Read Bima MATIUS 19 Bible Online

MATIUS 19 - Bima bible

MATIUS 19

¹Sawa'u b̄a Ruma Isa nggori nggahi sara'ana ede, Sia tu'u wi'ina Galilea edempara laona aka dana Yudea ipa b̄ae b̄a Sori Yordan.

²Mboto dou mab̄atu Sia, ro Sia katahona doud̄oho masupu ta ede.

³Edempara mai dou-dou Farisi ne'ena kamab̄u Ruma Isa. Sod̄i b̄a siad̄oho, ”Rakaukai b̄a hukum agama ndaita, sab̄ua loaku dou ncengga lab̄o weina kai alasa madatantu?”

⁴ Cambe b̄a Ruma Isa, ”Sab̄ua nggomid̄oho watipu bacamu ade Alkitab b̄a one Makandad̄ina manusia, aipu sarambana kandad̄ina dou mone ro dou siwe?

⁵ Ro sawa'u b̄a ede Sia nggahina, ’B̄ara ndedena dou mone natu'u wi'iku ina ra amana ro campo ra sab̄uana lab̄o weina, edempara siad̄oho d̄ua ndad̄i sab̄ua.’

⁶Ndad̄i siad̄oho laina d̄ua dou wali, pala sab̄ua. B̄ara ndedena au rawa'u kasab̄ua b̄a Ruma Hatalla wati loa d̄icengga b̄a manusia.”

⁷ Edempara dou-dou Farisi sod̄ina d̄i Sia, ”Nggara ndedesi b̄ab̄auku Musa kaukaina dou mbei sura ncengga d̄i wei rancengga lab̄ona ede?”

⁸Cambe b̄a Ruma Isa, ”Kaukai b̄a la Musa ncengga lab̄o weimu nggomid̄oho b̄ara nggomid̄oho wancuku ncokina d̄ingoa ra tei. Pala sapodakaina wati ndedena aipu saramba wa'una.

⁹ Ndad̄i, ringa ra kade'epu ake: Cou mawi'i weina, sapodakaina weina ede wati bengkena lab̄o mone ma kalai, edempara nika walina lab̄o siwe makalai dou ede najinaku.”

¹⁰Edempara anamori Ruma Isa nggahina d̄i Sia, ”Nggara so'a campo rahi lab̄o wei b̄une ede, natahopu edera nika.”

¹¹Cambe b̄a Ruma Isa, ”Wati sara'a dou maloa tarima nggahi ra eli b̄une ede, selasi dou-dou ma wa'ura katantu b̄a Ruma Hatalla.

¹²B̄ara wara dou ma wati loa nika, b̄ara siad̄oho ranggana poda ndedena. Wara rau ma daloa nika b̄ara siad̄oho rapuli b̄a dou makalai. Ro wara rau rane'e ndaina wati nika loakud̄u karawi weana d̄i ru'u Ruma Hatalla. Dou ma sanggo tarima ngoa ra tei ake, co'opu sia matarimana.”

¹³Wara dou-dou mawa'a d̄ambe-d̄ambe to'i d̄i Ruma Isa, loakud̄u Sia tohona rima-Na ese wawo tuta d̄ambe-d̄ambe to'i ro do'a weana siad̄oho. Pala anamori-anamori Ruma Isa nggahikaina doud̄oho ede.

¹⁴Edempara Ruma Isa nggahina d̄i anamorid̄oho-Na, ”Co'opu d̄ambe-d̄ambe to'i ede maina ara Nahu! Aina kantamu siad̄oho, b̄ara dou-dou b̄une akeku ma ndad̄i anggota Karaja'an Saroga.”

¹⁵Edempara Ruma Isa tohona rima-Na ese wawo tuta d̄ambe-d̄ambe to'i ede ro do'a mbeina bareka d̄i siad̄oho. Sawa'u b̄a ede Sia tu'u wi'ina hid̄i ede.

