Read Bima MATIUS 14 Bible Online

MATIUS 14 - Bima bible

MATIUS 14

¹Aipu wakatu ede Herodes, makuasa d̄i dana Galilea, naringaku haba Ruma Isa.

²Nggahi Herodes d̄i dou-douna mana'e b̄ora, ”Pasti ake la Yahya Mataki kandeu karaso dou ma wa'ura mori mbali! B̄ara ndedena Sia nantau kuasa d̄ikarawikaina lampa rawi mab̄isa ra guna.”

³ B̄ara sawatipu b̄a ede Herodes rakauna wa'u ra leto la Yahya sawa'u b̄a ede kalu'una d̄i ade uma bui. Herodes karawi kandedekaina b̄ara masa'ala Herodias, wei ari ndaina, eded̄u la Filipus.

⁴ B̄ara parana la Yahya nggahi ndakena d̄i Herodes, ”Wati loata nika lab̄o Herodias!”

⁵Sapodakaina Herodes nane'eku hade la Yahya, pala sia nadahuku d̄i dou-dou, b̄ara siad̄oho wi'ikaina la Yahya eded̄u nabi.

⁶Aipu wakatu Herodes kandihana ainaina rawarakaina, ana siwe Herodias matari d̄itando dou mawara. Tarina ede nawancuku kasana weana ade Herodes,

⁷ndad̄ina Herodes sakena d̄i sia kai sumpa sa'aura d̄i raho b̄a sia, d̄imbeina ana dou siwe ede.

⁸B̄ara sad̄u'u b̄a inana, dou siwe sampela ede nggahina, ”Mada karahoku tuta la Yahya Mataki kandeu karaso dou d̄i mbeimu mada wakatu ake wa'u d̄iwawo tare!”

⁹Ringana raho ede, Herodes ndad̄i ncoki poda adena. Pala b̄ara sia wa'ura sumpakaina d̄itando tamu-tamuna, sia parentana loakud̄u au raraho dou siwe sampela ede d̄imbei.

¹⁰Sia kauna dou lao d̄i uma bui d̄imafati kakori tuta la Yahya.

¹¹Sawa'u b̄a ede tuta la Yahya wa'a kalu'u kai tare, ro mbeina dou siwe sampela ede. Edempara dou siwe sampela ede wa'ana d̄i inana.

¹²Sawa'u b̄a ede anamori-anamori la Yahya mai wehana timba la Yahya ro umbuna. Edempara siad̄oho lao ngoana au ramandad̄i ede d̄i Ruma Isa.

¹³Wakatu ringa b̄a Ruma Isa haba ede, Sia nente kesena sampa tu'u wi'ina hid̄i ede, d̄ine'ena lao d̄i sab̄ua hid̄i ma lingi. Pala wakatu ringa b̄a dou-dou mab̄oha lampa rawi ede, siad̄oho tu'u wi'ina kota-kotana ro lao b̄atuna Ruma Isa kai lampa ed̄ina.

¹⁴Wakatu Ruma Isa londona rad̄i sampa, ro edana dou mamboto ede, Sia kasi adena d̄i siad̄oho. Edempara Sia katahona dou-dou ma supu d̄i ade weki siad̄oho.

¹⁵D̄i'aimambiana, anamori-anamori Ruma Isa mai rakana Ruma Isa ro nggahina, ”Ai ake nambiara ro hid̄i ake nad̄o'o lab̄o rasa. Natahopu Ita kauta dou-dou ake lao, loakud̄u rakana weli d̄i ngaha ra nono d̄i rasa-rasa.”

¹⁶”Edera kau lao siad̄oho,” nggahi Ruma Isa, ”nggomid̄ohompa mambeina ngaha siad̄oho.”

¹⁷”Madad̄oho cuma ntaumu lima mbua roti ro d̄ua tembe uta!” cambe b̄a anamori Ruma Isa ede.

¹⁸”Wa'a ca'arapu ede,” nggahi Ruma Isa.

