Read Bima MATIUS 21 Bible Online

MATIUS 21 - Bima bible

MATIUS 21

¹Wakatu wa'ura d̄eni lab̄o Yerusalem, siad̄oho ronggara d̄i Betfage d̄i doro to'i Zaitun. Ta ede Ruma Isa kauna d̄ua dou anamori-Na lampa ulu.

²”Laopu aka rasa d̄itando ede,” ngoa b̄a Ruma Isa d̄i siad̄oho, ”Ma'eda lalompa b̄a nggomid̄oho sab̄ua keledai rad̄iki sama lab̄o anana. Horipu d̄uana ede ro wa'apu ta ake.

³Nggara warasi dou masod̄i au-au, nggahipu d̄i dou ede, ’Ruma maparaluna,’ edempara dou ede rociku kauna wa'a keledai ede.”

⁴Lampa rawi ede ndedekaina loakud̄u ndad̄ira au ranggahi b̄a nabi b̄une ake,

⁵ ”Nggahipu d̄i Sion, Sangajimu wunga maina ara nggomi Sia naka'awa weki ro nentena keledai, sab̄ua ana keledai ma ndara.”

⁶Edempara d̄ua dou anamori-Na ede laona ro karawina au rakaukai b̄a Ruma Isa d̄i siad̄oho.

⁷Wa'a b̄a siad̄oho keledai ede lab̄o anana. Edempara lama b̄a siad̄oho kontu keledai-keledai ede kai jumba siad̄oho. Sawa'u b̄a ede nente b̄a Ruma Isa.

⁸Mbonto dou ta aka mawira jumba-jumba siad̄oho d̄i ncai, ro dou-dou makalai nadompoku sanga-sanga haju mpida ro reana d̄i ade woha ncai.

⁹ Dou mamboto ma lampa d̄itando ra d̄ikontu Ruma Isa nggahina, ”Taho ra ntika! Ana Daud! D̄imbei bareka Sia ma mai kai ngara Ruma! Roi ra wadi Ruma Hatalla Mawancu D̄ese Ra Ntasa!”

¹⁰Edempara, wakatu Ruma Isa lu'una d̄i Yerusalem, sara'a kota ede ndad̄i mbou. ”Cou ake?” sod̄i b̄a dou-dou d̄i kota ede.

¹¹”Sia Nabi Isa, rad̄i Nazaret d̄i Galilea,” cambe b̄a dou mamboto ma d̄ende Ruma Isa.

¹²Sawa'u b̄a ede Ruma Isa lu'una d̄i ade Bait Allah, ro b̄aka kalosana samenana dou ma landa ra lajo ta ede. Ponga b̄a Sia meja-meja dou macepe piti, ro bangko-bangko dou malanda nasi dara.

¹³ Edempara Sia nggahina d̄i dou-dou ede, ”D̄i ade Alkitab ratunti b̄a one nggahi Ruma Hatalla, ’Uma Nahu d̄itangarakai uma d̄i hid̄i sambeakai.’ Pala nggomid̄oho makand̄ikaiku hid̄i sob̄u parampo.’ ”

¹⁴Dou-dou mambuda ramamade b̄inci maina d̄i Ruma Isa d̄i Bait Allah, ro Sia katahona siad̄oho.

¹⁵Pala dou-dou mana'ekai imam ro guru-guru agama mbanina b̄a edana rawi mab̄isa ra guna rakarawi b̄a Ruma Isa. Ro siad̄oho mbani rauna b̄a ringana d̄ambe-d̄ambe to'i manggahi d̄i Bait Allah, ”Taho ra ntika Ana Daud!”

¹⁶ Siad̄oho nggahina d̄i Ruma Isa. ”Nggomi maringaku au ranggahi b̄a siad̄oho?” ”Io, Nahu karingaku,” cambe b̄a Ruma Isa, ”Watipu parana baca b̄a nggomid̄oho ayat Alkitab ake: ’D̄ambe-d̄ambe to'i ro ana dou to'i kea wa'ura tei-Mu d̄imarenta roi ra wadi ma sampuruna’?”

¹⁷Sawa'u b̄a ede Ruma Isa tu'u wi'ina siad̄oho, edempara losana rad̄i kota ede laona aka Betania ro maruna ta aka.

¹⁸Aimasid̄i-sid̄i b̄ala aisanai, ade lampa lao mbalikaina aka kota, Ruma Isa nahid̄oku.

