Read Bima MATIUS 26 Bible Online

MATIUS 26 - Bima bible

MATIUS 26

¹Wakatu Ruma Isa nggori ngoa ra teina samenana lampa rawi ede, nggahi Sia d̄i anamorid̄oho-Na.

² ”Nggomid̄oho mab̄adeku d̄ua nai wali Aruraja Paskah, ro Ana Manusia d̄id̄onggo loakud̄u d̄isalib!”

³Aipu ede dou-dou mana'ekai imam ro dou-dou mana'ekai Yahudi kab̄orona weki aka asi mana'ekai imam-imam eded̄u Kayafas.

⁴Siad̄oho mafakana b̄a ne'ena wa'u ra leto Ruma Isa kai cara nari-nari, ro nahadeku Sia.

⁵”Pala,” nggahi siad̄oho, ”Aina karawi lampa rawi ede ade wakatu ndiha, b̄ara pea ede nawontu ngango d̄i ade woha ela ra dou.”

⁶Wakatu Ruma Isa warana aka Betania, d̄i uma la Simon ntoina ma rasupu ncola,

⁷ sab̄ua dou siwe maina d̄i Ruma Isa. Wa'a b̄a sia sab̄ua boto marmar isina mina mengi ma nggali co'i. Wakatu Ruma Isa wunga doho ngahana, dou siwe ede luana mina mengi ede ese wawo tuta Ruma Isa.

⁸Anamori-anamori Ruma Isa edana lampa rawi ede ndad̄i mbani. ”Auku onena sara'ana ake d̄i paki-paki?” nggahi siad̄oho.

⁹”Mina mengi ede loa d̄ilanda kai co'i ma nggali, ro pitina d̄imbei dou mancoki mori!”

¹⁰Ruma Isa nab̄adeku fiki ra kananu siad̄oho, edempara nggahi Sia, ”B̄ab̄auku nggomid̄oho d̄ikasusakaimu dou siwe ake? Sia nakarawiku ma taho ra ntika d̄i ru'u b̄a Nahu.

¹¹ Dou mancoki ngge'empa warana d̄iwoha nggomid̄oho, pala Nahu wati santoi-ntoina d̄iwoha nggomid̄oho.

¹²Kai luana mina mengi ede d̄i sarumbu Nahu, sia nasadiaku Nahu d̄i ru'u umbukai Nahu.

¹³Imbipu! D̄i sara'a dunia, tab̄e-b̄e Haba Mataho ma ramai ta Ruma Hatalla d̄i ngoa ra kahaba, rawi dou siwe ake d̄i nuntu rau tanda kawarakai rawi sia.”

¹⁴Edempara sab̄ua dou d̄i ade sampuru d̄ua weki anamori Ruma Isa, ngarana la Yudas Iskariot. Laona aka dou-dou mana'ekai imam.

¹⁵ Nggahi sia d̄i siad̄oho ede, ”Auku d̄i mbei b̄a itad̄oho d̄i ru'u mada, nggara mada mad̄onggo Isa d̄i ru'u itad̄oho?” Edempara siad̄oho rekena tolu mpuru piti salaka, edempara piti ede mbeina la Yudas.

¹⁶Tampu'u ede la Yudas ngupana wakatu ma taho d̄i d̄onggokaina Ruma Isa d̄i dou-dou ma musu-Na.

¹⁷D̄i ainaina masaramba ade Aruraja Roti Mawati ntau B̄uha, anamori Ruma Isa maina d̄i Sia. Siad̄oho nasod̄iku, ”Tab̄e ne'e b̄a Ita d̄i sadiakai b̄a madad̄oho ngaha ra nono Paskah d̄i ru'u Ita?”

¹⁸Cambe b̄a Ruma Isa, ”Laopu aka sab̄ua dou d̄i kota ro nggahipu d̄i sia, ’Nggahi Pa Guru, wa'ura raka wakatuna d̄i ru'u Nahu; Nahu mane'e kandiha Paskah d̄i umamu sama-sama lab̄o anamorid̄oho-Ku.’ ”

¹⁹Anamori-anamori Ruma Isa karawina au rakaukai b̄a Ruma Isa d̄i siad̄oho. Siad̄oho lao sadiana ngaha ra nono Paskah ede.

²⁰Sawa'u aimangad̄i, Ruma Isa ro anamori-Na sampuru d̄ua doho ngahana.

²¹Wunga ngaha siad̄oho, nggahi Ruma Isa, ”Ringapu: sab̄ua dou d̄i ade weki nggomid̄oho d̄imad̄onggo Nahu d̄i dou-dou ma musu Nahu.”

