Read Bima MATIUS 7 Bible Online

MATIUS 7 - Bima bible

MATIUS 7

¹”Aina kancaramu dou makalai, b̄aib̄a ndai nggomid̄oho rau wati d̄ikancara b̄a Ruma Hatalla.

² B̄ara b̄une santika nggomid̄oho kancaramu dou makalai, b̄une ede rau Ruma Hatalla d̄imakancarana nggomid̄oho. Ro taka rakani b̄a nggomid̄oho d̄iru'u dou makalai, d̄i kani rau b̄a Ruma Hatalla d̄iru'u b̄a nggomid̄oho.

³B̄ab̄auku nggomid̄oho loakaimu eda fai haju mawara d̄i ade isi mada cinamu, nggarasi balo d̄i ade isi mada ndai nggomid̄oho wati loamu eda?

⁴B̄uneku nggomid̄oho loakaimu nggahi d̄i cinamu, ’Mai nahu makalosa wea fai haju rad̄i ade isi madamu ede,’ sapodakaina d̄i ade isi mada ndaimu wara balo?

⁵Oe dou ma ca'u coro-coro! Kalosa wa'upu balo ma wara d̄i ade isi mada ndaimu, ampomu loa eda kataho, ro maloa kalosa wea fai haju rad̄i mada cinamu ede.

⁶Aina mbeimu barang ma raso d̄i lako, b̄aib̄a dancora mbali b̄a lako ede nggomi. Ro aina mbeimu mutiara d̄i wawi, b̄aib̄a datonda-tonda b̄a wawi mutiara ede.”

⁷”Rahopu, ndad̄i nggomid̄oho d̄imatarima. Ngupapu, ndad̄i nggomid̄oho d̄imaraka. Tokepu, ndad̄i ncai d̄i hengga wea d̄i ru'u nggomid̄oho.

⁸B̄ara dou ma raho d̄imatarima; dou mangupa d̄imaraka; ro dou ma toke ncai, d̄i hengga wea ncaina.

⁹D̄i ade weki nggomid̄oho sab̄ua wara ama ma mbei wadu d̄i anana, nggara narahosi roti?

¹⁰Atao mambei sawa, nggara narahosi b̄a sia uta?

¹¹Kone nggomid̄oho madab̄ae, nggomid̄oho mab̄adeku mbei ma taho d̄i ru'u ana-anamu. Au walipu Amamu d̄i saroga! Sia nambeiku ma ncewi taho d̄i ru'u b̄a dou maraho d̄i Sia.

¹² Karawipu mataho d̄i dou makalai b̄une nggomid̄oho ne'emu karawi mataho b̄a siad̄oho. Edeku fu'una hukum Musa ro ngoa ra tei b̄a nabi-nabi.”

¹³”Lu'upu ta tad̄a ncai ma tuka, b̄ara tad̄a ro ncai ma lao aka anaraka nana'e ro paja, ro mboto dou malampakaina.

¹⁴Pala tuka ro ncoki tad̄a ro ncai ma wa'a dou aka mori. Ro sato'i mpa dou ma rakana eda.”

¹⁵”Aina kabare d̄i nabi-nabi palasu. Siad̄oho maina d̄i nggomid̄oho nawa'a pahu jimba, pala siad̄oho ede sapodakaina b̄une lako doro ma nggange.

¹⁶Nggomid̄oho mapataku siad̄oho d̄i hasi ruku ra rawina. Rompa mantau rui wati d̄imambua anggo, ro mpori rui wati d̄imambua ara.

¹⁷Rad̄i fu'u haju ma ngawa marakaku wuana ma taho, ro rad̄i fu'u haju makura ngawa wati rakamu wuana mataho.

¹⁸Fu'u haju ma ngawa wati loana mbua wua ma iha, ro fu'u haju ma karante wati loana mbua wua ma taho.

¹⁹ Sanikina fu'u haju ma wati mbua wua ma taho, d̄i b̄o'o ro d̄i ka'a.

²⁰ Ndede rau lab̄o nabi-nabi palasu. Nggomid̄oho maloaku pata siad̄oho rad̄i hasi ruku ra rawina.”

²¹”Wati sara'a dou ma ou Nahu, ’Ruma, Ruma,’ d̄imandad̄i anggota Karaja'an Saroga, pala cuma dou-dou ma rakarawi au rakane'ekai b̄a Ama-Ku ma d̄i saroga.

²²Ainaina Kiama mboto dou d̄imanggahi d̄i Nahu, ’Ruma, Ruma, laina kai ngara Itasi Ruma wa'ura karongga b̄a madad̄oho au rakaukai b̄a Ruma Hatalla? Ro laina kai ngara Itasi Ruma madad̄oho wa'ura b̄aka kalosamu roh-roh seta ro wa'ura mboto karawi b̄a madad̄oho rawi mab̄isa ra guna?’

²³ Pala Nahu d̄imacambena, ’Nahu wati paranaku pata nggomid̄oho! Laora aina wara wali ta ake, nggomid̄oho ma karawi madab̄ae.’ ”

²⁴”Dou ma ringa nggahi Nahu ake, ro mab̄atuna, sama b̄une dou maloa tu'u umana ese wawo wadu.

²⁵Wakatu mai ura, ro mai mbere ro angi na'e mab̄oe uma ede, uma ede wati ndumbana b̄ara ratu'u ese wawo wadu.

²⁶Ro dou ma ringa nggahi-Ku ake, pala wati ne'ena b̄atu, sia sama b̄une dou masampula ma tu'u umana ese wawo sarae.

²⁷D̄iwakatu mai ura, ro mbere ro angi na'e mab̄oe uma ede, uma ede ndumba. Ro na'ipiku ihana!”

²⁸ Cumpukaina Ruma Isa nggori teina, dou-dou ma wara d̄i hid̄i ede nawancuku mbora akana b̄a ringana ngoa ra tei-Na.

²⁹B̄ara Sia ngoa ra tei kai wibawa, wati b̄une guru-guru agama siad̄oho.