Read Bima MATIUS 23 Bible Online

MATIUS 23 - Bima bible

MATIUS 23

¹Edempara Ruma Isa nggahina d̄i dou mamboto ro d̄i anamorid̄oho-Na,

²”Guru-guru agama ro dou-dou Farisi rakana kuasa d̄imaka'aona hukum Musa.

³B̄ara ndedena to'akaipu ro b̄atupu sara'a raparentakai b̄a siad̄oho. Pala aina karawimu au rakarawi b̄a siad̄oho, b̄ara siad̄oho wati karawina au rateikai b̄a ndaina.

⁴Siad̄oho narahoku lampa rawi ma nggonggi ro nambeiku atora-atora ma tani, pala kone sato'i siad̄oho wati ne'ena bantu dou makalampana.

⁵ Samenana rakarawi b̄a siad̄oho cuma loakud̄u eda b̄a doumpa. Siad̄oho nasangajaku kani ai sambea ma paja-paja, ro nakanaruku kafero jumbana.

⁶Siad̄oho naca'u doho d̄i hid̄i ma taho poda wungasi ndiha-ndiha, ro d̄i kadera mataho poda d̄i uma-uma sambea.

⁷Siad̄oho naca'u d̄i horoma b̄a dou d̄i amba-amba, ro d̄i ou kai ’Pa Guru’.

⁸Pala nggomid̄oho, aina ngawa oukaisi ’Pa Guru’, b̄ara Gurumu sab̄uampa ro nggomid̄oho sara'ana eded̄u sa'e ro ari.

⁹Ro nggomid̄oho aina oumu kone sab̄ua dou kai ’Ama’ d̄i ade dunia ake; b̄ara Amamu cuma sab̄uampa, eded̄u Ama ma aka saroga.

¹⁰Ro nggomid̄oho aina ngawamu d̄i ou kai ’Dou mana'ekaina’, b̄ara dou mana'ekaimu cuma wara sab̄uampa eded̄u Sangaji Mambei salama rasake b̄a Ruma Hatalla.

¹¹ Dou ma wancu na'e d̄i ade weki nggomid̄oho, pab̄uapu ndad̄i dou d̄imakarawi weamu.

¹² Dou ma ka'ese weki d̄i ka'awa, ro dou ma ka'awa weki d̄i kad̄ese.”

¹³”Ihara nggomid̄oho guru-guru agama ro dou-dou Farisi! Nggomid̄oho maca'u coro-coro. Nggomid̄oho matapaku dou d̄imandad̄i anggota ela Karaja'an Saroga. Ndai nggomid̄oho wati ne'emu ndad̄i anggota ela Karaja'an Saroga, ro dou makalai ma ne'e ndad̄i ela Karaja'an Saroga, matapaku b̄a nggomid̄oho. [

¹⁴Ihara nggomid̄oho guru-guru agama ro dou-dou Farisi: Nggomid̄oho ma ca'u coro-coro. Nggomid̄oho makekoku dou-dou siwe mbaru mboha ro marampa weaku umana ro d̄i b̄ontokai rawimu madab̄ae ede nggomid̄oho mado'aku ma d̄ondo-d̄ondo. B̄ara ndedena hukumana d̄i ru'u b̄a nggomid̄oho pea nataniku!]

¹⁵Ihara nggomid̄oho guru-guru agama ro dou-dou Farisi! Nggomid̄oho ma ca'u coro-coro! Nggomid̄oho malao d̄o'o sapa moti, ro makaliliku dana ra rasa b̄a d̄i ru'u kandad̄ikaimu sab̄ua dou malu'u agamamu. Ro wa'usi lu'u dou ede d̄i agamamu, nggomid̄oho mandawiku dou ede d̄imalu'u ade anaraka ma d̄ua kali ncewi dab̄aena ntewi kaisi ndai nggomid̄oho.

¹⁶Ihara nggomid̄oho dou-dou mana'ekaina, ma mbuda! Nggomid̄oho mateiku ake, ’Nggara dou masumpa kai Bait Allah, dou ede wati d̄iki b̄a sumpana; pala nasumpasi kai masa d̄i ade Bait Allah, sia nad̄iki b̄a sumpana ede.’

¹⁷Nggomid̄oho dou-dou sampula ma mbuda! B̄e ma ipi penti: masana atao Bait Allah ma kandad̄ina raso masa ede?

¹⁸Nggomid̄oho mangoa ra tei rauku, ’Nggara sab̄ua dou masumpa kai mezeba, dou ede wati d̄iki b̄a sumpana; pala sia nasumpasi kai au rad̄onggo ra mbeina d̄i wawo mezeba ede, sia nad̄ikiku b̄a sumpana ede.’

¹⁹Nawancuku mbudamu nggomid̄oho! B̄e ma ipi penti? Rad̄onggo ra mbei atao mezeba ma kandad̄i raso au rad̄onggo ra mbei ede?

²⁰B̄ara ndedena, nggara sab̄ua dou nasumpasi kai mezeba, ede aona sia sumpakaina mezeba, ro sara'a rad̄onggo ra mbei ma wara ese wawo mezeba.