²²Ringana nggahi ede, anamori-anamori Ruma Isa ndad̄i nawancuku ncoki adena. Edempara siad̄oho, sab̄ua-sab̄ua dou tampu'u sod̄ina Ruma Isa, ”Tantu laina mada ranggahi b̄a Ita Ama?”

²³ Cambe b̄a Ruma Isa, ”Dou ma d̄eta roti d̄i ade mangko sama-sama lab̄o Nahu, sia edeku d̄imad̄onggo Nahu d̄i dou-dou ma musu Nahu.

²⁴Poda Ana Manusia d̄imamade b̄une ratunti d̄i ade Alkitab. Pala ihara dou mad̄onggona d̄i dou-dou ma musu Ana Manusia! Nancewi tahopu ru'u dou ede nggara dou ede wati parana ranggana!”

²⁵Edempara la Yudas ma ka'ihana ede nggahina, ”Tantu laina mada ranggahi b̄a Ita, Pa Guru?” Cambe b̄a Ruma Isa, ”Ndedeku nggahi b̄a nggomi!”

²⁶Wakatu ngaha siad̄oho, Ruma Isa wehana roti, edempara do'a syukuna. Sawa'u b̄a ede Sia tob̄e-tob̄ena roti ede kai rima-Na, edempara mbeina d̄i anamorid̄oho-Na, ro nggahi-Na, ”Weha, ro ngahara; akeku sarumbu Nahu.”

²⁷Sawa'u b̄a ede Sia wehana mo anggo, edempara do'a syukuna d̄i Ruma Hatalla. Sawa'u b̄a ede Sia mbeina mo ede d̄i anamorid̄oho-Na, ro nggahina, ”Nonora, nggomid̄oho sara'a.

²⁸ B̄ara akeku ra'a Nahu ma kasahana rasake b̄a Ruma Hatalla — ra'a rab̄oho d̄i ru'u b̄a dou mamboto d̄i kangampu weakai dosa siad̄oho.

²⁹Imbipu: Nahu wati d̄imanono anggo ake wali sampe rakakai wakatu Nahu nonoku anggo ma b̄ou sama-sama lab̄o nggomid̄oho d̄i Karaja'an Allah Ama-Ku.”

³⁰Sawa'u b̄a ede siad̄oho rawana sab̄ua rawa roi ra wadi. Ro sawa'u b̄a ede siad̄oho laona aka doro to'i zaitun.

³¹ Edempara Ruma Isa nggahina d̄i anamorid̄oho-Na, ”Aimangad̄i ake wa'u sara'a nggomid̄oho d̄imarai tu'u wi'i Nahu; b̄ara ade Alkitab wara ratunti: Nggahi Ruma Hatalla, ’Nahu d̄imahade ompu jimba ede, ro jimba-jimbana d̄imarai ncengga-ncengga.’

³² Pala sawa'u b̄a Nahu d̄ikamori mbali, Nahu d̄imalao ulu aka Galilea.”

³³Nggahi la Petrus d̄i Ruma Isa, ”Co'opu sara'a siad̄oho ma kalai tu'u wi'ina Ita Pa, pala mada wati d̄imatu'u wi'i Ita!”

³⁴”Kawarapu,” nggahi Ruma Isa d̄i sia, ”aimangad̄i ake wa'u, sawatipu b̄a koko janga, nggomi tolu kali rungkamu sake d̄i Nahu!”

³⁵Cambe b̄a la Petrus, ”Kone kamade sama lab̄o Ita, mada wati d̄imanggahi b̄a one mada wati pataku Ita!” Ro sara'a anamorina ma kalai nggahi ndede rauna.

³⁶Sawa'u b̄a ede Ruma Isa laona lab̄o anamorid̄oho-Na d̄i sab̄ua hid̄i ngarana Getsemani. Ta aka Sia nggahina d̄i anamorid̄oho-Na, ”Dohopu ta ake Nahu malao do'a.”

³⁷Edempara Sia recena la Petrus ro d̄uana ana la Zebedeus lao sama-sama lab̄o Sia. Sia natampu'ura iuna lalai ade ra darura ade-Na.

³⁸Nggahi Sia d̄i anamorid̄oho-Na, ”Nahu wancuku lalai adeku, b̄une d̄imamade iuku, midipu nggomid̄oho ta ake, b̄ola lab̄opu Nahu.”

³⁹Sawa'u b̄a ede Ruma Isa lao d̄o'o walina sato'i, edempara Sia sujuna awa dana ro do'ana, ”Ama,” nggahi-Na, ”nggara loasi, kad̄o'o to'ipu lab̄o Mada ncoki ra susa ma pab̄ua d̄i iu b̄a Mada ake. Pala aina b̄atu d̄i ne'e b̄a Mada, malaisi b̄atupu rakane'e b̄a Ita Ama.”