¹⁹Sia edana sampu'u fu'u ara d̄ikengge ncai. Lao Sia d̄i fu'u haju ede, pala wati edana kone sab̄ua wuana selasi ro'o mpoana. Edempara Ruma Isa nggahina d̄i fu'u haju ede, ”Nggomi wati d̄imambua wali!” Male lalona fu'u ara ede.

²⁰D̄iwakatu anamori-anamori Ruma Isa edana mandad̄i ede, siad̄oho mbora poda akana. ”B̄uneku fu'u ara ede loakaina made sara'a lalo?” sod̄i b̄a siad̄oho.

²¹ ”Poda,” cambe b̄a Ruma Isa, ”Nggara nggomid̄oho ma'imbisi ro wati mbali mbua ademu, nggomid̄oho maloaku karawi b̄une rawa'u karawi b̄a Nahu d̄i fu'u ara ake. Ro laina ede mpoa, mala nggomid̄oho maloaku nggahi d̄i doro to'i ake, ’Hantara wekimu ro lao pakipu wekimu ade moti,’ ndad̄i lampa rawi ede d̄imandad̄i.

²²Au-au raraho b̄a nggomid̄oho d̄i ade do'amu, nggomid̄oho d̄imatarimana, sura nggomid̄oho imbimu.”

²³Sawa'u b̄a ede Ruma Isa lao mbalina aka Bait Allah, edempara lu'u teina ta ede. Wakatu Sia wunga teina, dou-dou mana'ekai imam ro dou-dou mana'ekai Yahudi maina d̄i Sia ro sod̄ina, ”Kai dasar b̄eku Nggomi karawi sara'ana ede? Cou ma rambeimu hak ede d̄i Nggomi?”

²⁴Cambe b̄a Ruma Isa, ”Nahu rau mane'e sod̄i d̄i nggomid̄oho. Ro nggara nggomid̄oho macambesi Nahu d̄imangoamu kai hak cou Nahu karawiku lampa rawi ake.

²⁵La Yahya kandeu karasona dou kai hak cou? Ruma Hatalla atao manusia?” Edempara dou-dou mana'ekai imam ro dou-dou mana'ekai Yahudi tampu'ura mafakana d̄i ade weki siad̄oho, ”Nggara nggahisi b̄a ndai, ’Kai hak Ruma Hatalla’, nanggahiku b̄a Sia, ’Nggara ndedesi b̄ab̄auku nggomid̄oho wati imbikaimu d̄i Sia?’

²⁶Pala nggara nggahisi b̄a ndaita, ’Kai hak manusia,’ ndai tadahuku d̄i dou mamboto, b̄ara samenana dou ede nawi'ikaiku la Yahya eded̄u sab̄ua dou nabi.”

²⁷Ndad̄i cambe b̄a siad̄oho, ”Nami wati b̄ademu.” Edempara nggahi Ruma Isa d̄i siad̄oho, ”Nggara ndedesi Nahu rau wati d̄imangoa nggomid̄oho kai hak cou Nahu karawikaiku samenana ake.”

²⁸”Ake b̄uneku kananu b̄a nggomid̄oho mab̄oha lampa rawi ake?” nggahi Ruma Isa sawa'u b̄a ede. ”Waraku sab̄ua ama ma ntau ana mone d̄uana. Dou ede laona d̄i anana ma sasa'e ro nggahina, ’Ana, laopu karawi aka nggaro anggo sanai ake.’

²⁹’Mada wati wa'uku,’ cambe b̄a anana ede. Pala sawa'u b̄a ede sia warina kananuna ro laona aka nggaro anggo ede.

³⁰Sawa'u b̄a ede amana ede laona aka anana ma kad̄uakaina, ro nanggahiku b̄une ranggahina d̄i anana ma sasa'e. ”Io Ama,’ cambe b̄a anana ma kad̄uakaina ede. Pala sia wati loana.

³¹D̄i ade weki ana d̄uana ede, mab̄eku ma karawina au rakane'ekai b̄a amana ede?” ”Ma sasa'e,” cambe b̄a dou-dou mana'ekai imam ro dou-dou mana'ekai Yahudi ede. Edempara Ruma Isa nggahina d̄i siad̄oho, ”Imbipu: Dou-dou mataki tagi bea ro dou-dou siwe masunda d̄ima'ulu ndad̄i anggota ela Karaja'an Allah ntewi kaisi nggomid̄oho.

