Read Bima MATIUS 9 Bible Online

MATIUS 9 - Bima bible

MATIUS 9

¹Ruma Isa ne'ena d̄i ade sampa, edempara laona ipa b̄ae b̄a ndano, lao mbali aka kampo ra mporo ndai-Na.

²Ta ede wa'a b̄a dou d̄i Sia sab̄ua dou mamade b̄inci ma maru d̄i dipi. Wakatu eda b̄a Ruma Isa b̄a ndede pahu d̄ei imbi dou-dou ede, nggahi Ruma Isa d̄i dou ma made b̄inci ede, ”Kalembo ade, ana-Ku! Dosa-dosamu wa'ura kangampu wea.”

³Pila-pila dou guru agama ma wara d̄i hid̄i ede, manggahi d̄ei adena, ”Dou ake nakab̄awa ra katunaku Ruma Hatalla!”

⁴Ruma Isa nab̄adeku kananu siad̄oho, ndad̄i nggahi Sia, ”B̄ab̄auku kananu dab̄aekaimu b̄une ede?

⁵B̄e ma ipi mod̄a: d̄i nggahi, ’Dosamu wa'ura kangampu wea,’ atao nggahi, ’Tu'u lampara’?

⁶Pala ake Nahu d̄imambei bukuti d̄i nggomid̄oho b̄a one d̄i wawo dunia ake Ana Manusia nantau kuasa d̄imakangampu wea dosa.” Edempara Ruma Isa nggahina d̄i dou mamade b̄inci ede, ”Tu'u hantapu dipimu ro dulara!”

⁷Dou mamade b̄inci ede tu'una ro lao dulana aka umana.

⁸Wakatu eda b̄a dou-dou mandad̄i ede, siad̄oho wancuku dahuna edempara roi ra wadina Ruma Hatalla. B̄ara Ruma Hatalla nawa'ura mbei kuasa ma wancu na'e d̄i ru'u manusia.

⁹Edempara Ruma Isa tu'u wi'ina hid̄i ede. Wunga lampana, Sia edana sab̄ua dou mataki tagi bea, ngarana la Matius, wunga doho d̄i kantona. Nggahi Ruma Isa d̄i sia ede, ”Mai b̄atupu Nahu!” Edempara la Matius tu'u kid̄ina ro lao b̄atuna Ruma Isa.

¹⁰ Wakatu Ruma Isa wunga ngahana d̄i uma la Matius, mai lalompa mboto dou mataki tagi bea ro rawi'ikai wati taho b̄a ela ra dou, mab̄atu ngaha sama-sama lab̄o Ruma Isa ro ana morid̄oho-Na.

¹¹Wara dou-dou Farisi ma eda lampa rawi ede. Ro siad̄oho sod̄ina d̄i anamori Ruma Isa, ”B̄ab̄auku guru nggomid̄oho ngaha samana lab̄o dou mataki tagi bea ro dou-dou mawati taho?”

¹²Ringa b̄a Ruma Isa rasod̄i b̄a siad̄oho edempara cambe-Na, ”Dou ma wati supu wati paraluna dokte, dou ma supumpa.

¹³ Tana'o kab̄aepu auku aona eli ayat Alkitab ake: ’Nahu ne'eku kasikai ade, ro laina koroba binata’. B̄ara Nahu maiku laina d̄ima'ou dou ma wi'i wekina wa'ura taho ra ncihi, malaisi dou rawi'ikai awa ra tuna.”

¹⁴Sawa'u b̄a ede anamori la Yahya Mataki kandeu karaso dou mai rakana Ruma Isa. Edempara sod̄i b̄a siad̄oho, ”B̄ab̄auku madad̄oho ro dou-dou Farisi d̄i puasakai, pala anamori Ita wati?”

¹⁵Cambe b̄a Ruma Isa, ”B̄uneku kananu b̄a nggomid̄oho? Sab̄ua loaku dou-dou mamai d̄i ndiha nikakai ede kasusana ade, nggara b̄unti mone mbuipu wara sama-samana lab̄o siad̄oho? Tantu wati! Pala d̄imarongga wakatuna b̄unti mone ede d̄i weha rad̄i siad̄oho. Wakatu edeku ampona puasa siad̄oho.

¹⁶Wati wara dou ma nempa b̄aju ma wa'ura mpasa kai satob̄e ci ma mbuipu b̄ou. B̄ara ci ranempa kai ede nafi'i ro nasi'iku b̄aju ede, ndad̄ina naha na'e nci'i b̄aju ede.

¹⁷Ndede rau wati wara dou ma lua kai anggo mab̄ou d̄i ade kad̄ud̄u huri ma wa'ura mpasa. B̄ara kad̄ud̄u ede nanci'i ra iha, edempara anggo ede mboho ihana. Anggo mab̄ou pab̄ua d̄itau d̄i kad̄ud̄u ma b̄ou rau, loakud̄u anggo ro kad̄ud̄u ede ngge'empa tahona.”

