Read Bima MATIUS 20 Bible Online

MATIUS 20 - Bima bible

MATIUS 20

¹”Karaja'an Saroga, ka'ada'ana b̄une conto ra ibara ake; Sab̄ua dou mantau nggaro anggo losana aimasid̄i ngupana dou d̄imakarawi d̄i nggaro anggona.

²Sawa'u b̄a sia satujuna gajikaina doud̄oho kai sab̄ua piti salaka sanai, sia kauna doud̄oho ede karawi d̄i nggaro anggona.

³B̄oe ciwi aimasid̄i, dou ma ntau nggaro ede losa walina, ro edana pila-pila dou mawati wara karawi aka amba.

⁴Edempara nggahi sia d̄i doud̄oho ede, ’Nggomid̄oho laopu karawi aka nggaro anggo nahu. Nahu d̄imagaji nggomid̄oho kai gaji mancihi ncao.’

⁵Siad̄oho laona. B̄oe sampuru d̄ua aima rai ro b̄oe tolu aimambia, dou mantau nggaro ede losa walina ro karawina lampa rawi ma sama.

⁶Ro kira-kira b̄oe lima aimambia, sia losa walina ro edana mbuipu wara dou ma watipu raka karawi. Edempara sia sod̄ina d̄i doud̄oho ede, ’B̄ab̄auku nggomid̄oho d̄i kid̄ikaimu sambia ai ta ake d̄i dakarawikaimu au-au?’

⁷Cambe b̄a doud̄oho ede, ’Wati wara dou ma ou kau karawi madad̄oho,’ ’Nggara ndedesi,’ nggahi dou mantau nggaro ede, laopu nggomid̄oho karawi aka nggaro anggo nahu.’

⁸ Ai mambia, dou mantau nggaro anggo ede nggahina d̄i mandona, ’Oura dou-dou makarawi ede ro cola weara gaji siad̄oho cua ndaina tampu'u d̄i dou ma lu'u cumpukaina sampe d̄i dou ma lu'u sarambakaina.’

⁹Edempara mai dou-dou makarawi tampu'u b̄oe lima aimambia. Siad̄oho cua tarimana sab̄ua piti salaka.

¹⁰Sawa'u b̄a ede mai rau dou-dou ragaji tampu'u aimasid̄i. Kananu b̄a siad̄oho, siad̄oho natarima ncewi. Palasi siad̄oho cuma mbeina sab̄ua piti salaka raumpa.

¹¹Wakatu tarimana piti ede, siad̄oho bada red̄ena d̄i dou mantau nggaro.

¹²Dou-dou ma mai cumpukai ede cuma karawina samporo to'i, ntewi kaisi madad̄oho makarawi sambia ai d̄i liro mapana, pala Ita magajiku siad̄oho b̄une gajimu madad̄oho!’

¹³Cambe b̄a dou mantau nggaro ede d̄i sab̄ua dou ade weki siad̄oho, ’Soba, nahu wati ncaraku d̄i nggomi. Laina nggomisi masatuju tarima gaji sab̄ua piti salaka ade karawimu sanai?

¹⁴Wehara gajimu, ro laora. Nahu poda ne'eku mbei d̄i dou macumpukai lu'u ede gaji ma sama lab̄o rambeiku nggomi.

¹⁵Sab̄ua nahu wati loaku karawi b̄erane'eku kai ntau ndaiku? Atao nggomi hiana ademu, b̄ara nahu ncera ra mbura adeku?’ ”

¹⁶ Edempara Ruma Isa nggahi walina, ”Ndede rau dou-dou ma cumpukai d̄imandad̄i sarambakaina, ro dou-dou ma sarambakaina d̄imandad̄i cumpukaina.”

¹⁷Wakatu Ruma Isa laona aka Yerusalem, d̄iwoha ncai Sia ouna sampuru d̄ua anamori-Na kab̄oro kalai weki. Edempara Sia nggahina d̄i siad̄oho.

¹⁸Ringapu! Ndai ake wunga lao aka Yerusalem. Ta aka Ana Manusia d̄i d̄onggo d̄i dou-dou mana'ekai imam ro d̄i guru-guru agama. Edempara Sia d̄ihukum made.