³² B̄ara la Yahya Mataki kandeu karaso dou maina, ro naturu teiku nggomid̄oho cara mori kane'ekai b̄a Ruma, pala nggomid̄oho wati ne'emu imbi au rangoa ra tei b̄a la Yahya; pala dou-dou mataki tagi bea ro dou-dou siwe masunda na'imbiku d̄i la Yahya. Pala kone mawa'ura eda b̄a nggomid̄oho samenana ede, nggomid̄oho wati ngge'epu rungkamu kananumu ro wati imbimu d̄i Ruma.”

³³ ”Kade'epu conto ra ibara ma sab̄ua ake wali,” nggahi Ruma Isa. ”Sab̄ua dou mantau dana manggud̄a anggo d̄i sab̄ua nggarona. Kuta heko b̄a sia, ro ngarina kancoa d̄i puakai anggo, sawa'u b̄a ede tu'una uma d̄ese d̄itonggukai. Sawa'u b̄a ede sia mbeina kau sewa nggaro anggona ede d̄i dou-dou makarawi cengga hasi, edempara dou ede laona d̄i dana ra rasa makalai.

³⁴Rakakai b̄a oru poke wua anggo, dou mantau nggaro ede kauna lao ada d̄ohona aka dou ma karawi cengga hasi nggaro ede b̄a d̄imatarima ru'una.

³⁵Pala dou-dou makarawi nggaro ede wa'u ra letona ada-ada dou mantau dana ede: Ma sab̄uana d̄i b̄oe, ma kalaina d̄i hade, ro ma kalai wali d̄i tob̄a kai wadu.

³⁶Dou mantau nggaro ede kau walina lao adad̄ohona makalai, mancewi mboto ntewi kaisi ma sarambakaina. Pala siad̄oho iuna b̄une ra'iu b̄a lengana ma ulu.

³⁷Cumpukaina dou mantau nggaro ede, kauna lao ana ndaina, ’Pasti ana nahu d̄i lia ra horomana, kananu b̄a sia.

³⁸Pala dou-dou makarawi nggaro ede edana ana dou mantau nggaro ede, siad̄oho nggahina d̄i weki ndaid̄ohona, ’Akeku sia, d̄imakapasakana. Mai ndaita hadeku sia, loakud̄u raka b̄a ndaita pasakana!’

³⁹Edempara ana dou ede wa'u ra leto b̄a siad̄oho, hadena wa'u b̄a ede pakina ari lua.”

⁴⁰Sod̄i b̄a Ruma Isa, ”Nggara dou mantau nggaro ede mai mbalina, d̄ikab̄unena b̄a sia dou-dou makarawi cengga hasi nggaro ede?”

⁴¹Cambe b̄a siad̄oho, ”Pasti hadena dou-dou madab̄ae ede, edempara nggaro anggo ede nakauku karawi cengga hasi dou makalai ma ne'e mbei ru'u sia hasi dana ede rakasi wakatuna.”

⁴² Edempara nggahi Ruma Isa d̄i siad̄oho, ”Sab̄ua watipu parana baca b̄a nggomid̄oho ratunti ade Alkitab? ’Wadu ma wati loa d̄i kani b̄a dou-dou mataki tu'u uma wadu nawa'ura ndad̄i wadu ma sarambakaina. Ake rawi Ruma; nawancuku ntikana!’ ”

⁴³”Ndad̄i kawarapu,” nggahi Ruma Isa, ”Samenana hak kai ela Karaja'an Allah d̄i wehana d̄i nggomid̄oho ro nambeiku d̄i sab̄ua bangsa d̄imakalampana parenta-parenta Ruma Hatalla. [

⁴⁴Dou ma mab̄u d̄i wadu ede, d̄imaleli; ro dou rapita b̄a wadu ede, nanggiruku ndad̄i kalub̄u.]”

⁴⁵D̄iwakatu dou-dou mana'ekai imam ro dou-dou Farisi ringana conto ra ibara Ruma Isa ede, siad̄oho nab̄adeku b̄a one Ruma Isa nanuntuku mab̄oha siad̄oho.

⁴⁶Ndad̄i siad̄oho na'usahaku wa'u ra leto Sia. Pala siad̄oho nadahuku d̄i dou mamboto, b̄ara dou mamboto ede nawi'ikaiku Ruma Isa eded̄u sab̄ua dou nabi.