²¹Ro nggara sab̄ua dou sumpakaina Bait Allah, ede aona sia sumpakaina Bait Allah, ro d̄i ru'u Ruma Hatalla ma ngge'e d̄i hid̄i ede.

²² Ro nggara sab̄ua dou masumpa kai saroga, ede aona sia sumpakaina hid̄i dohokai Ruma, ro d̄i ru'u Ruma Hatalla ma dohokai ta esena.

²³ Ihara nggomid̄oho guru-guru agama ro dou-dou Farisi! Nggomid̄oho maca'u coro-coro, marakani b̄une selasi, adas maci, ro jinta rau, nggomid̄oho mambeiku cengga sampuru d̄i Ruma. Sapodakaina lampa rawi-lampa rawi ma ipi penti ade hukum-hukum Taurat, b̄une misakai: Ma'adi, kasi ade, ro mataho ra to'a wati kandad̄i au b̄a nggomid̄oho. Sapodakaina edeku d̄i pab̄ua karawi b̄a nggomid̄oho, kai wati wi'imu makalai-lai rau.

²⁴Nggomid̄oho dou-dou mana'ekaina, ma mbuda! Karoku ade oi nonomu masariku b̄a nggomid̄oho, nggarasi onta manonoku b̄a nggomid̄oho!

²⁵Ihara nggomid̄oho guru-guru agama ro dou-dou Farisi! Nggomid̄oho maca'u coro-coro! Pingga ro mangkomu ma'alo karaso weampa kontuna b̄a nggomid̄oho, sapodakaina tad̄eina nawancuku sampuna kai lampa rawi raraka b̄a nggomid̄oho kai makasa rana'e ademu.

²⁶Farisi mbuda! Alo karaso wa'upu tad̄eina pingga ra mangkomu ede, loakaina raso ta kontu rauna!

²⁷ Ihara nggomid̄oho guru-guru agama ro dou-dou Farisi! Nggomid̄oho ma ca'u coro-coro! Nggomid̄oho b̄une rade rakab̄ura; ta arina tada ntikana, pala ta d̄eina b̄ini kai b̄a peke ro sara'a ma wou-wou.

²⁸Ndede rau nggomid̄oho. Ta arina tada tahomu d̄i dou; pala tad̄eina nggomid̄oho b̄ini kai b̄a mapalasu ro sapamu parenta-parenta Ruma.”

²⁹”Ihara nggomid̄oho guru-guru agama ro dou-dou Farisi! Nggomid̄oho ma ca'u coro-coro! Nggomid̄oho mandawiku rade ma ntika-ntika d̄i ru'u b̄a nabi-nabi, ro maca'u kantika tugu d̄ikawarakai dou-dou ma morina taho.

³⁰Ro nggomid̄oho manggahiku, ’Pai nami mamori aipu jaman wa'i ra waro nami ntoina, nami wati d̄imab̄atu siad̄oho mahade nabi-nabi.’

³¹Ndad̄i nggomid̄oho mangaku b̄a ndaimu b̄a one nggomid̄ohora londo ra mai dou-dou ma rahade nabi-nabi!

³²Nggara ndedesi, karawi ncaupu ro kanggoripu dosa-dosa rawa'u tampu'u b̄a wa'i ra waromu ede!

³³Nggomid̄oho dab̄ae ro londo ra mai dou dab̄ae! B̄uneku loakaimu hori weki rad̄i hukuma d̄i anaraka?

³⁴Kade'e katahopu: Nahu d̄imanggadu d̄i ru'u nggomid̄oho nabi-nabi, dou-dou maloa timba ra lemba, ro guru-guru; sarundena d̄i ade weki siad̄oho d̄i hade b̄a nggomid̄oho, ro sarunde walina salib b̄a nggomid̄oho. Wara d̄ikancoki b̄a nggomid̄oho d̄i ade uma-uma sambeakai, ro mafou coco b̄a nggomid̄oho d̄i sab̄ua kota lao d̄i kota makalai.

³⁵B̄ara ndedena, nggomid̄oho d̄i hukum b̄ara hademu samenana dou ma wati wara ncara — ratampu'u hadekai la Habel ma wati wara ncara, sampe hadekaimu la Zakaria ana la Berekia, rahade b̄a nggomid̄oho d̄i hela Bait Allah lab̄o mezeba.

³⁶Imbipu: Sara'ana ede d̄itanggu b̄a dou-dou jamana ake.”

³⁷”Yerusalem, Yerusalem! Nabi-nabi hade b̄a nggomi. Dou-dou ranggadu b̄a Ruma Hatalla tob̄a b̄a nggomi kai wadu sampe madena. Wa'ura pila-pila kali Nahu ne'eku pohu kab̄oro sara'a ela ra doumu, b̄une ina janga mab̄onto ana d̄ipita kaletena, pala nggomid̄oho wati ne'emu!

³⁸B̄ara ndedena Ruma Hatalla watid̄u d̄ende ra wa'a walina nggomi.

³⁹D̄ib̄ademu: Tampu'u wakatu ake nggomi wati d̄ima'eda wali Nahu sampe nggahi b̄a nggomi, ’D̄imbei bareka Sia ma maikai ngara Ruma.’ ”