Read Bima MATIUS 4 Bible Online

MATIUS 4 - Bima bible

MATIUS 4

¹ Sawa'u b̄a ede Ruma Isa wa'a b̄a Roh Allah aka so sarae loakud̄u goda b̄a Ibilis.

²Upampuru nai aimangad̄i upa mpuru nai aimarai Ruma Isa wati ngaha ra nonona. Edempara Ruma Isa iuna hid̄o.

³Mai Ibilis ro nggahina, ”Nggara Nggomi Ana Ruma Hatalla, kaupu wadu-wadu ake ndad̄i roti.”

⁴ Cambe b̄a Ruma Isa, ”D̄i ade Alkitab ratunti: Manusia wati morina kai roti mpoa, pala namori kai rauku sanikina nggahi ra eli rarenta b̄a Ruma Hatalla.”

⁵Sawa'u b̄a ede Ibilis wa'ana Ruma Isa aka Yerusalem, kota maraso, ro wi'ina Ruma Isa ta ese kali b̄awo Bait Allah.

⁶ Edempara Ibilis nggahina d̄i Sia, ”Nggomi Ana Ruma Hatalla. Nggara ndedesi babu la'awara, b̄ara ade Alkitab wara ratunti b̄une ake, ’Ruma Hatalla nakauku mala'eka-mala'eka-Na d̄imasandaka Nggomi, siad̄oho d̄imasakaka aona Nggomi kai rimana, loakud̄u ed̄i-Mu wati tudu b̄a wadu.’ ”

⁷ Cambe b̄a Ruma Isa, ”Pala d̄i ade Alkitab wara ratunti rau, ’nggomi aina cobamu Ruma Hatalla, Rumamu.’ ”

⁸Sawa'u b̄a ede Ibilis wa'a walina Ruma Isa ese doro ma d̄ese poda ro turu teina d̄i Sia samenana karaja'an d̄i dunia ake ro sara'a ntau ra warana.

⁹Edempara nggahi Ibilis d̄i Ruma Isa, ”Sara'ana ake nahu d̄imambei d̄i ru'u Nggomi, nggara Nggomi suju ra nembamu nahu.”

¹⁰ Cambe b̄a Ruma Isa, ”Lao nggomi Ibilis Mataki goda! D̄i ade Alkitab wara ratunti: Nembapu Ruma Hatalla, Rumamu, ro karawi weapu d̄i ru'u Sia mpoa.”

¹¹Cumpukaina Ibilis tu'u wi'ina Ruma Isa, ro mala'eka-mala'eka mai kab̄ua weana Ruma Isa.

¹² Wakatu ringana b̄a one la Yahya wa'ura tau d̄i ade uma bui, Ruma Isa lao pesona weki aka Galilea.

¹³ Sia losana d̄i Nasaret, edempara ngge'ena d̄i Kapernaum d̄i kengge Ndano Galilea d̄i dana ra rasa Zebulon ro Naftali.

¹⁴B̄ara Ruma Isa karawina lampa rawi ede, ndad̄ira au ranggahi b̄a Nabi Yesaya:

¹⁵ ”Dana Zebulon ro dana Naftali, d̄incai malao aka ndano, ipa b̄ae b̄a Sori Yordan, Galilea dana dou malaina Yahudi!

¹⁶Bangsa ma mori d̄i ade marindi ncaki nawa'ura eda taroa ma poda! D̄iru'u b̄a ma ngge'e ade dana ra rasa marindi madekai nawa'ura wontu kalea mataroa!”

¹⁷ Ratampu'u aipu ede Ruma Isa tampu'ura ngoana, ”Tobara rad̄i dosa-dosamu, b̄ara Karaja'an Saroga wa'ura d̄eni!”

¹⁸Wakatu Ruma Isa wunga lampa d̄i kengge Ndano Galilea, Sia edana d̄ua dou mamoti, eded̄u la Simon (tangarakai rau la Petrus) ro arina la Andreas. Siad̄oho wunga wa'una uta d̄i ndano ede kai ala.

¹⁹Nggahi Ruma Isa d̄i siad̄oho, ”Mai b̄atupu Nahu. Nahu d̄imatei nggomid̄oho ma'ala dou.”

²⁰Edempara siad̄oho tu'u wi'ina alana lao b̄atuna Ruma Isa.

²¹Ruma Isa lampa walina, edempara eda wali rauna d̄ua dou masa'e ro arina, eded̄u la Yakub ro la Yahya ana-ana la Zebedeus. Siad̄oho wara sama-sama lab̄o amana wunga katahona ala d̄i ade sampa. Ruma Isa ouna siad̄oho rau,

²²ro siad̄oho tu'u wi'i lalona sampa ro amana ede, edempara lao b̄atuna Ruma Isa.

²³ Aka Galilea, Ruma Isa lampa kalilina sara'a dana ra rasa ro ngoa ra teina d̄i uma-uma sambeakai. Sia ngoa rakahabana Haba Mataho mab̄oha Karaja'an Saroga. Ro Sia nakataho rauku dou-dou ma supu ro mampako ra mpedu.

²⁴Haba mab̄oha Ruma Isa ede nambou d̄i sara'a dana Siria, ndad̄ina mboto dou mamai d̄i Ruma Isa. Siad̄oho wa'ana dou-dou mamboto pahu supu ro masusa ra ncoki. Dou-dou ralu'ukai b̄a roh seta, ma supu finca jara, ro dou mamade b̄inci, sara'a kataho b̄a Ruma Isa.

²⁵Mboto poda dou ma b̄atu Ruma Isa aipu ede. Wara ma ramai ta Galilea, rad̄i Sampuru Kota, rad̄i Yerusalem, rad̄i Yudea, ro rad̄i dana ipa b̄ae b̄a Yordan.