¹⁹Sawa'u b̄a ede kauna dou mamboto ede doho ese wawo mpori. Edempara Sia wehana lima mbua roti ro d̄ua tembe uta ede, sawa'u b̄a ede d̄ongana langi, edempara sambea syukuna d̄i Ruma Hatalla. Sawa'u b̄a ede Sia tob̄e-tob̄ena roti ede kai rima-Na ro mbei-Na d̄i anamorid̄oho-Na loakud̄u d̄icengga-cengga d̄i ru'u dou mamboto ede.

²⁰Sara'a doud̄oho ede ngaha sampe mbocuna. Sawa'u b̄a ede anamori-anamori Ruma Isa kab̄orona mancewi ngaha ra nono ede; wara sampuru d̄ua wonca b̄ini.

²¹Ma ngaha aipu wakatu ede wara takasi lima riwu dou, watipu reke dou siwe ro d̄ambe-d̄ambe to'i.

²²Sawa'u b̄a ede Ruma Isa kauna anamorid̄oho-Na nente sampa ro lao lampa ulu ipa b̄ae b̄a ndano, b̄ara Sia makau wa'u dou mamboto ede lao dula.

²³Sawa'u b̄a lao dou mamboto ede, Ruma Isa teka kesena ese doro to'i ne'e lao sambea. Wakatuna wa'ura ai mangad̄i, Ruma Isa mbuipu warana d̄i hid̄i ede kesena.

²⁴Wakatu ede sampa ranente b̄a anamori Ruma Isa, nawa'ura d̄o'o d̄ei woha ndano. Sampa ede nawa'ura tere-tere b̄oe b̄a balumba, b̄ara angi mamai natule ra tapaku sampa.

²⁵Wakatu ede hela b̄oe tolu ro b̄oe ini aimasid̄i, Ruma Isa maina d̄i siad̄oho lampana ese wawo oi.

²⁶Wakatu eda b̄a anamorid̄oho-Na Sia malampa ese wawo oi, siad̄oho nawancuku wed̄ina. ”Henca!” kanggica siad̄oho b̄a dahuna.

²⁷Pala cambe lalo b̄a Ruma Isa, ”Midira! Nahu Isa. Aina dahu!”

²⁸Edempara nggahi la Petrus, ”Nggara podasi Ita Ruma Isa, kaupu mada mai lampa ese wawo oi.”

²⁹”Maira,” cambe b̄a Ruma Isa. Ndad̄i la Petrus londona rad̄i sampa, lampana ese wawo oi mai rakana Ruma Isa.

³⁰Pala wakatu eda b̄a la Petrus b̄a wancuku na'e angi d̄i ndano ede, sia dahu adena edempara tampu'u mimina. ”Ruma, bantupu!” kanggicana.

³¹Ruma Isa roci d̄alana rima-Na nentina sia, ro nggahina, ”Petrus, Petrus, nggomi ake kura imbimu. B̄ab̄auku nggomi mbali mbuakai ademu d̄i Nahu?”

³²Edempara d̄uana ede ne'ena ese sampa ede, ro angi rau dengga.

³³Ndad̄i anamori-anamori Ruma Isa suju ra nembana Sia. Nggahi siad̄oho, ”Poda Ita Ruma eded̄u Ana Ruma Hatalla!”

³⁴Wakatu siad̄oho ronggara ipa b̄ae b̄a ndano, siad̄oho lab̄una aka Genesaret.

³⁵Ro wunga eda b̄a dou-dou ta ede b̄a one ma mai ede Ruma Isa, siad̄oho kambouna haba ede d̄i samenana dana ra rasa d̄i kompe ra pei kota ede. Edempara samenana dou masupu wa'a b̄a dou d̄i Ruma Isa.

³⁶Ro siad̄oho raho poda-podana d̄i Ruma Isa loa to'i tudu jumba-Na, kone b̄a sumpu mpoana. Edempara sara'a ma tuduna ndad̄i taho.