Read Bima MATIUS 24 Bible Online

MATIUS 24 - Bima bible

MATIUS 24

¹Wakatu Ruma Isa tu'u wi'ina Bait Allah, anamorid̄oho-Na mai rakana Sia ro turu teina Bait Allah ede.

²Nggahi Ruma Isa d̄i siad̄oho, ”Sab̄ua eda b̄a nggomid̄oho samenana ede? D̄i b̄ademu, wati wara kone sab̄ua wadu rad̄i Bait Allah ede d̄imangge'e sadundu weki d̄ihid̄ina. Sara'ana d̄i d̄umba.”

³Edempara Ruma Isa laona aka doro to'i Zaitun, ro Sia wunga dohona, mai anamorid̄oho-Na nuntu kai sacara weki lab̄o Sia. ”Ta ngoa to'i pu d̄i madad̄oho b̄une aiku samenana ede ndad̄ina,” nggahi siad̄oho d̄i Sia. ”Auku tandana d̄i b̄adekai mai Ita ro cumpura jamana?”

⁴Cambe b̄a Ruma Isa, ”Aina kabare, ai to'ina nggomid̄oho b̄ohakai b̄a tipu.

⁵B̄ara mboto dou d̄imamai kai ngara Nahu ro nanggahiku, ’Nahuku Sangaji Mambei salama!’ Siad̄oho d̄imatipu mboto dou.

⁶Nggomid̄oho d̄imaringa eli ncao ra ntub̄a ro haba lewa ra laka, pala aina dahu. B̄ara lampa rawi ede pab̄ua d̄imandad̄i. Pala ede lainapu wakatuna kiama.

⁷Bangsa ma sab̄ua d̄imalewa lab̄o bangsa ma kalaina, ro negara ma sab̄ua d̄imamai dei negara ma kalaina. Tab̄e-b̄e d̄imawara bahaya sarahid̄o ro epu.

⁸Sara'ana ede ampode tampu'ukaina, b̄unesi pili ra'iu b̄a dou siwe ma wunga ne'e nggana.

⁹ Edempara nggomid̄oho d̄i wa'u ra leto rad̄iwa'a b̄a dou d̄i kancoki ro d̄i hade. Sara'a dunia d̄imadaca'u nggomid̄oho b̄ara nggomid̄oho anamori Nahu.

¹⁰D̄i wakatu ede mboto dou d̄imamurta, ro nakamab̄u angi ro nadaca'u sab̄ua d̄i sab̄ua dou.

¹¹Mboto nabi-nabi palasu d̄imawontu, ro natipuku dou mamboto.

¹²Karawi madab̄ae nawancuku roci nggetena sampe mboto dou mawatid̄u loa meci angi wali.

¹³ Pala dou ma taha sampe cumpukaina, d̄ikasalama.

¹⁴Ro Haba Mataho Karaja'an Saroga d̄i ngoa ra kahaba d̄i sara'a dunia, loakud̄u samenana dou d̄imaringana. Sawa'u b̄a ede ampona mai kiama.”

¹⁵ ”Nggomid̄oho d̄ima'eda karawi madab̄ae makalelina, b̄une ranggahi b̄a Nabi Daniel, kid̄i d̄i hid̄i ma raso. (Catata d̄i ru'u b̄a dou mabaca: Tio kab̄aepu auku aona!)

¹⁶D̄i wakatu ede, dou ma wara aka Yudea pab̄uaku lao raina aka doro-doro.

¹⁷ Dou ma wara ese wawo b̄utu uma aina londo b̄a ne'ena weha au-au d̄i ade umana.

¹⁸Dou ma wara aka omana aina mbali b̄a ne'ena weha jumbana.

¹⁹Nawancuku samangikai ade ainaina ede, d̄i ru'u b̄a dou siwe ma na'e loko, ro ina ma mbuipu susu anana!

²⁰Do'apu loakud̄u nggomid̄oho aina sampe raimu wunga oru ura atao d̄i ainaina Sabat.

²¹ D̄i ainaina ma samangi kai ade ede d̄imawara susa ra ncoki mana'e b̄une ma watipu iu ndad̄i ratampu'u aipu saramba ndad̄i dunia sampe wakatu ake, ro wati d̄imawara wali.

²²Nawatisi kaporo b̄a Ruma Hatalla wakatuna ede, ndad̄i wati wara kone sab̄ua dou d̄imasalama. Pala b̄ara ela-Na, Ruma Hatalla nakaporoku wakatuna ede.

²³D̄iwakatu ede nggara warasi sab̄ua dou manggahi d̄i nggomid̄oho, ’Tio, Sangaji Mambei salama ede wara ta ake! atao Sia wara ta aka!’ — aina imbimu d̄i dou ede.

²⁴B̄ara d̄imawontu dou-dou ma mbei salama ma palasu ro nabi-nabi palasu. Siad̄oho nakarawiku lampa rawi ma heba poda ro lampa rawi ma b̄isa ra guna d̄itipukaina, nggara loasi, ela Ruma Hatalla rau.

²⁵Ndad̄i, kawarapu! Nahu wa'ura ngoa uluku nggomid̄oho sawatipu b̄a ndad̄ina lampa rawi ede.

