Read Bima MATIUS 12 Bible Online

MATIUS 12 - Bima bible

MATIUS 12

¹ D̄i sab̄ua ainaina Sabat, wakatu lampa sai b̄a Ruma Isa sab̄ua oma gando, anamorid̄oho-Na tampu'ura pokena gando, edempara ngahana gando b̄ara hid̄ona.

²Wakatu dou-dou Farisi edana rawi ede, siad̄oho nggahina d̄i Ruma Isa, ”Tiopu! Anamorid̄oho-Mu masapa hukum agama ndaita kai karawina au rakantakai wakatu ainaina Sabat.”

³ Cambe b̄a Ruma Isa, ”Watipu parana baca b̄a nggomid̄oho au rakarawi b̄a la Daud wakatu sia ro dou-dou mab̄atuna iuna hid̄o?

⁴ Sia lu'una d̄i ade Bait Allah; edempara ngahana roti rawa'u d̄onggo ra mbei d̄i ru'u Ruma Hatalla. Sapodakaina b̄atusi hukum agama ndaita, sia ro dou-douna ede wati loana ngaha roti ede, selasi imam-imam mpoampa ma loana ngaha.

⁵ Atao watipu parana baca b̄a nggomid̄oho d̄i ade hukum Musa b̄a one sanikina ainaina Sabat imam-imam ma kalampa taki ra puta d̄i Bait Allah, nasapaku atora ainaina Sabat, pala wati d̄ikancara?

⁶Kade'e kab̄aepu au ranggahi b̄a Nahu ake: ta ake wara ma ncewi na'e ntewi kaisi Bait Allah.

⁷ D̄i ade Alkitab ratunti: Kasi-kasi ade angimpa d̄i ne'e b̄a Nahu, laina koroba binata. Nggara nggomid̄oho poda-podasi loamu ka'ao au ranggahi ede, pasti nggomid̄oho wati kancaramu dou-dou ma wati wara ncara.

⁸B̄ara Ana Manusia nantau kuasa d̄i ainaina Sabat.”

⁹Ruma Isa tu'u wi'ina hid̄i ede, edempara laona d̄i sab̄ua uma sambeakai.

¹⁰Ta ede wara dou ma made b̄inci sab̄ae rimana. Pila-pila dou ma ne'e ngupa rawi ncara Ruma Isa, sod̄ina d̄i Sia, ”Sab̄ua loaku kataho dou d̄i ainaina Sabat?”

¹¹ Cambe b̄a Ruma Isa, ”Misakai wara sab̄ua dou d̄i ade weki nggomid̄oho mantau jimba sab̄ua, ro d̄i ainaina Sabat jimba ede mab̄una d̄i ade kancoa ma d̄ei; sab̄ua dou mantau jimba ede wati usahana kalosa jimba mamab̄u d̄i ade kancoa ede?

¹²Manusia nancewi ntaupu co'i ntewi kaisi jimba! Ndad̄i, nggara ndedesi, loaku bantu dou d̄i ainaina Sabat.”

¹³Edempara Ruma Isa nggahina d̄i dou ma made b̄inci sab̄ae rimana ede, ”D̄alapu rimamu.” Dou ede d̄alana rimana, ro rimana ede tahona b̄une rimana ma sab̄ae.

¹⁴Pala dou-dou Farisi tu'u wi'ina uma sambea ede, edempara mafakana ne'e hade Ruma Isa.

¹⁵Ruma Isa nab̄adeku b̄a one dou-dou Farisi ede wara niana madab̄ae d̄i ru'u b̄a Sia. Ndad̄i Sia lao pesona weki rad̄i hid̄i ede ro mboto dou malao b̄atu-Na. Edempara Sia katahona samenana dou ma supu.

¹⁶Pala Sia nakantaku dou-dou ede ngoa dou makalai mab̄oha Sia.

¹⁷Ade ndedekaina ndad̄ira au ranggahi b̄a Ruma Hatalla kai ncai Nabi Yesaya,

¹⁸ ”Akeku dou ranggadu b̄a Nahu rakad̄ale-Ku, Dou d̄i meci-Ku ro rakane'e b̄a ade-Ku. Roh-Ku d̄i mbei-Ku ru'u Sia, Tabe'a Nahu ma adi d̄ingoa ra kahaba-Na d̄i bangsa-bangsa.

