Read Bima MATIUS 25 Bible Online

MATIUS 25 - Bima bible

MATIUS 25

¹ ”Ana Manusia namaisi kai Ruma, ka'ada'ana b̄une ade conto ra ibara ake: Sampuru dou siwe sampela mad̄ende b̄unti, cua weha menana ilo, edempara lao rai aona b̄unti mone.

²Lima douna d̄i ade weki siad̄oho ede nasampula, ro lima dou ma kalaina naloa timba ra lemba.

³Lima dou siwe sampela ma sampula ede wa'ana ilo, pala wati wa'a sadiana mina.

⁴Lima dou siwe sampela ma loa timba ra lemba, wa'ana ilo ro wa'a sadiana mina.

⁵B̄unti mone ede aho maina, ndad̄i dou-dou siwe sampela ede tampu'ura ei madana edempara maruna.

⁶Sama na'era ai, ampode ringa eli kanggica, ’Arara b̄unti mone! Mai tarai aoku sia!’

⁷Sampuru dou siwe sampela ede tu'una, ro siad̄oho ka'ana ilona.

⁸Dou-dou siwe sampela ma sampula ede nggahina d̄i lengad̄ohona ma loa timba ra lemba, ’Mbeijapu minamu sato'i d̄i ru'u b̄a nami, b̄ara ilo nami nane'era made.’

⁹’Wati loa!’ cambe b̄a dou-dou siwe sampela ma loa timba ra lemba ede, ’b̄ara peade ndai sara'ana wati ncihi minata. Lao welipu d̄i toko.’

¹⁰Edempara dou-dou siwe sampela ma sampula ede lao welina mina. Wunga lao siad̄oho, ronggara b̄unti mone. Dou siwe sampela limana ma wa'ura sadia ede lu'u sama-sama lab̄o b̄unti mone d̄i ade hid̄i ndihakai, ro tad̄a rau d̄ikempa!

¹¹ Edempara dou-dou siwe sampela ma ralao weli mina maina, ou b̄a siad̄oho, ’Ruma, Ruma hengga to'i weapu ncai d̄i ru'u madad̄oho.’

¹²Pala cambe b̄a b̄unti mone ede, ’Nahu wati pataku nggomid̄oho!’ ”

¹³Edempara Ruma Isa kanggorina conto ra ibara-Na ede ndake, ”B̄ara ndedena jaga-jagapu, b̄ara nggomid̄oho wati b̄ademu ainain ra wakatuna.”

¹⁴ ”Ana Manusia namaisi kai Ruma ka'ada'ana b̄une conto ra ibara ake. Sab̄ua dou mone mane'e lao d̄i hid̄i ma d̄o'o. Ou b̄a sia adad̄ohona, edempara imbikaiku ntau ra warana d̄i siad̄oho.

¹⁵D̄i sanikina adana ede mbei b̄a sia kai cua-cua d̄isanggo b̄a ndaina. D̄i sab̄ua dou mbei b̄a sia lima riwu piti masa. D̄imakalai mbei b̄a sia d̄ua riwu piti masa. Ro d̄i sab̄ua dou wali mbei b̄a sia sariwu piti masa. Edempara sia laona.

¹⁶Ada ma ratarima lima riwu piti masa ede lao daga lalona, edempara rakana kanaha lima riwu piti masa wali.

¹⁷Ndede rau ada ma tarima d̄ua riwu piti masa ede, rakana kanaha d̄ua riwu piti masa wali.

¹⁸Pala ada ma ratarima sariwu piti masa ede, lao ngarina kancoa d̄i dana, edempara cilikaina piti rumana ede.

¹⁹Ntoi poda sawa'u b̄a ede, ruma b̄a ada-ada ede dulana, ro tampu'ura rekena lab̄o siad̄oho.

²⁰Maira ada ma tarima lima riwu piti masa ede, ro d̄onggona sampuru riwu. ’Ruma,’ nggahina, ’Ita rambeita mada lima riwu piti masa. Tatiopu, mada wa'ura raka weaku kanaha lima riwu wali.’

²¹’Taho,’ nggahi rumana ede, ’nggomi eded̄u ada ma taho ra ma to'a. B̄ara nggomi loa d̄i imbikai ma sato'i, nahu d̄ima'imbikai ma mboto d̄i nggomi. Mai lu'ura b̄atu kad̄ihi ade lab̄o nahu!’

²²Edempara mai ada ma ratarima d̄ua riwu piti masa, ro nggahina, ’Ruma Ita wa'ura mbeita d̄ua riwu piti masa d̄i mada. Tatiopu, mada wa'ura raka weaku kanaha d̄ua riwu piti wali.’

²³’Taho’, nggahi rumana ede, ’nggomi ada ma taho ra to'a. B̄ara nggomi loa d̄i imbikai ma sato'i, nahu d̄ima'imbikai ma mboto wali d̄i nggomi. Mai lu'ura b̄atupu kad̄ihi ade lab̄o nahu!’

²⁴Edempara mai ada ma tarima sariwu piti masa ede, ro nggahina, ’Ruma, mada kab̄adeku Ita sab̄ua dou ma toku. Ita mapoke rawehaku wuana, d̄i hid̄i watira nggud̄akaita, ro mawehaku hasi d̄i hid̄i wati raparikaita d̄ei.

²⁵Mada kadahuku, ndad̄i mada lao wi'i ciliku piti Ita ede d̄i ade dana. Ake piti Ita.’