¹⁹Sawa'u b̄a ede nad̄onggoku d̄i dou-dou malaina Yahudi. Doud̄oho ede d̄imakasungge-sungge Sia, nakancokiku Sia, ro nasalibku Sia. Pala d̄i ainaina katolukaina Sia d̄ikamori mbali.”

²⁰Sawa'u b̄a ede wei la Zebedeus mai lab̄o ana-anana d̄i Ruma Isa. D̄itando Ruma Isa, sia sujuna b̄a wara d̄i ne'ena raho.

²¹”Auta kombi ne'e ita ina?” Sod̄i b̄a Ruma Isa Cambe b̄a ina ede, ”Ne'e b̄a mada ana mada d̄uana ake d̄i madoho d̄iku'i ro wana Ita ndad̄isi Ita Sangaji peade.”

²²”Nggomid̄oho wati b̄ademu au raraho b̄a nggomid̄oho,” nggahi Ruma Isa d̄i siad̄oho. Sab̄ua masanggo b̄a nggomid̄oho nono d̄i piala susa ra ncoki, ma pab̄ua d̄inono b̄a Nahu?” ”Io sanggo,” cambe b̄a siad̄oho.

²³Nggahi Ruma Isa, ”Poda nggomid̄oho d̄imanono rau rad̄i piala Nahu. Pala mab̄oha cou d̄imadoho d̄iku'i ra d̄iwana-Ku, ede laina hak Nahu d̄imakatantuna. Hid̄i-hid̄i ede eded̄u d̄i ru'u b̄a dou-dou ma wa'ura katantu b̄a Ama-Ku.”

²⁴Wakatu sampuru dou anamori-Na ma kalai ma raringa nggahi ede, siad̄oho mbanina d̄i dou d̄uana ma'ari lab̄o sa'ena ede.

²⁵ B̄ara ndedena Ruma Isa ouna sara'a siad̄oho edempara nggahina, ”Nggomid̄oho mab̄adeku b̄a one mana'ekaina bangsa ma wati pata Ruma Hatalla nakasusaku ela ra douna. Ro dou-dou mana'ekai siad̄oho nakasusaku siad̄oho.

²⁶ Pala nggomid̄oho wati loamu kandede. Ndede walija, dou ma ne'e ndad̄i na'e d̄i weki nggomid̄oho, pab̄uapu ndad̄i adamu.

²⁷Ro dou ma ne'e ndad̄i sarambakaina d̄i ade weki nggomid̄oho, pab̄uapu d̄imandad̄i adamu.

²⁸Sama b̄une Ana Manusia ede rau; Sia maina laina d̄ikarawi wea, pala d̄imakarawi d̄i ru'u ela-Na ro nad̄onggoku nawa-Na d̄i ru'u hori kalosakai mboto dou.”

²⁹Wakatu siad̄oho tu'u wi'ina Yerikho, mboto dou mab̄atu Ruma Isa.

³⁰D̄ua dou mambuda wunga dohona d̄ikengge ncai. Wakatu ringa b̄a siad̄oho b̄a one Ruma Isa malampa sai, kanggica siad̄oho, ”Ana Daud, kasi to'ikaipu ademu d̄i madad̄oho!”

³¹Dou mamboto ma wara ta ede nggahikaina siad̄oho ro kauna midi siad̄oho. Pala siad̄oho naha na'e kanggicana, ”Ruma, Ana Daud kasi to'ikaipu ademu d̄i madad̄oho!”

³²”Edempara Ruma Isa midina ro ouna siad̄oho, ”Auku ne'emu nggomid̄oho d̄ikarawi wea b̄a Nahu?” sod̄i b̄a Ruma Isa.

³³Cambe b̄a siad̄oho, ”Ruma, madad̄oho mane'e edaku!”

³⁴Ruma Isa kasi adena d̄i siad̄oho, edempara d̄ama weana mada siad̄oho. Wunga ede wa'u siad̄oho loana eda. Edempara siad̄oho b̄atuna Ruma Isa.