¹⁹Sia wati d̄imacence ncihi atao kanggica, atao mapadato d̄i ncai-ncai bari.

²⁰O'o ma mboko wati d̄ifoka-Na, ilo ma kalea to'i wati d̄ihade-Na. Sia d̄imakapoda ade sampe rakana lampa rawi ma'adi;

²¹Samenana bangsa d̄imantau ne'e d̄i Sia.”

²²Sawa'u b̄a ede wa'a b̄a dou d̄i Ruma Isa sab̄ua dou ma mbuda ro mpongi b̄ara kuasakai b̄a roh seta. Ruma Isa katahona dou ede ndad̄ina loana nuntu ro loana eda.

²³Samenana dou mbora akana ro nggahina, ”Podasi dou ake ana la Daud rasake ede?”

²⁴ Wakatu ringa b̄a dou-dou Farisi nggahi ede, cambe b̄a siad̄oho, ”Dou ake cuma loana b̄aka kalosa roh seta, b̄ara Beelzebul, mana'ekaina roh-roh seta, nawa'ura mbei kuasa ede d̄i Sia.”

²⁵Ruma Isa nab̄adeku fiki ra kananu dou-dou Farisi ede. Ndad̄i Sia nggahina d̄i siad̄oho, ”Nggara sab̄ua negara mbi'a ade golonga-golonga ma cua musu angi, negara ede wati d̄imantoi. Ro sab̄ua kota atao kaluarga ma mbi'a-mbi'a ro ma cua musu angi sab̄ua lab̄o sab̄ua dou d̄imaleli.

²⁶Ndede rau d̄i ade karaja'an Ibilis; nggara sab̄ua kalompo b̄aka kalosana kalompo ma kalai, edempara karaja'an Ibilis ede nawa'ura mbi'a-mbi'a ro d̄imaleli.

²⁷Nggomid̄oho nggahimu b̄a one Nahu mab̄aka kalosa roh seta b̄ara kuasa Beelzebul. Nggara ndedesi kai kuasa couku anamorid̄ohomu b̄aka kalosakaina roh seta. Anamori-anamori ndaimu ma bukutina b̄a one nggomid̄oho mancara!

²⁸Pala Nahu b̄aka kalosa roh seta kai kuasa Roh Allah. Ede aona b̄a one Karaja'an Allah nawa'ura mai d̄i nggomid̄oho.

²⁹B̄uneku dou loana lu'u d̄i ade uma dou ma tenggo b̄a ne'ena weha ra rampa wea ntauna, nggara sia watisi leto ulu wa'una dou matenggo ede? Sawa'u b̄a ede, ampona loa weha ra rampa wea ntau ra warana.

³⁰ Dou ma wati lu'u ta Nahu sapodakaina sia wati ca'u podana Nahu. Ro dou ma wati bantu Nahu, sapodakaina naka'ihaku karawi Nahu!

³¹B̄ara ndedena, b̄adepu, nakarawisi b̄a dou lampa rawi madosa ro nggahi ra elina nakatunaku dou, sia loapu d̄ikangampu wea! Pala nggara sia nakasungge-sunggesi Roh Allah, sia watid̄u loa d̄ikangampu wea!

³² Nanggahisi b̄a dou au-au daca'una Ana Manusia, sia ede loapu d̄ikangampu wea, pala sia nakab̄awa ra katunasi Roh Allah, sia watid̄u loa d̄ikangampu wea, nataho wakatu ake, ro d̄i ahera!”

³³ ”D̄i loakai raka wua ma taho, fu'una pab̄uaku mangawa. Nggara fu'una wati ngawana, wua rauna wati tahona. Ngawa ra watina sab̄ua fu'u haju mab̄adeku ta wuana.

³⁴ Nggomi dou dab̄ae, b̄uneku loakaimu renta nggahi ra eli ma taho, nggara nggomid̄oho dou dab̄ae? Au rarenta b̄a asamu eded̄u ma ralosa d̄ei ademu!

³⁵Dou ma taho narentaku nggahi ra eli ma taho b̄ara sia b̄ini kai b̄a mataho. Ndede walija, dou ma dab̄ae narentaku nggahi ra eli ma iha b̄ara sia b̄ini kai b̄a rawi madab̄ae.