²⁶’Nggomi ada ma dab̄ae ro d̄aju! Nggahi rumana ede, nggomi mawa'ura b̄ade b̄a one nahu mapoke raweha wuana d̄i hid̄i wati ranggud̄akai b̄a nahu ro maweha hasi d̄i hid̄i wati raparikaiku d̄ei?

²⁷Nggara ndedesi, sapodakaina nggomi lao wi'ipu piti nahu ede d̄i bank, loakud̄u raka wakatu dula nahu, loa tarima mbali pitiku ede lab̄o b̄ungana.

²⁸B̄ara ndedena, wehapu piti ede d̄i sia, ro mbeipu aka dou ma ntau sampuru riwu piti masa ede.

²⁹ B̄ara dou ma wa'ura wara ntauna, d̄i mbei kamboto wali, ro sia d̄imancewi. Pala dou ma wati wara ntauna, sato'i ma mbuipu wara d̄i ndaina ede d̄iweha rau.

³⁰ Ro ada ma wati wara onena ede, pakipu d̄i rindikaina ta ari lua. Ta aka sia d̄imanangi ro masusa ra ncoki iu!’ ”

³¹ ”Namaisi Ana Manusia kai Sangaji kaina d̄ende b̄a samenana mala'eka-Na, Sia d̄imadoho ese wawo kadera sangaji-Na ma d̄ese ra ntasa.

³²Samenana bangsa d̄ikab̄oro d̄i tando Sia. Edempara Sia d̄imacenggana siad̄oho ndad̄i d̄ua kalompo b̄une ompu jimba makalai jimba ro mbe'e.

³³Dou-dou ma karawi au rakane'ekai b̄a Ruma Hatalla d̄ikab̄oro tawela wana-Na, ro ma kalai tawela ku'i-Na.

³⁴Edempara Sangaji ede d̄imanggahi d̄i dou-dou tawela wana-Na, ’Maira nggomid̄oho rambei bareka b̄a Ama-Ku. Lu'ura d̄i ade Karaja'an rasadia d̄i ru'umu tampu'u ra'aipu ndad̄i dunia.

³⁵B̄ara wakatu Nahu hid̄oku, nggomid̄oho mambeiku ngaha Nahu, ro wakatu Nahu mango wo'oku, nggomid̄oho mambeiku oi nono Nahu. Nahu dou lai rasa, nggomid̄oho matarimaku Nahu d̄i umamu.

³⁶Wakatu Nahu wati wara kani ra lomboku, nggomid̄oho mambeiku kani ra lombo d̄i Nahu. Wakatu Nahu supuku, kab̄ua b̄a nggomid̄oho Nahu. Rabui b̄a dou Nahu, nggomid̄oho mabantuku Nahu.’

³⁷Edempara dou-dou ede d̄imanggahi, ’Ruma, b̄une ai madad̄oho ra'edamu Ita Ruma mahid̄o edempara mbei b̄a madad̄oho ngaha Ita Ruma, atao mango wo'ota edempara mbei b̄a madad̄oho oi nono?

³⁸B̄une aita eda b̄a madad̄oho Ita Ruma b̄une dou lai rasa, edempara tarima b̄a madad̄oho Ita Ruma d̄i ade uma madad̄oho? B̄une aita Ita Ruma parana wati ntauta kani ra lombo, edempara mbei b̄a madad̄oho kani ra lombo Ita Ruma?

³⁹B̄une aita madad̄oho ra'edamu Ita Ruma masupu atao rabui b̄a dou edempara bantu b̄a madad̄oho Ita Ruma?’

⁴⁰Sangaji ede nacambeku, ’D̄i b̄ademu, aipu nggomid̄oho karawimu lampa rawi ede, konena d̄i sab̄ua dou d̄i ade weki cina ra angi Nahu rakatuna ra kab̄awa b̄a dou. Ede aona nggomid̄oho karawimu d̄i ru'u b̄a Nahu!’

⁴¹Edempara Sangaji ede d̄imanggahi d̄i dou-dou tawela ku'i-Na, ’Laora aina wara ta ake, nggomid̄oho dou ma ipi dab̄ae! Lu'ura d̄i ade afi ma wati loa made, wa'ura sadia d̄i ru'u b̄a Ibilis ro mala'eka-mala'ekana!

⁴²B̄ara wakatu hid̄o Nahu, wati mbei b̄a nggomid̄oho ngaha Nahu, wakatu Nahu mango wo'oku, nggomid̄oho wati mbeimu oi nono Nahu.

⁴³Nahu sab̄ua dou lai rasa, nggomid̄oho wati tarimamu Nahu d̄i ade umamu. Nahu wati ntauku kani ra lombo, nggomid̄oho wati mbeimu Nahu kani ra lombo. Nahu masupu ro rabui, nggomid̄oho wati kab̄uamu Nahu.’

⁴⁴Edempara siad̄oho d̄imanggahi d̄i Sia, ’Ruma, b̄une aita madad̄oho ra'edata Ita Ruma mahid̄o, mamango wo'o, atao kai dou lai rasa, wati ntau kani ra lombo, masupu atao ma lu'u d̄i ade bui, edempara madad̄oho wati bantumu Ita Ruma?’

⁴⁵Sangaji ede d̄imacambe, ’D̄ib̄ademu: wakatu nggomid̄oho wati ne'emu bantu dou ma ipi katuna rakab̄awa b̄a dou ake, ede aona nggomid̄oho wati ne'emu bantu Nahu.’

⁴⁶ Edempara dou-dou ede d̄ihukum kai hukuma ma'ederahid̄i, pala dou-dou ma rakarawi au rakane'ekai b̄a Ruma Hatalla d̄ima'iu mori masapodakaina ro ma'ederahid̄i.”