⁴⁰Sawa'u b̄a ede Ruma Isa lao mbalina aka anamori-Na toluna ro edana siad̄oho wunga maruna. Nggahi Sia d̄i la Petrus, ”Kone b̄a samporo to'i nggomid̄oho tolu wati wa'umu b̄ola lab̄o Nahu?

⁴¹Jaga-jagapu, ro do'apu loakud̄u nggomid̄oho wati iumu coba'a. Poda ne'e b̄a ademu karawi ma taho pala nggomid̄oho wati sanggomu, b̄ara tabe'a manusia ede mapu ra rome.”

⁴²Sakali wali Ruma Isa lao do'ana, nggahi-Na, ”Ama, nggara ncoki ra susa ake pab̄ua d̄i iu b̄a Mada, ro wati loa d̄i kad̄o'o, co'opu kane'e b̄a Itampa Ama d̄imandad̄i.”

⁴³Sawa'u b̄a ede Ruma Isa lao mbali walina, ro edana anamorid̄oho-Na mambuipu maru, b̄ara siad̄oho na'ipiku ei madana.

⁴⁴Sakali wali Ruma Isa tu'u wi'ina siad̄oho ro katolu kalikaina lao do'ana kai renta ma sama.

⁴⁵Sawa'u b̄a ede Sia lao mbali walina aka anamorid̄oho-Na ro nggahi-Na, ”Mbui ngge'epu maru sanawamu nggomid̄oho? Tio, wa'ura raka wakatuna Ana Manusia d̄id̄onggo d̄i kuasa dou-dou madosa.

⁴⁶Tu'ura, mai talaora ndaita. Tiopu! Dou mad̄onggo Nahu d̄i dou-dou ma musu Nahu nawa'ura mai!”

⁴⁷Wunga Ruma Isa mbuipu nuntuna, mai la Yudas, sab̄ua dou d̄i ade weki sampuru d̄ua anamori-Na ede, masama-sama lab̄o sia, mai rau dou mamboto ma wa'a peda ro kapodo. Siad̄oho rakau b̄a dou-dou mana'ekai imam ro dou-dou mana'ekai dou Yahudi.

⁴⁸Dou mad̄onggo Ruma Isa d̄i dou-dou ma musu-Na ede nawa'ura ngoa d̄i dou mamboto tanda ake: ”Dou rangilu b̄a mada, edeku douna, wa'u ra letopu Sia!”

⁴⁹Ndede ronggana d̄i hid̄i ede, la Yudas lao raka lalona Ruma Isa ro nggahina, ”Salam Pa Guru!” edempara ngilu b̄a sia Ruma Isa.

⁵⁰Cambe b̄a Ruma Isa, ”Cina, d̄i aumu nggomi maikaimu ta ake?” Sawa'u b̄a ede majura dou mamboto ede, ro wa'una Isa.

⁵¹Sab̄ua dou anamori-Na ma wara ta ede lab̄o Ruma Isa, olona peda ro fatina ada dou mana'ekai imam-imam sampe kompo fikona.

⁵²Nggahi Ruma Isa d̄i anamori-Na ede, ”Tau kambalipu pedamu d̄i ade lapina, b̄ara samenana dou ma mpa'a kai pedana d̄imamade b̄a peda.

⁵³Kacai b̄a nggomi Nahu wati loaku raho bantu d̄i Ama-Ku, ro ake wa'uku nggadu b̄a Ama-Ku tentara mala'eka ncewi d̄imasampuru d̄ua pasukan?

⁵⁴Pala nggara ndedesi, b̄uneku loana ndad̄i au rakarongga b̄a Ruma Hatalla d̄i ade Alkitab b̄a one poda napab̄uaku ndad̄ina b̄une wakatu ake?”

⁵⁵ Edempara Ruma Isa nggahina d̄i dou mamboto ede, ”Sab̄ua Nahu ake dou madab̄ae, sampe nggomid̄oho mai wa'amu peda ro kapodo d̄imawa'u ra leto Nahu? Sanai-nai Nahu mangoa ra tei aka Bait Allah, nggomid̄oho wati wa'u ra letomu Nahu!

⁵⁶Pala podana pab̄uaku ndad̄i ndede loakud̄u ndad̄ina au ratunti b̄a nabi-nabi d̄i ade Alkitab.” Sawa'u b̄a ede, sara'a anamori-Na rai tu'u wi'ina Ruma Isa.