²⁶ Nggara nggahisi b̄a dou d̄i nggomid̄oho, ’Tio, Sia wara ta aka d̄i so sarae!’ — Nggomid̄oho aina laomu ta aka. Atao nggahisi b̄a siad̄oho, ’Tio, Sia cili wekina d̄ei b̄ili ta ake!’ — aina imbimu.

²⁷B̄ara maina Ana Manusia b̄une santika taroa makakila masambura maina tawela ele, ro nakataroaku sampe tawela d̄ina.

²⁸ Tab̄era warakai timba, ta ede wara nasi mataki ngaha timba.”

²⁹ ”Wati ntoina sawa'u b̄a ncoki rasusa wakatu ede, liro d̄imandad̄i rindi, ro wura watid̄u taroa walina. Ntara-ntara d̄imamab̄u, ra'ese langina ro samenana makuasa ese woha ai d̄imandad̄i mbari mbura.

³⁰ Sawa'u b̄a ede tanda Ana Manusia d̄imatada ese langi. D̄i wakatu ede samenana bangsa d̄i dunia d̄imanangi. Siad̄oho d̄ima'eda Ana Manusia maina ese wawo apu kai kuasa ro d̄ese ra ntasana ma na'e.

³¹Tarompe na'e d̄i ka'eli, ro Ana Manusia nakauku mala'eka-mala'eka-Na d̄imakab̄oro ela-Na d̄i upa mbua wela dunia, tampu'u rad̄i sumpu langi ma sab̄ua sampe d̄i sumpu langi ma kalaina.”

³²”Wehapu tana'o rad̄i fu'u ara. Nggara sanga-sanga mpidana jao ra mapu, ro tampu'u ncurina, nggomid̄oho mab̄adeku b̄a one oru mpana aina d̄enira.

³³Ndede rau nggara nggomid̄oho ma'edasi lampa rawi ede mandad̄i, nggomid̄oho mab̄adeku b̄a one wakatuna nad̄eni podara.

³⁴D̄ib̄ademu! Lampa rawi-lampa rawi ede d̄imandad̄i sawatipu b̄a made sara'a dou-dou ma mori ake.

³⁵Langi ro dunia d̄imambora, pala nggahi ra eli Nahu ngge'e mpa santoi-ntoina.”

³⁶”Wati wara ma b̄adena b̄une aiku ainain ra wakatuna, mala'eka-mala'eka d̄i saroga wati, Ana Ruma Hatalla rau wati b̄adena, cuma Ama mpoampa ma b̄ade.

³⁷ Namaisi Ana Manusia peade, ka'ada'an b̄une aipu jaman Nuh ntoina.

³⁸Aipu ainain-ainaina sawatipu b̄a mbere na'e ede, dou-dou nangaha ra nono, ro nika. Ndede ncau-ncau sampe ainaina lu'ukai Nuh d̄i ade kapa.

³⁹ Wakatu mbere na'e ede maina d̄i sara'a siad̄oho, ampona kawara weki siad̄oho b̄a au ma wunga ndad̄i ede. B̄une ede rauku ka'ada'ana pea namaisi Ana Manusia.

⁴⁰D̄i wakatu ede, d̄ua dou mawunga karawi aka omana: Sab̄ua dou d̄i wa'a, ro sab̄ua dou d̄i wi'i.

⁴¹Dou siwe d̄uana mawunga gili gando: sab̄ua d̄iwa'a, ro sab̄ua dou d̄iwi'i.

⁴²Ndad̄i, aina kabare, b̄ara nggomid̄oho wati b̄ademu b̄une aiku mai Rumamu.

⁴³ Kawarapu ake! Paina b̄adesi b̄a dou mantau uma b̄oe pila maina dou mampanga ai mangad̄i, sia wati pehena maru, b̄aib̄a dalu'ukai b̄a dou mampanga ade umana.

⁴⁴B̄ara ndedena, nggomid̄oho rau pab̄uapu sadia. B̄ara Ana Manusia namai wunga dasanau nggomid̄oho.”

⁴⁵Nggahi wali Ruma Isa, ”Nggara ndedesi, ada ma b̄eku ma to'a ro maloa timba ra lemba? Siaku d̄ihanta b̄a rumana d̄imandad̄i mana'ekaina d̄i samenana ada makalai, loakud̄u sia mambei ngaha ra nono rakasi wakatuna.

⁴⁶Nawancuku neo adena ada ede namai mbalisi rumana, ro edana sia mawunga kalampa takina.

⁴⁷Imbipu, rumana ede na'imbikaiku sara'a ntau ra warana d̄i adana ede.

⁴⁸Pala nggara dab̄aesi adana ede, sia nanggahiku d̄ei adena.

⁴⁹Ruma nahu ahopu ampona mbali, edempara sia tampu'ura b̄oena ada-ada ma kalai, ro nangaha ra nonoku lab̄o dou-dou mamawu.

⁵⁰Edempara rumana ede mai mbalina d̄i ainaina ra wakatu wati sangka-sangka b̄a sia.

⁵¹Edempara ada ede kancoki kapoda b̄a rumana ede, ro d̄i paki aka hid̄i dou-dou ma ca'u coro-coro. Siad̄oho d̄imanangi ro d̄imancoki iu ta aka.”