³⁶Ndad̄i, kawarapu: d̄i Ainaina Kiama, sanikina dou pab̄uaku su'u ra tunduna d̄i saniki rarentana ma wati wara one.

³⁷B̄ara nggahi ra eli ndaimu ma d̄i kani, d̄imakantantuna sab̄ua nggomi mancara atao wati.”

³⁸ Edempara pila-pila dou guru agama ro dou-dou Farisi nggahina, ”Pa Guru, madad̄oho mane'e eda Ita mandawi b̄isa ra guna.”

³⁹ ”Nawancuku dab̄ae ro duruhakana dou-dou jamana ake!” cambe b̄a Ruma Isa. ”Nggomid̄oho marahoku Nahu mandawi b̄isa ra guna? Nggomid̄oho wati d̄imbei kone sab̄ua b̄isa ra guna, selasi b̄isa ra guna Nabi Yunus.

⁴⁰ Yunus ngge'ena d̄i ade loko uta na'e tolu nai aimarai tolu nai aimangad̄i. Ndede rau Ana Manusia d̄imangge'e tolu nai aimangad̄i tolu nai aimarai d̄i ade loko dana.

⁴¹ D̄i Ainaina Kiama, ela ra dou Niniwe d̄imatu'u sama-sama lab̄o dou-dou jamana ake, ro nab̄ab̄u ra lo'oku siad̄oho. B̄ara dou-dou Niniwe ede nawa'ura tobana rad̄i dosa-dosa siad̄oho ro warina weki mai satando d̄i Ruma Hatalla, wakatu Yunus hotobana d̄i siad̄oho. Pala ta ake wakatu ake wara ma ncewi na'e ntewi kaisi la Yunus.

⁴² D̄i Ainaina Kiama, sangaji siwe rad̄i dana ra rasa tawela D̄ona d̄imatu'u sama-sama lab̄o dou-dou jamana ake, ro nab̄ab̄u ra lo'oku siad̄oho. B̄ara sangaji siwe ede wa'ura karawi lampa ra lao ma d̄ondo poda ratampu'una aka sumpu dunia d̄ikade'e ra ringakaina ngoa ra tei b̄a Sulaiman ma loa timba ra lemba ede. Pala ta ake wakatu ake wara ma ncewi na'e ntewi kaisi Sulaiman!”

⁴³”Natu'u wi'isi b̄a roh seta sab̄ua-b̄ua dou, roh ede nalampa rero d̄i hid̄i-hid̄i ma mango d̄i ngupakaina hid̄i sanawakaina, pala sia wati rakana.

⁴⁴B̄ara ndedena sia nggahina, ’Nahu kalao mbali aka uma rawi'i pakiku.’ Wakatu rongga sia ta aka, uma ede ntaru, raso ro moci.

⁴⁵Edempara sia laona ro wa'ana pidu roh seta makalai ma ncewi dab̄ae ntewi kaisi sia. Edempara siad̄oho lu'u ngge'ena d̄ei dou ede. Ro cumpukaina ka'ada'ana dou ede naha ipi iha ntewi kaisi ai sarambana. Ede rauku d̄imandad̄i lab̄o dou-dou madab̄ae jamana ake.”

⁴⁶Wunga Ruma Isa mbuipu nuntuna lab̄o dou mamboto ede, maira ina ro arid̄oho-Na. Siad̄oho kid̄ina ta ari lua ngupana ncai loakaina nuntu lab̄o Sia.

⁴⁷Sab̄ua dou d̄i ade weki dou mamboto ede nggahina d̄i Ruma Isa, ”Pa, ina ro ari-ari Ita wara ta ari lua. Siad̄oho nane'e nuntu lab̄o Ita.”

⁴⁸Edempara cambe b̄a Ruma Isa, ”Cousi ina Nahu? Cousi ari-ari Nahu?”

⁴⁹Edempara Sia turuna anamorid̄oho-Na ro nggahina, ”Akeku ina ro ari-ari Nahu.

⁵⁰Dou ma karawi au rakane'ekai b̄a Ama-Ku ma d̄i saroga, siad̄oho edeku, ari ra sa'e mone-Ku, amancawa ro ina-Ku.”