¹⁸Wunga Ruma Isa nuntuna lab̄o anamori la Yahya Mataki kandeu karaso dou, mai lalo sab̄ua dou mana'ekai uma sambea. Sia sujuna d̄i tando Ruma Isa ro nggahina, ”Ana siwe mada b̄oumpa madena. Pala, tangawa to'isi Ita lao d̄imad̄amana ana mada loakud̄u sia mori mbalina.”

¹⁹Tu'ukai Ruma Isa ro anamorid̄oho-Na lao sama lab̄o dou ede.

²⁰D̄iwoha ncai sab̄ua dou siwe ma wa'ura sampuru d̄ua mba'a ntoina supu mboho ra'a ma ndapo angi lab̄o mai takina, mai d̄enina ta kontu Ruma Isa. Kananu b̄a sia, ”Sura tudumpa b̄a nahu jumba-Na, nahu d̄imataho.” Edempara sia tuduna sumpu jumba Ruma Isa.

²²Wakatu ede wa'u tambari Ruma Isa ro edana dou siwe ede edempara nggahina d̄i sia, ”Kalembo ade, ana-Ku! B̄ara nggomi imbimu d̄i Nahu, nggomi tahora supumu!” D̄i wakatu ede wa'u dou siwe ede tahona.

²³Edempara Ruma Isa ronggara aka uma dou mana'ekai uma sambea ede. Wakatu eda b̄a sia dou mataki mpa'a musik mancokikai ade ro mboto dou ma ngango-ngango,

²⁴nggahi Sia d̄i siad̄oho, ”Losa nggomid̄oho sara'a! Ana dou ake wati madena; sia namaruku.” Siad̄oho sara'a harikaina Ruma Isa.

²⁵Sawa'u b̄a losa dou-dou ede, lu'u Ruma Isa ade b̄ili ana dou ede ro nenti weana rimana. Edempara mori mbali ana dou siwe ede.

²⁶Haba ede nambou d̄i sara'a dana ra rasa ede.

²⁷Ruma Isa losana d̄i hid̄i ede ro d̄i woha ncai wara dou d̄uana mambuda ma b̄atu Sia. Siad̄oho kanggicana, ”Ana Daud, kasi to'ikaipu ademu d̄i madad̄oho!”

²⁸Wunga lu'u Ruma Isa d̄i ade uma, d̄ua dou mambuda ede mai rakana Sia. Sod̄i b̄a Ruma Isa siad̄oho, ”Sab̄ua nggomid̄oho ma'imbiku b̄a one Nahu maloa kataho nggomid̄oho?” ”Iota imbi, Pa!” cambe b̄a siad̄oho.

²⁹Edempara Ruma Isa d̄amana mada siad̄oho ro nggahina, ”B̄ara nggomid̄oho imbimu, ndad̄ira au rane'e b̄a nggomid̄oho.”

³⁰Edempara siad̄oho loana eda. Ruma Isa ngoa kapodana siad̄oho, loakud̄u aina ngoa cou-cou au mandad̄i ede.

³¹Pala siad̄oho lao kambouna haba mab̄oha Ruma Isa d̄i sara'a dana ra rasa.

³²Wakatu lao d̄ua dou ede, sab̄ua dou mampongi ralu'ukai b̄a roh seta wa'a b̄a dou aka Ruma Isa.

³³B̄aka kalosa b̄a Ruma Isa roh seta ede ro wakatu ede wa'u dou mampongi ede loana nuntu mbali. Dou mamboto ede mbora akana ro nggahina, ”Watipu parana eda b̄a nami mandad̄i b̄une ake d̄i Israel!”

³⁴ Pala dou-dou Farisi manggahi, ”Mana'ekai roh-roh seta ma mbei Sia kuasa d̄imab̄aka kalosa roh-roh seta ede.”

³⁵ Nded̄eku Ruma Isa lu'u losana tampu'u d̄i sab̄ua kota lao d̄i kota ma kalai ro tampu'u d̄i sab̄ua kampo lao d̄i kampo ma kalai. Sia nangoa ra teiku d̄i uma-uma sambeakai, ro nakahabaku Haba Mataho mab̄oha Karaja'an Saroga. Sia katahona dou-dou ma ncoki ra susa b̄ara mboto pahu supuna ro ma'iha sarumbuna.

³⁶ Wakatu Ruma Isa edana dou mamboto ede, Sia kasi adena d̄i siad̄oho, b̄ara doud̄oho ede madarura ade ro wati loana au-au, b̄unesi jimba ma wati wara dou ma'ompukaina.

³⁷ Edempara Ruma Isa nggahina d̄i anamorid̄oho-Na, ”D̄i pako namboto, pala dou mapako sato'impa.

³⁸B̄ara ndedena rahopu d̄i dou mantau nggaro ede loakud̄u nggaduna dou d̄imapakona.”