⁵⁷Dou-dou ma rawa'u Ruma Isa lao wa'ana aka uma dou mana'ekai imam-imam eded̄u Kayafas. Ta aka guru-guru agama ro dou-dou mana'ekaina Yahudi nawa'ura kab̄oro weki.

⁵⁸La Petrus b̄atu salandona Ruma Isa sampe aka sarei uma dou mana'ekai imam-imam. Edempara lu'u la Petrus ade sarei ede, ro doho samana lab̄o dou-dou majaga. Sia nane'e b̄ade b̄uneku cumpukaina sara'ana ede.

⁵⁹Dou-dou mana'ekai imam ro sara'a mahkama Agama na'usahaku raka sakasi cowa loakud̄u rakana b̄ab̄u kai hukuma made d̄i ru'u b̄a Ruma Isa.

⁶⁰Pala siad̄oho wati rakana bukuti kone sab̄ua, konena mboto ma lu'u ndad̄i sakasi cowa. Cumpukaina wara d̄ua dou ma lu'u ta d̄ei tando.

⁶¹ Nggahi siad̄oho, ”Dou ake nggahina, ’Nahu kuloa d̄umba Bait Allah, ro ade tolu nai naloa tu'u kambali.’ ”

⁶²Edempara tu'u kid̄i dou mana'ekai imam-imam, ro nggahina d̄i Ruma Isa, ”Sab̄ua nggomi wati cambemu au ralo'o b̄a dou d̄i ru'u b̄a Nggomi ede?”

⁶³Pala Ruma Isa namidimpa. Sakali wali mana'ekai imam-imam nggahina d̄i Ruma Isa, ”Kai ngara Ruma Hatalla ma mori, nggahipu d̄i nami sab̄ua Nggomi Sangaji Mambei salama, Ana Ruma Hatalla?”

⁶⁴ Cambe b̄a Ruma Isa, ”Ndedeku nggahimu. Pala imbipu: tampu'u wakatu ake, nggomid̄oho d̄ima'eda Ana Manusia dohona ta wela wana Ruma Hatalla Mawancu na'e kuasa, ro namai ese apu d̄i langi!”

⁶⁵ Edempara dou mana'ekai imam-imam ede sipa-sipana kanina, ro nggahina, ”Sia na i'a ra b̄a'aku Ruma Hatalla! Wati paralu walina sakasi. Nggomid̄oho sara'a mawa'ura ringa b̄a ndaimu nggahi ra eli ma i'a ra b̄a'a Ruma Hatalla.

⁶⁶Ake b̄uneku kananu b̄a nggomid̄oho?” Cambe b̄a siad̄oho, ”Sia nancara, ro pab̄uaku d̄imamade.”

⁶⁷ Edempara siad̄oho katufena pahu Ruma Isa, ro b̄oena Sia. Wara rau matopa Sia

⁶⁸ro nggahina, ”Nggahijapu ro ngoapu d̄i nami, oe Sangaji Mambei salama! Cou ma ratopa Nggomi?”

⁶⁹La Petrus wunga dohona ta ari sarei. Sab̄ua dou ada siwe maina ro nggahina d̄i la Petrus. ”Sab̄ua laina nggomi rau masama-sama lab̄o Isa dou Galilea ede?”

⁷⁰Pala la Petrus wati mangakuna d̄itando doud̄oho sara'a ede, ”Nahu wati loaku ka'ao nggahimu ede,” cambe b̄a la Petrus,

⁷¹edempara sia laona aka tad̄a ncai sarei. Sab̄ua dou ada siwe ma kalai ma'eda la Petrus, ro nggahina d̄i dou-dou ta ede, ”Dou ake rau akande masama-sama lab̄o Isa dou Nazaret ede!”

⁷²Edempara la Petrus wati mangaku walina, ro sumpana. ”Poda-poda nahu wati pataku dou ede!” nggahi la Petrus.

⁷³Wati ntoina sawa'u b̄a ede, dou-dou ma kid̄i ta ede maina d̄i la Petrus, ro nggahina, ”Pasti nggomi sab̄ua dou ade weki siad̄oho. Ede natada ipi d̄i sentumu.”

⁷⁴Edempara la Petrus tampu'ura badared̄e ro nggahina, ”Nahu wati pataku dou ede!” Wunga ede koko lalo janga.

⁷⁵La Petrus kawara lalona b̄a one Ruma Isa wa'ura nggahina d̄i sia, ”Sawatipu b̄a koko janga, nggomi tolu kali rungkamu sake d̄i Nahu.” Edempara losa la Petrus, ro nangi kai adena ma'ipi ncoki.