo kapodana mab̄oha kota-kota, tab̄era ipi mboto ndawikai-Na b̄isa ra guna. B̄ara dou-dou d̄i kota-kota ede wati ne'ena toba rad̄i dosa-dosa siad̄oho.

²¹ ”Ihara nggomi, Korazim! Ro iha raura nggomi, Betsaida! Paisi b̄isa ra guna-b̄isa ra guna rakarawi d̄iwoha nggomid̄oho ede, wa'ura karawi d̄i Tirus ro Sidon, pasti dou-dou ta aka wa'ura ntoi tobana rad̄i dosa-dosa siad̄oho ro nakaniku kani ra lombo d̄itanda ncokikai adena ro natauku kalub̄u ese wawo tutana.

²²D̄i karawamu, d̄i Ainaina Kiama, dou-dou Tirus ro Sidon, nawancuku ncewi mod̄ana kangampu wea b̄a Ruma Hatalla ntewi kaisi nggomid̄oho!

²³ Ro nggomi, Kapernaum! Sab̄ua nggomi d̄ikad̄ese sampe ese saroga? Wati! Mala nggomi d̄ipaki ade anaraka! B̄ara paisi lampa rawi b̄isa ra guna-b̄isa ra guna rakarawi d̄iwoha nggomid̄oho ede wa'ura karawi aka Sodom. Sodom ede mbuipu wara sampe wakatu ake!

²⁴ Kawarapu; D̄i Ainaina Kiama, dou Sodom nawancuku ncewi mod̄ana kangampu wea b̄a Ruma Hatalla ntewi kaisi nggomid̄oho!”

²⁵Aipu wakatu ede Ruma Isa do'ana, ”Ama, Ruma ma kuasakai langi ra dana! Mada marenta tarima kasi d̄i Ita Ruma b̄ara samenana ede rahasiaku b̄a Ita rad̄i dou-dou maloa ro mantau ilimu, pala Ita maturu teiku d̄i dou-dou mawati ntau ilimu.

²⁶Edeku ma kasana wea ade Ita Ama!”

²⁷ Edempara nggahi Ruma Isa, ”Samenana wa'ura d̄onggo b̄a Ama d̄i Nahu. Wati wara kone sab̄ua dou mapata Ana, selasi Ama. Wati wara rau ma pata Ama selasi Ana, ro d̄i dou-dou rane'e b̄a Ana ede kapatakaina Ama.

²⁸Maipu ara Nahu nggomid̄oho sara'a ma rome ra dawa'u, ro ma'iu tani rawa'ana; Nahu d̄imambei tenggo ra wale nggomi.

²⁹ B̄atupu parenta Nahu ro tana'opu d̄i Nahu. B̄ara Nahu ake nantika nggahi ra eli-Ku ro ka'awa weki, ndad̄i nggomi ma'iuku tenggo.

³⁰B̄ara parenta-parenta Nahu nambeiku sana, ro au rakau-Ku wa'a matani d̄i nggomid̄oho naneo.”