Read Bima MATIUS 3 Bible Online

MATIUS 3 - Bima bible

MATIUS 3

¹Aipu wakatu ede mai la Yahya Mataki kandeu karaso dou d̄i so sarae aka Yudea, ro tampu'una hotoba.

² ”Tobara rad̄i dosa-dosamu,” nggahina, ”B̄ara Karaja'an Saroga wa'ura d̄eni!”

³ La Yahya akeku dou rapehe b̄a Nabi Yesaya ade nggahi ra eli ake ”Wara dou ma'ou nggao ncau d̄i so sarae, ’Sadiapu ncai d̄i ru'u Ruma; kapiripu ncai d̄iru'u Sia.’ ”

⁴ La Yahya kanina kani randawi kai kere onta. Salepena randawi kai huri, ro ngaha ra nonona eded̄u kasanto ro oi ani wub̄a.

⁵Mboto dou ma mai d̄i la Yahya eded̄u dou rad̄i Yerusalem, rad̄i sara'a dana ra rasa Yudea ro rad̄i rasa kompe ra pei Sori Yordan.

⁶Siad̄oho mangaku dosa-dosa siad̄oho, ro la Yahya kandeu karasona siad̄oho aka Sori Yordan.

⁷ Mboto rau dou Farisi ro dou Saduki mamai d̄i la Yahya, mane'e d̄i kandeu karaso. Pala wakatu sia edana siad̄oho mamai, nggahi sia d̄i siad̄oho, ”Nggomid̄oho dou dab̄ae! Nggahi cou nggomid̄oho loamu hori weki rad̄i hukuma Ruma Hatalla d̄i ainaina makento?

⁸Katadapu kai rawimu b̄a one nggomi wa'ura tobamu rad̄i dosa-dosamu.

⁹ Aina kacaimu nggomid̄oho loamu hori weki rad̄i hukuma kai nggahimu b̄a one la Ibrahim eded̄u wa'i ra waromu. Kawarapu, kone kai wadu-wadu ake, Ruma Hatalla naloaku kandad̄i londo ra mai d̄iru'u la Ibrahim!

¹⁰ Ponggo wa'ura sadia d̄ib̄o'okai fu'u haju sampe awa amuna. Sanikina fu'u haju ma wati mbua wua ma taho d̄ib̄o'o ro d̄i paki ade afi.

¹¹Nahu makandeu karaso nggomid̄oho kai oi d̄ikatandakai b̄a one nggomid̄oho wa'ura toba rad̄i dosa-dosamu; pala d̄imamai sawa'u b̄a nahu, d̄imakandeu karaso nggomid̄oho kai Roh Allah ro afi. Sia ncewi na'e kuasa-Na ntewi kaisi nahu! Kone d̄i mawa'a wea sapatu-Na nahu ake wati patuna.

¹²D̄i rima-Na wara d̄oku d̄imbed̄ikai sara'a gando-Na sampe rasona. Gando d̄ikab̄oro-Na d̄i ade jompa, pala sara'a saroena d̄ika'a-Na d̄i ade afi ma wati loa made.”

¹³D̄i wakatu ede Ruma Isa losana rad̄i Galilea lao aka Sori Yordan. Ta aka Sia lao rakana la Yahya ro rahona kandeu karaso.

¹⁴Pala la Yahya cobana tula raraho-Na ede. Nggahi la Yahya, ”Madaku sapodakaina d̄i kandeu karaso b̄a Ita, ake Ita ma mai d̄i la mada.”

¹⁵Pala cambe b̄a Ruma Isa, ”Wati b̄unena ru'u wakatu ake. B̄ara kai ndedena ndai takarawiku samenana rakane'ekai b̄a Ruma Hatalla.” Ndad̄i Ruma Isa kandeu karaso b̄a la Yahya.

¹⁶Sawa'u b̄a nggori kandeu karaso, Ruma Isa losa lalona ra'ade oi d̄i sori ede. Wed̄i lalompa hengga weki langi, eda b̄a Ruma Isa Roh Allah londona b̄une nasi dara d̄i weki ndai Ruma Isa.

¹⁷ Edempara ringana eli Ruma Hatalla manggahi, ”Akera ana-Ku meci b̄a Nahu. Sia makasana wea ade-Ku.”