¹⁶D̄i sab̄ua ainaina sab̄ua dou mone maina d̄i Ruma Isa, ”Pa Guru,” nggahina, ”ruku ra rawi mataho mab̄eku d̄ipab̄ua kalampa b̄a la mada loakud̄u raka ro tarimaku mori masapodakaina ro ma'ederahid̄i?”

¹⁷Cambe b̄a Ruma Isa, ”B̄ab̄auku nggomi sod̄ikaimu d̄i Nahu, mab̄eku mataho? Cuma wara Sab̄uampa ma taho. Nggara nggomi mane'esi mori, nggomi pab̄uapu to'a d̄i parenta-parenta Ruma Hatalla.”

¹⁸ ”Parenta mab̄e kombi ede?” sod̄i b̄a dou ede. Cambe b̄a Ruma Isa, ”Aina hade dou, aina jina, aina mpanga, aina sakasi cowa,

¹⁹ lia ra horomapu ama ro inamu, ro meci ra ca'upu sasamamu manusia b̄une nggomi meci ra ca'umu weki ndaimu.”

²⁰”Samenana parenta ede wa'ura b̄atu b̄a mada,” cambe b̄a dou mone sampela ede. ”Mab̄e wali ma paralu?”

²¹Nggahi Ruma Isa d̄i sia ede, ”Nggara nggomi mane'esi ndad̄i sampuruna, lao landapu sara'a ntau ra waramu. Mbeipu pitina d̄i ru'u b̄a dou-dou mancoki mori, ro nggomi d̄imaraka ntau ra wara d̄i saroga, sawa'u b̄a ede mai b̄atupu Nahu!”

²²Ringana nggahi ede, dou mone ede laona lab̄o ncoki adena b̄ara sia nawancuku ntau ra warana.

²³Edempara Ruma Isa nggahina d̄i anamorid̄oho-Na, ”Nahu manggahi d̄i nggomid̄oho, nawancuku nggonggina dou mantau ra wara d̄imandad̄i anggota Karaja'an Saroga.

²⁴Ro ake rau d̄i ne'e-Ku nggahi d̄i nggomid̄oho; nancewi mod̄apu sab̄ua onta lu'u d̄ikaronga nda'u ntewi kaisi sab̄ua dou mantau ra wara malu'u d̄i ade Karaja'an Saroga.”

²⁵Wakatu ringa b̄a anamori-Na nggahi Ruma Isa ede, siad̄oho mbora akana, nggahi siad̄oho ”Nggara ndedesi, couku d̄imaloa salama?”

²⁶Ntanda b̄a Ruma Isa siad̄oho edempara nggahina, ”Ru'u b̄a manusia, nawati lu'u b̄a aka! Pala ru'u b̄a Ruma Hatalla, naloa mena.”

²⁷Edempara nggahi la Petrus, ”Tatiopu, la madad̄oho wa'ura tu'u wi'i sara'amu b̄ara b̄atu Ita. Ro dod̄oku auta d̄i tarima b̄a la madad̄oho?”

²⁸ Nggahi Ruma Isa d̄i siad̄oho, ”Imbipu: D̄i Dunia ma B̄ou, Ana Manusia d̄imadoho ese wawo kadera sangaji kaina ma d̄ese ra ntasa. Wakatu ede, nggomid̄oho anamori Nahu d̄i madad̄oho ese wawo sampuru d̄ua kadera sangaji ro maparesa d̄i ru'u b̄a sampuru d̄ua suku bangsa Israel!

²⁹Ro sanikina dou ma wa'ura wi'i paki umana, atao sa'e ra ari monena atao sa'e ra ari siwena, atao ina ra amana, atao ana-anana, atao oma ra nggarona b̄ara Nahu, dou ede d̄imatarima kambali saratu kali lipa. Ro sia d̄imatarima rau mori masapodakaina ro ma'ederahid̄i.

³⁰ Pala mboto dou ma wunga ake sarambakaina d̄imandad̄i cumpukaina ro ma cumpukaina ake mandad̄i sarambakaina.”